100 കോടിക്ക് മുകളിൽ ആസ്തിയുള്ള ഇന്ത്യക്കാർ 576; 5 വർഷത്തിനിടെ 4 മടങ്ങ് ‘വളർച്ച’! | Billionaires in India list

ന്യൂഡൽഹി: ഇന്ത്യയിൽ ശതകോടീശ്വരന്മാരുടെയും അതിസമ്പന്നരുടെയും എണ്ണത്തിൽ വൻ കുതിച്ചുചാട്ടം(Billionaires in India list). ഒരു സാമ്പത്തിക വർഷം 100 കോടിയോ അതിലധികമോ മൊത്ത വരുമാനം ലഭിച്ചതായി ആദായനികുതി റിട്ടേൺ(ഐടിആർ) സമർപ്പിച്ചവരുടെ എണ്ണം കഴിഞ്ഞ അഞ്ച് വർഷത്തിനിടെ നാലുമടങ്ങായി വർധിച്ചു. 2025-26 അസെസ്‌മെന്റ് വർഷത്തിൽ ഇന്ത്യയിൽ 576 വ്യക്തികളാണ് 100 കോടി രൂപയ്ക്ക് മുകളിൽ ആസ്തിയുള്ളതായി ആദായനികുതി വകുപ്പിന് കണക്കുകൾ കൈമാറിയത്. ലോക്സഭയിൽ കോൺഗ്രസ് എം.പി മുരാരി ലാൽ മീന ഉന്നയിച്ച ചോദ്യത്തിന് രേഖാമൂലം നൽകിയ മറുപടിയിലാണ് കേന്ദ്ര ധനകാര്യ സഹമന്ത്രി പങ്കജ് ചൗധരി ഈ വിവരങ്ങൾ പുറത്തുവിട്ടത്.

രാജ്യത്ത് സാമ്പത്തിക വളർച്ചയും സമ്പത്ത് ഉൽപാദനവും അതിവേഗം നടക്കുന്നു എന്നതിന്റെ സൂചനയായാണ് സർക്കാരും ഒരുവിഭാഗം സാമ്പത്തിക വിദഗ്ധരും ഈ കണക്കുകളെ കാണുന്നത്. എന്നാൽ, ആഗോളതലത്തിൽ സമ്പത്തിന്റെ കേന്ദ്രീകരണം ശക്തമാകുകയും സാധാരണക്കാരും അതിസമ്പന്നരും തമ്മിലുള്ള സാമ്പത്തിക വിടവ് വർധിക്കുകയും ചെയ്യുന്നതിനിടയിലാണ് ഈ കണക്കുകൾ പുറത്തുവന്നിരിക്കുന്നത് എന്നതും ശ്രദ്ധേയമാണ്.

അഞ്ച് വർഷത്തെ കുതിപ്പ്: കണക്കുകൾ ഇങ്ങനെ | Billionaires in India list

ധനമന്ത്രാലയം പാർലമെന്റിൽ സമർപ്പിച്ച ഔദ്യോഗിക കണക്കുകൾ പ്രകാരം 2021-22 അസസ്‌മെന്റ് വർഷം മുതൽ നിലവിലെ 2025-26 അസെസ്‌മെന്റ് വർഷം വരെയുള്ള അഞ്ച് വർഷ കാലയളവിൽ 100 കോടി രൂപയ്ക്ക് മുകളിൽ വരുമാനമുള്ളവരുടെ എണ്ണത്തിൽ വൻ വളർച്ചയാണ് രേഖപ്പെടുത്തിയിരിക്കുന്നത്.

കഴിഞ്ഞ അഞ്ചു വർഷത്തിനിടെ 100 കോടിയിലധികം വരുമാനം കാണിച്ചവരുടെ എണ്ണം ഇങ്ങനെയാണ്:

2021-22: 142
2022-23: 301
2023-24: 284
2024-25: 415
2025-26: 576

2021-22ൽ വെറും 142 വ്യക്തികൾ മാത്രമാണ് 100 കോടി രൂപയിൽ കൂടുതൽ വരുമാനം കാണിച്ചിരുന്നതെങ്കിൽ, അഞ്ച് വർഷം കൊണ്ട് അത് 576 ആയി ഉയർന്നു. 2023-24 ൽ ചെറിയൊരു ഇടിവ് (284) രേഖപ്പെടുത്തിയെങ്കിലും തുടർന്ന് വന്ന വർഷങ്ങളിൽ ശക്തമായ തിരിച്ചുവരവ് നടത്തുകയും കഴിഞ്ഞ ഒരു വർഷത്തിനുള്ളിൽ മാത്രം 38.8 ശതമാനത്തിന്റെ വൻ വർധന രേഖപ്പെടുത്തുകയും ചെയ്തു.

