എസ്എഫ്ഐ പ്രവർത്തകർക്കെതിരായ പോലീസ് നടപടി; യുഡിഎഫ് സർക്കാരിന്റെ സംഘപരിവാർ പ്രീണനം അവസാനിപ്പിക്കാൻ ഇടപെടണമെന്ന് ആവശ്യപ്പെട്ട് ഖാർഗെയ്ക്ക് കത്തയച്ച് പിണറായി വിജയൻ
തിരുവനന്തപുരം: സംസ്ഥാനത്ത് എസ്എഫ്ഐ പ്രവർത്തകർക്ക് നേരെ നടക്കുന്ന പോലീസ് നടപടികളിലും യുഡിഎഫ് സർക്കാരിന്റെ സംഘപരിവാർ അനുകൂല നയങ്ങളിലും പ്രതിഷേധം രേഖപ്പെടുത്തി പ്രതിപക്ഷ നേതാവ് പിണറായി വിജയൻ എ.ഐ.സി.സി അധ്യക്ഷൻ മല്ലികാർജുൻ ഖാർഗെയ്ക്ക് കത്തയച്ചു. ദേശീയതലത്തിൽ കോൺഗ്രസ് വിദ്യാർത്ഥി പ്രക്ഷോഭങ്ങളെ പിന്തുണയ്ക്കുകയും കേന്ദ്ര സർക്കാരിന്റെയും ഡൽഹി പോലീസിന്റെയും അടിച്ചമർത്തലുകളെ ശക്തമായി എതിർക്കുകയും ചെയ്യുമ്പോൾ, കേരളത്തിലെ കോൺഗ്രസ് സർക്കാർ തികച്ചും ഫാസിസ്റ്റ് ശൈലിയിലാണ് വിദ്യാർത്ഥികളെ നേരിടുന്നതെന്ന് അദ്ദേഹം കത്തിൽ ചൂണ്ടിക്കാട്ടി.
വന്ദേമാതരം പൂർണ്ണമായും ആലപിക്കുന്നതുമായി ബന്ധപ്പെട്ട് കേരള സർവകലാശാലയ്ക്ക് മുന്നിൽ സമാധാനപരമായി പ്രതിഷേധിച്ച വിദ്യാർത്ഥികൾക്ക് നേരെ യാതൊരു പ്രകോപനവുമില്ലാതെയാണ് പോലീസ് ക്രൂരമായി ലാത്തിച്ചാർജ് നടത്തിയത്. പെൺകുട്ടികളെ നേരിടാൻ വനിതാ പോലീസുകാർ ഇല്ലാതിരുന്നതും ആൺ പോലീസുകാർ അവരെ ആക്രമിച്ചതും കടുത്ത നിയമലംഘനമാണെന്നും പിണറായി വിജയൻ വ്യക്തമാക്കി.
ബഹുസ്വര സമൂഹത്തെയും ഭരണഘടനാ മൂല്യങ്ങളെയും സംരക്ഷിക്കുന്നതിന്റെ ഭാഗമായി, സ്വാതന്ത്ര്യ സമര കാലം മുതൽക്കേ വന്ദേമാതരത്തിന്റെ ആദ്യ രണ്ട് ശ്ലോകങ്ങൾ മാത്രം ആലപിക്കുക എന്നൊരു സമവായം രാജ്യത്തുണ്ട്. എൺപത് വർഷത്തിലേറെയായി നിലനിൽക്കുന്ന ഈ രീതി തകർത്ത് ഗാനം പൂർണ്ണമായും പാടാൻ സംഘപരിവാർ നിർബന്ധിക്കുമ്പോൾ, കേരളത്തിലെ കോൺഗ്രസ് സർക്കാരും അതേ നിലപാട് തന്നെയാണ് സ്വീകരിക്കുന്നത്. എ.ഐ.സി.സി ആസ്ഥാനത്ത് വന്ദേമാതരം പൂർണ്ണമായും പാടിയതിൽ സോണിയ ഗാന്ധി പോലും അതൃപ്തി പ്രകടിപ്പിച്ചിരുന്നുവെങ്കിലും, കേരളത്തിലെ സർക്കാർ സംഘപരിവാറിനെ പ്രീണിപ്പിക്കാനാണ് ശ്രമിക്കുന്നതെന്ന് അദ്ദേഹം കുറ്റപ്പെടുത്തി.
ഇതിനുപുറമെ, സർവകലാശാല നിയമത്തിൽ യു.ജി.സി ചട്ടങ്ങൾക്കനുസരിച്ച് ഭേദഗതി വരുത്താമെന്ന് കോടതിയിൽ സമ്മതിച്ചതിലൂടെ സർവകലാശാലകളുടെ പൂർണ്ണ അധീശത്വം ഗവർണർക്ക് വിട്ടുകൊടുക്കുന്ന സമീപനമാണ് സർക്കാർ സ്വീകരിച്ചിരിക്കുന്നത്. സർവകലാശാലകളെ കൈപ്പിടിയിലാക്കാനുള്ള കേന്ദ്ര സർക്കാരിന്റെയും സംഘപരിവാറിന്റെയും ശ്രമങ്ങൾക്ക് സംസ്ഥാന സർക്കാർ പൂർണ്ണമായും കീഴടങ്ങുന്നതിന്റെ തെളിവാണിതെന്ന് കത്തിൽ പറയുന്നു. ഈ സാഹചര്യത്തിൽ, കേരളത്തിലെ കോൺഗ്രസ് നേതൃത്വത്തിന്റെ സംഘപരിവാർ പ്രീണന നയങ്ങൾ അവസാനിപ്പിക്കാനും വിദ്യാർത്ഥികൾക്ക് നേരെയുള്ള പോലീസ് അതിക്രമങ്ങളിൽ നിന്ന് അവരെ പിന്തിരിപ്പിക്കാനും എ.ഐ.സി.സി അധ്യക്ഷൻ അടിയന്തരമായി ഇടപെടണമെന്നും പിണറായി വിജയൻ ആവശ്യപ്പെട്ടു.
