ലോകകപ്പ് 2026; ഇനി പഴയ കളിയല്ല: വമ്പൻ മാറ്റങ്ങളുമായി ഫിഫ
2026-ലെ ലോകകപ്പ് മുതൽ ഫുട്ബോൾ മത്സരങ്ങളിൽ നടപ്പിലാക്കാൻ പോകുന്ന പുതിയ പരിഷ്കാരങ്ങൾ ഫിഫ പ്രഖ്യാപിച്ചു. മത്സരങ്ങളിലെ സമയം പാഴാക്കുന്നത് തടയാനും കളിയുടെ വേഗത വർദ്ധിപ്പിക്കാനും ലക്ഷ്യമിട്ടുള്ള അഞ്ച് പ്രധാന നിയമങ്ങളാണ് ഫിഫ ഔദ്യോഗികമായി പ്രഖ്യാപിച്ചിരിക്കുന്നത്.
പുതിയ നിയമങ്ങൾ പരിശോധിക്കാം:
- വേഗത്തിലുള്ള സബ്സ്റ്റിറ്റ്യൂഷൻ:
ഒരു താരം സബ്സ്റ്റിറ്റ്യൂട്ട് ചെയ്യപ്പെടുമ്പോൾ മൈതാനത്തിന് പുറത്തേക്ക് പോകാൻ പരമാവധി 10 സെക്കൻഡ് മാത്രമേ അനുവദിക്കൂ. ഇതിൽ കൂടുതൽ സമയമെടുത്താൽ പകരം വരുന്ന കളിക്കാരൻ മൈതാനത്തേക്ക് പ്രവേശിക്കാൻ ഒരു മിനിറ്റ് കാത്തുനിൽക്കേണ്ടി വരും. ആ സമയം ടീം ഒരാൾ കുറഞ്ഞ നിലയിൽ കളിക്കേണ്ടി വരും. - ത്രോ-ഇൻ, ഗോൾ കിക്ക് നിയന്ത്രണം:
ത്രോ-ഇൻ അല്ലെങ്കിൽ ഗോൾ കിക്ക് എടുക്കുന്നതിന് റെഫറിയുടെ സിഗ്നലിന് ശേഷം 5 സെക്കൻഡ് സമയം മാത്രമേ ലഭിക്കൂ. ഈ നിശ്ചിത സമയത്തിനുള്ളിൽ പന്ത് പ്ലേ ചെയ്തില്ലെങ്കിൽ പന്തിൻമേലുള്ള നിയന്ത്രണം എതിർ ടീമിന് നൽകും. - വൈദ്യസഹായം തേടുമ്പോൾ
കളിക്കിടെ വൈദ്യസഹായം തേടുന്ന താരം നിർബന്ധമായും മൈതാനത്തിന് പുറത്തേക്ക് പോകണം. പുറത്തുപോയ ശേഷം തിരികെ പ്രവേശിക്കാൻ ഒരു മിനിറ്റ് കാത്തുനിൽക്കണം. എന്നാൽ കാർഡ് നൽകാൻ തക്കവിധമുള്ള ഫൗളിലൂടെയാണ് പരിക്കേറ്റതെങ്കിൽ ഈ നിയമം ബാധകമല്ല. - വാർ (VAR) പരിശോധന:
രണ്ടാമത്തെ മഞ്ഞക്കാർഡ് നൽകി ഒരു താരത്തെ പുറത്താക്കുന്ന (ചുവപ്പ് കാർഡ്) തീരുമാനങ്ങൾ ഇനി വാർ (VAR) പരിശോധനയ്ക്ക് വിധേയമാക്കാം. കൂടാതെ തെറ്റായി അനുവദിച്ച കോർണർ കിക്കുകളും വാർ പരിശോധിക്കും. - റെഫറിയുമായി സംസാരിക്കാൻ ക്യാപ്റ്റന് മാത്രം അനുമതി:
മൈതാനത്ത് റെഫറിയുടെ തീരുമാനങ്ങളെ ചോദ്യം ചെയ്യാനോ വിശദീകരണം ചോദിക്കാനോ ടീം ക്യാപ്റ്റന് മാത്രമേ അനുവാദമുള്ളൂ. മറ്റ് കളിക്കാർ റെഫറിയെ വളയുകയോ വാഗ്വാദത്തിൽ ഏർപ്പെടുകയോ ചെയ്താൽ അവർക്ക് ഉടനടി മഞ്ഞക്കാർഡ് ലഭിക്കും.