‘ശതകോടീശ്വരൻ’ എന്നതിന് നിയമപരമായ നിർവചനമില്ല: കേന്ദ്രം | Billionaires in India list

ഇന്ത്യയിൽ കോടീശ്വരന്മാരുടെ എണ്ണം ക്രമാതീതമായി വർധിക്കുന്നത് സംബന്ധിച്ച് സർക്കാരിന് കൃത്യമായ ബോധ്യമുണ്ടോ എന്ന ചോദ്യത്തിന്, ആദായനികുതി നിയമപ്രകാരം ‘ശതകോടീശ്വരൻ'(Billionaire) എന്ന പദത്തിന് പ്രത്യേക നിയമപരമായ നിർവചനം ഇല്ലെന്നായിരുന്നു കേന്ദ്രമന്ത്രി പങ്കജ് ചൗധരിയുടെ വിശദീകരണം. 1961-ലെ പഴയ ആദായനികുതി നിയമത്തിലോ, നിലവിലുള്ള ആദായനികുതി നിയമത്തിലോ ഇത്തരമൊരു തരംതിരിവില്ല.

അതുപോലെ തന്നെ, രാജ്യത്തെ പൗരന്മാരുടെ മൊത്തത്തിലുള്ള ആസ്തിയും സമ്പത്തും സംബന്ധിച്ച ഔദ്യോഗിക വിവര ശേഖരണം നിലവിൽ സർക്കാരിന്റെ പക്കലില്ലെന്ന് മന്ത്രി അറിയിച്ചു. 1957-ലെ ‘വെൽത്ത് ടാക്‌സ് ആക്ട്’ 2016 ഏപ്രിലിൽ നരേന്ദ്ര മോദി സർക്കാർ റദ്ദാക്കിയിരുന്നു. അതിനാൽ, ആദായനികുതി റിട്ടേണുകളിലൂടെ വ്യക്തികൾ വെളിപ്പെടുത്തുന്ന വാർഷിക വരുമാനത്തിന്റെ അടിസ്ഥാനത്തിൽ മാത്രമാണ് ഉയർന്ന വരുമാനക്കാരുടെ പട്ടിക സർക്കാർ തയ്യാറാക്കുന്നത്.

സമ്പത്തിന്റെ കേന്ദ്രീകരണവും സാമ്പത്തിക അസമത്വവും | Billionaires in India list

രാജ്യത്ത് സമ്പത്ത് കുറച്ചുപേരിലേക്ക് മാത്രം കേന്ദ്രീകരിക്കുന്നത് വഴി ഉണ്ടാകുന്ന സാമ്പത്തിക അസമത്വം, നിക്ഷേപം, തൊഴിലവസരങ്ങൾ, സമഗ്ര സാമ്പത്തിക വളർച്ച എന്നിവയെ ബാധിക്കുന്നുണ്ടോയെന്ന പ്രതിപക്ഷത്തിന്റെ ചോദ്യങ്ങൾക്കും മന്ത്രി വിശദമായ മറുപടി നൽകി. ആഗോളതലത്തിൽ ‘വേൾഡ് ഇൻക്വാളിറ്റി റിപ്പോർട്ട്’ ഉൾപ്പെടെയുള്ള പഠനങ്ങൾ ഇന്ത്യയിൽ അസമത്വം വർധിക്കുന്നതായി ചൂണ്ടിക്കാണിക്കാറുണ്ട്. ഇന്ത്യയിലെ ഏറ്റവും ഉയർന്ന 10 ശതമാനം ആളുകൾ രാജ്യത്തിന്റെ മൊത്തം വരുമാനത്തിന്റെ 58 ശതമാനവും കൈയാളുമ്പോൾ, താഴേത്തട്ടിലുള്ള 50 ശതമാനം ജനങ്ങൾക്ക് ലഭിക്കുന്നത് വെറും 15 ശതമാനം വരുമാനമാണെന്നാണ് അത്തരം റിപ്പോർട്ടുകളിലെ കണ്ടെത്തൽ.

