കൊൽക്കത്തയിലെ ഹോട്ടലിൽ വൻ തീപിടിത്തം: ഒരു കുട്ടിയുൾപ്പെടെ 9 പേർ മരിച്ചു; എസി പൊട്ടിത്തെറിച്ചതെന്ന് സംശയം

കൊൽക്കത്ത: കൊൽക്കത്ത നഗരത്തിലെ തിരക്കേറിയ ഫ്രീ സ്‌കൂൾ സ്ട്രീറ്റിലെ ഹോട്ടലിലുണ്ടായ വൻ തീപിടിത്തത്തിൽ ഒരു കുട്ടി ഉൾപ്പെടെ ഒമ്പത് പേർ മരിച്ചു. പുലർച്ചെ രണ്ട് മണിയോടെയാണ് അപകടമുണ്ടായത്. പുക ഉയർന്നതിനെ തുടർന്ന് ഹോട്ടലിലുണ്ടായിരുന്ന ആറ് പേർക്ക് പരിക്കേൽക്കുകയും 28 പേരെ രക്ഷപ്പെടുത്തുകയും ചെയ്തു.

ഹോട്ടലിലെ എസി പൊട്ടിത്തെറിച്ചതാണ് തീപിടിത്തത്തിന് കാരണമെന്നാണ് പ്രാഥമിക സംശയം. ചികിത്സ ആവശ്യങ്ങൾക്കായി കൊൽക്കത്തയിലെത്തിയ ബംഗ്ലദേശ് പൗരന്മാരാണ് അപകടത്തിൽ മരിച്ചതെന്നാണ് ലഭ്യമാകുന്ന വിവരം. നിലവിൽ തീ നിയന്ത്രണവിധേയമാക്കിയിട്ടുണ്ട്.

രണ്ട് ദിവസങ്ങൾക്ക് മുൻപ് ബംഗാളിലെ ബിർഭും ജില്ലയിലെ താരാപീഠ് ക്ഷേത്രത്തിനടുത്തുള്ള അഞ്ച് നില ഹോട്ടലിലും സമാനമായ രീതിയിൽ തീപിടിത്തമുണ്ടായിരുന്നു. താഴത്തെ നിലയിൽ പുലർച്ചെ 4:30 ഓടെയുണ്ടായ ആ അപകടത്തിൽ എട്ട് പേർ മരിക്കുകയും നിരവധി പേർക്ക് പരിക്കേൽക്കുകയും ചെയ്തിരുന്നു.