മെസ്സിയുടെ പിൻഗാമിയായി മകൻ വരുന്നു? ഇന്റർ മയാമി അക്കാദമിയെ കിരീടത്തിലേക്ക് നയിച്ച് ജൂനിയർ മെസ്സി
മയാമി: ഫുട്ബോൾ ഇതിഹാസം ലയണൽ മെസ്സിയുടെ പാത പിന്തുടർന്ന് മകൻ മാറ്റിയോ മെസ്സിയും. ഇന്റർ മയാമി അക്കാദമി ടീമിനെ നാപ്പിൾസ് കപ്പിൽ കിരീടത്തിലേക്ക് നയിച്ചിരിക്കുകയാണ് മെസ്സിയുടെ രണ്ടാമത്തെ മകനായ മാറ്റിയോ. പതിനൊന്നുകാരനായ മാറ്റിയോ കിരീടവുമായി നിൽക്കുന്ന വീഡിയോ പ്രമുഖ സ്പാനിഷ് കായിക മാധ്യമമായ ‘മാർക്ക’ സമൂഹമാധ്യമങ്ങളിൽ പങ്കുവെച്ചിട്ടുണ്ട്. ലോകമെമ്പാടുമുള്ള ഫുട്ബോൾ ആരാധകർ വലിയ ആവേശത്തോടെയാണ് ഈ വീഡിയോ ഏറ്റെടുത്തിരിക്കുന്നത്. നിരവധി പേരാണ് ജൂനിയർ മെസ്സിയെ അഭിനന്ദിച്ച് പോസ്റ്റുകൾ പങ്കുവെക്കുന്നത്.
വരുന്ന സെപ്റ്റംബർ 11-ന് മാറ്റിയോ തന്റെ പതിനൊന്നാം ജന്മദിനം ആഘോഷിക്കാൻ ഒരുങ്ങുകയാണ്. ഇതിന് മുന്നോടിയായി ലഭിച്ച ഈ കിരീടവിജയം മാറ്റിയോയ്ക്ക് ഇരട്ടിമധുരമായി. പതിമൂന്നുകാരനായ തിയാഗോയാണ് മെസ്സിയുടെ മൂത്ത മകൻ. ഇളയ മകൻ സിറോയ്ക്ക് എട്ട് വയസ്സാണ് പ്രായം.
മെസ്സിയുടെ മൂന്ന് മക്കളും നിലവിൽ ഇന്റർ മയാമി യൂത്ത് അക്കാദമിയിലൂടെയാണ് തങ്ങളുടെ ഫുട്ബോൾ കരിയർ പടുത്തുയർത്തുന്നത്. ഇന്റർ മയാമിയുടെ അണ്ടർ-12 ടീം അംഗമായ തിയാഗോ മികച്ചൊരു മിഡ്ഫീൽഡറാണ്. എന്നാൽ മാറ്റിയോ കളിക്കുന്നത് മുന്നേറ്റനിരയിലാണ്. അച്ഛനെ അനുസ്മരിപ്പിക്കുന്ന രീതിയിൽ കൃത്യതയോടെ ഫ്രീ കിക്കുകൾ ഗോളാക്കാൻ മിടുക്കനായ ഇളയമകൻ സിറോ അണ്ടർ-8 ടീമംഗമാണ്.
അതേസമയം, അന്താരാഷ്ട്ര ഫുട്ബോളിൽ നിന്ന് വിരമിക്കൽ പ്രഖ്യാപിച്ച മെസ്സി ഇനി ഇന്റർ മയാമിയുടെ കുപ്പായത്തിൽ മാത്രമേ കളത്തിൽ ഇറങ്ങുകയുള്ളൂ. അർജന്റീന ദേശീയ ടീമിനായി തനിക്കിനി ഒന്നും നൽകാനില്ലെന്നും അദ്ദേഹം അടുത്തിടെ വ്യക്തമാക്കിയിരുന്നു.