എന്നാൽ, ഈ വാദങ്ങളെ പ്രതിരോധിച്ച സർക്കാർ, രാജ്യത്ത് സാമ്പത്തിക വിടവ് കുറഞ്ഞുവരികയാണെന്ന് സ്ഥിതിവിവരക്കണക്കുകൾ ഉദ്ധരിച്ച് സമർത്ഥിച്ചു. സർക്കാരിന്റെ കണ്ടെത്തലുകൾ ഇങ്ങനെയാണ്:

1. ഗിനി കോഫിഷ്യന്റ് കുറഞ്ഞു: നാഷണൽ സാമ്പിൾ സർവേ ഓർഗനൈസേഷന്റെ (എൻഎസ്എസ്ഒ) ഏറ്റവും പുതിയ ഗാർഹിക ഉപഭോഗ സർവേ പ്രകാരം ഗ്രാമീണ, നഗര മേഖലകളിലെ അസമത്വം അളക്കുന്ന ഗിനി കോഫിഷ്യന്റ് കുറഞ്ഞിട്ടുണ്ട്. ഗ്രാമീണ മേഖലയിൽ ഇത് 0.266-ൽ നിന്ന് 0.237 ആയും, നഗര മേഖലയിൽ 0.314-ൽനിന്ന് 0.284 ആയും കുറഞ്ഞു (ഈ സൂചിക പൂജ്യത്തോട് അടുക്കുന്തോറും അസമത്വം കുറവാണെന്നാണ് അർത്ഥം).
2. ദാരിദ്ര്യ നിർമാർജനത്തിലെ നേട്ടം: നിതി ആയോഗിന്റെ മൾട്ടിഡൈമൻഷണൽ പോവർട്ടി ഇൻഡക്‌സ് റിപ്പോർട്ട് പ്രകാരം രാജ്യത്ത് 13.5 കോടി ജനങ്ങൾ ദാരിദ്ര്യരേഖയ്ക്ക് മുകളിലേക്ക് ഉയർന്നു. ബഹുമാനദണ്ഡ ദാരിദ്ര്യം 24.85 ശതമാനത്തിൽനിന്ന് 14.96 ശതമാനമായി കുറഞ്ഞു.
3. തൊഴിലില്ലായ്മ നിരക്ക് ഇടിഞ്ഞു: പീരിയോഡിക് ലേബർ ഫോഴ്സ് സർവേ പ്രകാരം 15 വയസ്സിന് മുകളിലുള്ളവരുടെ തൊഴിലില്ലായ്മ നിരക്ക് 2022-ലെ 3.6 ശതമാനത്തിൽനിന്ന് 2025-ഓടെ 3.1 ശതമാനമായി കുറഞ്ഞിട്ടുണ്ട്.

ഉയർന്ന വരുമാനക്കാർക്ക് സർചാർജും പുരോഗമന നികുതി വ്യവസ്ഥയും | Billionaires in India list

അതിസമ്പന്നരിൽനിന്ന് ഉയർന്ന നികുതി ഈടാക്കി അത് അടിസ്ഥാന സൗകര്യ വികസനത്തിനും ക്ഷേമപദ്ധതികൾക്കും വിനിയോഗിക്കുന്ന ‘പ്രോഗ്രസീവ് ടാക്‌സ്’ വ്യവസ്ഥയാണ് ഇന്ത്യയിൽ നിലനിൽക്കുന്നതെന്ന് സർക്കാർ വ്യക്തമാക്കി. ഉയർന്ന വരുമാനക്കാർക്കായി നിലവിലുള്ള സ്ലാബ് നിരക്കുകൾക്ക് പുറമെ അധിക ‘സർചാർജ്’ ഈടാക്കുന്നുണ്ട്. 50 ലക്ഷത്തിന് മുകളിൽ വരുമാനമുള്ളവരിൽ ആരംഭിച്ച്, കോടികൾ വരുമാനമുള്ളവർക്ക് ഉയർന്ന നിരക്കിൽ സർചാർജ് ചുമത്തുന്നു. ഈ തുക സൗജന്യ റേഷൻ, സൗജന്യ വൈദ്യസഹായം(ആയുഷ്മാൻ ഭാരത്), പാർപ്പിട പദ്ധതികൾ(പി.എം.എ.വൈ), കർഷകർക്കുള്ള ധനസഹായം(പി.എം കിസാൻ) എന്നിവയ്ക്കായി വിനിയോഗിക്കുന്നതിലൂടെ സമ്പത്തിന്റെ പുനർവിതരണം സാധ്യമാകുന്നുണ്ടെന്ന് കേന്ദ്ര ധനമന്ത്രാലയം കൂട്ടിച്ചേർത്തു.

