‘പരീക്ഷാ മാഫിയകളെ വെറുതെ വിടില്ല’; പൊതുപരീക്ഷാ ബിൽ പാസായതിന് പിന്നാലെ പുതിയ ഇൻസ്റ്റഗ്രാം വീഡിയോയുമായി മോദി
ന്യൂഡൽഹി: പരീക്ഷാ ക്രമക്കേടുകൾ തടയുന്നതിനുള്ള പൊതുപരീക്ഷാ ഭേദഗതി ബിൽ പാർലമെന്റിന്റെ ഇരുസഭകളും പാസാക്കിയതിന് പിന്നാലെ വിദ്യാർത്ഥികളെ അഭിസംബോധന ചെയ്ത് ഇൻസ്റ്റഗ്രാം വീഡിയോയുമായി പ്രധാനമന്ത്രി നരേന്ദ്ര മോദി. പുതിയ നിയമം നിലവിൽ വരുന്നതോടെ രാജ്യത്തെ പരീക്ഷാ സംവിധാനം കൂടുതൽ കരുത്തുറ്റതും സുതാര്യവുമാകുമെന്ന് അദ്ദേഹം പറഞ്ഞു. ചോദ്യപേപ്പർ ചോർച്ചയുൾപ്പെടെയുള്ള ക്രമക്കേടുകൾ ഇല്ലാതാക്കാൻ പുതിയ ബിൽ നിർണായക പങ്കുവഹിക്കുമെന്നും പ്രധാനമന്ത്രി വ്യക്തമാക്കി.
യുവജനങ്ങളോട് നേരിട്ട് സംസാരിക്കുന്ന രീതിയിലാണ് പ്രധാനമന്ത്രി വീഡിയോ പങ്കുവെച്ചിരിക്കുന്നത്. വിദ്യാർത്ഥികളുടെ ഭാവി തകർക്കുന്ന പരീക്ഷാ മാഫിയകളെ ഒരു കാരണവശാലും വെറുതെ വിടില്ലെന്ന് അദ്ദേഹം കർശന മുന്നറിയിപ്പ് നൽകി. ചോദ്യപ്പേപ്പർ ചോർച്ചയ്ക്കും മറ്റ് ക്രമക്കേടുകൾക്കും പിന്നിൽ പ്രവർത്തിക്കുന്ന ഇത്തരം മാഫിയകൾക്കെതിരെ രാജ്യം ഒന്നടങ്കം ഒറ്റക്കെട്ടായി പോരാടേണ്ട സമയമാണിതെന്നും പ്രധാനമന്ത്രി ഓർമ്മിപ്പിച്ചു.
പാർലമെന്റിന്റെ ഇരുസഭകളിലും വിശദമായ ചർച്ചകൾക്ക് ശേഷമാണ് ഈ ബിൽ പാസാക്കിയതെന്ന് അദ്ദേഹം കൂട്ടിച്ചേർത്തു. പരീക്ഷാ ക്രമക്കേടുകൾ തടയാൻ ഇതിനകം തന്നെ രൂപീകരിച്ചിട്ടുള്ള ടാസ്ക് ഫോഴ്സുകളും അതിവേഗ കോടതികളും, അതോടൊപ്പം ഈ പുതിയ നിയമവും കൂടി ചേരുന്നതോടെ കുറ്റക്കാർക്കെതിരെ ശക്തമായ നടപടികൾ ഉറപ്പാക്കാൻ സാധിക്കുമെന്നും പ്രധാനമന്ത്രി വീഡിയോയിൽ പറഞ്ഞു.
