‘സഹായിച്ചില്ലെങ്കിൽ അപകീർത്തിപ്പെടുത്തും’; ഇസ്രയേലിനെതിരായ യുദ്ധക്കുറ്റ അന്വേഷണം ഒഴിവാക്കാൻ മൊസാദ് മേധാവി ഭീഷണിപ്പെടുത്തിയെന്ന് മുൻ ഐ.സി.സി പ്രോസിക്യൂട്ടർ

വാഷ്ങ്ടൺ: ഫലസ്തീനിൽ ഇസ്രയേൽ നടത്തിയ യുദ്ധക്കുറ്റങ്ങളെക്കുറിച്ചുള്ള അന്വേഷണം ഉപേക്ഷിക്കാൻ ഇസ്രയേൽ ചാരസംഘടനയായ മൊസാദിന്റെ മുൻ മേധാവി യോസി കോഹൻ അന്താരാഷ്ട്ര ക്രിമിനൽ കോടതിയുടെ (ഐ.സി.സി) മുൻ ചീഫ് പ്രോസിക്യൂട്ടറായ ഫത്തൗ ബെൻസൂദയെ രഹസ്യ കൂടിക്കാഴ്ചകളിലൂടെ നിരന്തരം ഭീഷണിപ്പെടുത്തിയിരുന്നതായി റിപ്പോർട്ട്.

മിഡിൽ ഈസ്റ്റ് ഐ, ദ ഗാർഡിയൻ തുടങ്ങിയ മാധ്യമങ്ങളാണ് ഈ ഞെട്ടിക്കുന്ന വിവരങ്ങൾ പുറത്തുവിട്ടത്. 2016 മുതൽ 2021 വരെ മൊസാദ് തലവനായിരുന്ന കോഹൻ, ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ അനൗദ്യോഗിക ദൂതനായാണ് പ്രവർത്തിച്ചിരുന്നതെന്നും ഇസ്രയേൽ സൈനികർക്കെതിരെയുള്ള നടപടികൾ ഒഴിവാക്കുക എന്ന ലക്ഷ്യത്തോടെയാണ് ഈ ഭീഷണികൾ ഉയർന്നതെന്നും റിപ്പോർട്ടിൽ പറയുന്നു. 2021-ൽ ആരംഭിച്ച ഈ അന്വേഷണത്തിന്റെ തുടർച്ചയായാണ് നിലവിലെ ഐ.സി.സി പ്രോസിക്യൂട്ടറായ കരീം ഖാൻ, ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിനും പ്രതിരോധ മന്ത്രി യോവ് ഗാലന്റിനുമെതിരെ അറസ്റ്റ് വാറന്റ് പുറപ്പെടുവിക്കാൻ അടുത്തിടെ അപേക്ഷ നൽകിയത്.

2017-ൽ മ്യൂണിക്കിൽ നടന്ന ഒരു സുരക്ഷാ സമ്മേളനത്തിലാണ് കോഹനും ബെൻസൂദയും ആദ്യമായി കണ്ടുമുട്ടുന്നത്. പിന്നീട് 2018-ൽ ന്യൂയോർക്കിലെ ഒരു ഹോട്ടലിൽ ഡെമോക്രാറ്റിക് റിപ്പബ്ലിക് ഓഫ് കോംഗോയുടെ അന്നത്തെ പ്രസിഡന്റായിരുന്ന ജോസഫ് കബിലയുമായി ബെൻസൂദ കൂടിക്കാഴ്ച നടത്തുന്നതിനിടെ കോഹൻ അപ്രതീക്ഷിതമായി അവിടേക്ക് കടന്നുവരികയും അവരെ ഞെട്ടിക്കുകയും ചെയ്തു. തുടക്കത്തിൽ അവരുമായി നല്ലൊരു ബന്ധം സ്ഥാപിക്കാൻ ശ്രമിച്ച കോഹൻ പിന്നീട് ഭീഷണിയുടെയും പാതയിലേക്ക് തിരിയുകയായിരുന്നു. ബെൻസൂദയുടെയും കുടുംബത്തിന്റെയും സുരക്ഷയെ ബാധിക്കുന്ന കാര്യങ്ങളിൽ ഇടപെടരുതെന്നും, തങ്ങളെ സഹായിച്ചാൽ തിരിച്ച് സംരക്ഷണം നൽകാമെന്നും കോഹൻ അവരോട് നേരിട്ട് പറഞ്ഞതായാണ് വിവരം. ഇതിന് പുറമെ, മൊസാദ് അവരുടെ ഭർത്താവിന്റെ രഹസ്യ ഫോൺ സംഭാഷണങ്ങൾ ചോർത്തുകയും ഈ വിവരങ്ങൾ ഉപയോഗിച്ച് പ്രോസിക്യൂട്ടറെ അപകീർത്തിപ്പെടുത്താൻ ശ്രമിക്കുകയും ചെയ്തിരുന്നു. തനിക്കെതിരെ നടക്കുന്ന ഈ ഗൂഢനീക്കങ്ങളെക്കുറിച്ച് ബെൻസൂദ ഐ.സി.സിയിലെ മറ്റ് മുതിർന്ന ഉദ്യോഗസ്ഥരെ അറിയിച്ചിരുന്നു.

ഏകദേശം ഒരു ദശാബ്ദത്തോളമായി അന്താരാഷ്ട്ര ക്രിമിനൽ കോടതിയെ അട്ടിമറിക്കാൻ ഇസ്രയേൽ രഹസ്യാന്വേഷണ ഏജൻസികൾ നടത്തിവന്ന നീക്കങ്ങളുടെ ഭാഗമായിരുന്നു ഇതെന്നാണ് വിലയിരുത്തപ്പെടുന്നത്. ബെൻസൂദയെ ഭീഷണിപ്പെടുത്തുന്നതിന് പുറമെ, അമേരിക്കൻ പ്രസിഡന്റ് ഡൊണാൾഡ് ട്രംപുമായി ചേർന്ന് ഇസ്രായേൽ അവർക്കെതിരെ ഉപരോധങ്ങളും വിസ വിലക്കുകളും ഏർപ്പെടുത്തുകയും ചെയ്തിരുന്നു. ഇസ്രായേൽ സർക്കാരിന്റെ ഉന്നതതല അനുമതിയോടെയാണ് കോഹൻ ഈ നീക്കങ്ങൾ നടത്തിയതെന്നും റിപ്പോർട്ടുകൾ വ്യക്തമാക്കുന്നു. ഇതിന് പിന്നാലെ, നിലവിലെ പ്രോസിക്യൂട്ടറായ കരീം ഖാനും പാശ്ചാത്യ രാജ്യങ്ങളിൽ നിന്നും മറ്റ് ഇസ്രയേൽ അനുകൂലികളിൽ നിന്നും സമാനമായ രീതിയിൽ കടുത്ത രാഷ്ട്രീയ സമ്മർദ്ദങ്ങളും ഭീഷണികളും നേരിടേണ്ടി വന്നതായും വാർത്തകളിൽ പരാമർശിക്കുന്നുണ്ട്.