ഇന്ത്യൻ ഓഹരി വിപണിയിലുണ്ടായ അഭൂതപൂർവമായ മുന്നേറ്റവും, ഡിജിറ്റൽ സ്റ്റാർട്ടപ്പുകളുടെ വളർച്ചയും, ആഗോളതലത്തിൽ ഇന്ത്യൻ കോർപറേറ്റുകൾ കൈവരിച്ച വ്യാവസായിക നേട്ടങ്ങളുമാണ് വരുമാനം 100 കോടി കടന്നവരുടെ എണ്ണത്തിൽ ഉണ്ടായ ഈ നാലുമടങ്ങ് വർധനയ്ക്കു പ്രധാന കാരണമായി സാമ്പത്തിക വിശകലന വിദഗ്ധർ വിലയിരുത്തുന്നത്.

ഹൂറൂൺ, ഫോർബ്സ് പട്ടികകളിലെ ഇന്ത്യൻ അതിസമ്പന്നർ | Billionaires in India list

സർക്കാരിന്റെ ആദായനികുതി കണക്കുകൾക്ക് പുറമെ ആഗോള ഏജൻസികളായ ഹൂറൂണും ഫോർബ്സും ഇന്ത്യയിലെ ശതകോടീശ്വരന്മാരുടെ പട്ടിക പുറത്തുവിട്ടിട്ടുണ്ട്. ഹൂറൂൺ ഗ്ലോബൽ റിച്ച് ലിസ്റ്റ് റിപ്പോർട്ട് പ്രകാരം ഇന്ത്യയിലുള്ള ആകെ ശതകോടീശ്വരന്മാരുടെ എണ്ണം 308 ആണ്. ഫോർബ്സ് റിയൽ ടൈം പട്ടികയുടെ ഏറ്റവും പുതിയ കണക്കുകൾ പ്രകാരം റിലയൻസ് ഇൻഡസ്ട്രീസ് അധ്യക്ഷൻ മുകേഷ് അംബാനിയാണ്(86.7 ബില്യൺ ഡോളർ) ഇന്ത്യയിലെ ഏറ്റവും വലിയ സമ്പന്നൻ. ഗൗതം അദാനി(85.5 ബില്യൺ ഡോളർ) തൊട്ടുപിന്നിലുണ്ട്. സാവിത്രി ജിന്താലും കുടുംബവുമാണ്(37.5 ബില്യൺ ഡോളർ) മൂന്നാം സ്ഥാനത്തുള്ളത്.

ആദായനികുതി റിട്ടേണുകൾ കൃത്യമായി സമർപ്പിക്കുന്നതിലും സുതാര്യത ഉറപ്പാക്കുന്നതിലും കേന്ദ്ര സർക്കാർ നടപ്പാക്കിയ ഡിജിറ്റൽ പരിഷ്‌കാരങ്ങളും ആദായനികുതി വകുപ്പിന്റെ കർശനമായ നിരീക്ഷണ സംവിധാനങ്ങളും കാരണം ഉയർന്ന വരുമാനം മറച്ചുവയ്ക്കാനാവാതെ കൃത്യമായി കണക്കുകളിൽ കാണിക്കാൻ അതിസമ്പന്നർ നിർബന്ധിതരാകുന്നുണ്ടെന്നതും ഈ കണക്കുകളിലെ വർധനയ്ക്കു ഒരു പ്രധാന ഘടകമായി ചൂണ്ടിക്കാട്ടുന്നവരുണ്ട്.