സമൂഹമാധ്യമങ്ങളിൽ സുഹൃത്തുക്കളുടെ നഗ്നവിഡിയോ പോസ്റ്റ് ചെയ്തു; യൂട്യൂബർ തൊപ്പിക്കെതിരെ കേസ്

കൊച്ചി: സമൂഹമാധ്യമങ്ങളിലൂടെ അശ്ലീലദൃശ്യങ്ങൾ പ്രചരിപ്പിച്ച സംഭവത്തിൽ പ്രമുഖ യൂട്യൂബർ ‘തൊപ്പി’ എന്ന നിഹാദിനെതിരെ പൊലീസ് കേസെടുത്തു. ഐടി നിയമപ്രകാരം എറണാകുളം റൂറൽ സൈബർ പൊലീസാണ് നടപടിയെടുത്തത്. സുഹൃത്തുക്കളുടെ നഗ്നവിഡിയോകൾ ഇയാൾ സമൂഹമാധ്യമങ്ങളിൽ പോസ്റ്റ് ചെയ്തതായി എഫ്ഐആറിൽ പറയുന്നു. അഭിഭാഷകനായ ശ്രീജിത്ത് പെരുമന നൽകിയ പരാതിയിലാണ് കേസ്.

തൊപ്പിയും സുഹൃത്തുക്കളും തമ്മിലുള്ള തർക്കങ്ങൾക്ക് പിന്നാലെയാണ് പരസ്പരം ആരോപണങ്ങളുമായി ഇവർ രംഗത്തെത്തിയത്. ലഹരിമരുന്ന് ഉപയോഗം, പ്രായപൂർത്തിയാകാത്ത കുട്ടികൾക്കെതിരെയുള്ള ലൈംഗികാതിക്രമം, ബ്ലാക്ക്മെയിലിംഗ് തുടങ്ങിയ ഗുരുതരമായ ആരോപണങ്ങളാണ് ഇരുവിഭാഗവും ലൈവ് വിഡിയോകളിലൂടെ ഉന്നയിച്ചത്. സംഭവത്തിന്റെ ഗൗരവം കണക്കിലെടുത്ത് തൊപ്പി ഗ്യാങ്ങിനെതിരെ വിശദമായ അന്വേഷണം നടത്താൻ സംസ്ഥാന പൊലീസ് മേധാവി റാവാഡ ചന്ദ്രശേഖർ ഉത്തരവിട്ടിട്ടുണ്ട്.