76-ാം വയസ്സിലും പ്രധാനമന്ത്രിയെ ഫിറ്റാക്കി നിർത്തുന്നത് ലളിതമായ ഭക്ഷണശീലങ്ങൾ; മോദിയുടെ ഡയറ്റ് രഹസ്യങ്ങൾ ഇങ്ങനെ

ന്യൂഡൽഹി: പ്രധാനമന്ത്രി നരേന്ദ്ര മോദി 76-ാം ജന്മദിനം ആഘോഷിക്കുമ്പോൾ അദ്ദേഹത്തിന്റെ ആരോഗ്യവും ശാരീരികക്ഷമതയും വീണ്ടും വലിയ ചർച്ചയാവുകയാണ്. ചിട്ടയായ യോഗയും വ്യായാമങ്ങളും നീണ്ട ജോലി സമയവുമൊക്കെ അദ്ദേഹത്തിന്റെ ദിനചര്യയുടെ ഭാഗമാണെങ്കിലും, ഭക്ഷണകാര്യത്തിൽ അദ്ദേഹം പിന്തുടരുന്നത് ആരെയും അത്ഭുതപ്പെടുത്തുന്ന വിധം ലളിതമായ രീതികളാണ്.

സങ്കീർണ്ണമായ ഡയറ്റ് ചാർട്ടുകൾക്ക് പകരം പരമ്പരാഗത ഇന്ത്യൻ വിഭവങ്ങളും വീട്ടിലുണ്ടാക്കുന്ന നാടൻ ഭക്ഷണങ്ങളും ഉപവാസങ്ങളുമാണ് അദ്ദേഹത്തിന്റെ ആരോഗ്യത്തിന്റെ പ്രധാന അടിത്തറ. 2020-ൽ പ്രമുഖ ന്യൂട്രീഷനിസ്റ്റ് രുജുത ദിവേക്കറുമായി നടത്തിയ ‘ഫിറ്റ് ഇന്ത്യ ഡയലോഗിൽ’ താൻ ആഴ്ചയിൽ ഒന്നോ രണ്ടോ തവണ മുരിങ്ങയില കൊണ്ടുള്ള പറാത്ത ഉണ്ടാക്കി കഴിക്കാറുണ്ടെന്ന് മോദി വെളിപ്പെടുത്തിയിരുന്നു.

നാരുകളും വിറ്റാമിനുകളും ധാതുക്കളും ധാരാളമായി അടങ്ങിയ മുരിങ്ങയിലയെ ദൈനംദിന ഭക്ഷണത്തിന്റെ ഭാഗമാക്കുന്ന ലളിതമായ രീതിയാണിത്. ഒപ്പം, താൻ മഞ്ഞൾ കഴിക്കുന്നുണ്ടോ എന്ന് അമ്മ സ്ഥിരമായി ചോദിക്കാറുണ്ടായിരുന്ന കാര്യവും അദ്ദേഹം അന്ന് ഓർത്തെടുത്തിരുന്നു. സംസ്കരിച്ച പാക്കറ്റ് ഭക്ഷണങ്ങൾ പരമാവധി ഒഴിവാക്കി വീട്ടിൽ തയാറാക്കുന്ന ചോറ്, പരിപ്പ്, റൊട്ടി, പച്ചക്കറികൾ, പോഹ, ഉപ്പുമാവ്, നെയ്യ് തുടങ്ങിയ സാധാരണ വിഭവങ്ങൾക്കാണ് അദ്ദേഹം എപ്പോഴും മുൻഗണന നൽകുന്നത്.

ഭക്ഷണക്രമത്തോടൊപ്പം തന്നെ ഉപവാസവും അദ്ദേഹത്തിന്റെ ജീവിതത്തിന്റെ അവിഭാജ്യ ഘടകമാണ്. കഴിഞ്ഞ വർഷം ലെക്സ് ഫ്രിഡ്മാനുമായുള്ള അഭിമുഖത്തിൽ തന്റെ കഠിനമായ വ്രതാനുഷ്ഠാനങ്ങളെക്കുറിച്ച് പ്രധാനമന്ത്രി വിശദമായി സംസാരിച്ചിരുന്നു. ജൂൺ പകുതി മുതൽ ദീപാവലി വരെയുള്ള മാസങ്ങളിൽ നീണ്ടുനിൽക്കുന്ന ചാതുർമാസ്യ കാലത്ത് 24 മണിക്കൂറിൽ ഒരിക്കൽ മാത്രമേ അദ്ദേഹം ഭക്ഷണം കഴിക്കാറുള്ളൂ. സെപ്റ്റംബർ-ഒക്ടോബർ മാസങ്ങളിലെ നവരാത്രി വ്രതകാലത്ത് ഒമ്പത് ദിവസവും പൂർണ്ണമായും ഭക്ഷണം ഉപേക്ഷിച്ച് ചൂടുവെള്ളം മാത്രം കുടിച്ചാണ് അദ്ദേഹം കഴിയുന്നത്.

എന്നാൽ ചൈത്ര നവരാത്രിയിൽ ഒമ്പത് ദിവസവും ദിവസത്തിൽ ഒരിക്കൽ ഏതെങ്കിലും ഒരു പ്രത്യേക പഴം മാത്രം കഴിക്കുന്ന മറ്റൊരു രീതിയാണ് പിന്തുടരുന്നത്; ഉദാഹരണത്തിന് പപ്പായയാണ് തിരഞ്ഞെടുക്കുന്നതെങ്കിൽ ആ ഒമ്പത് ദിവസവും പപ്പായ മാത്രമായിരിക്കും കഴിക്കുക. കഴിഞ്ഞ 50 മുതൽ 55 വർഷമായി മുടങ്ങാതെ താൻ ഈ ഉപവാസ ശീലങ്ങൾ പിന്തുടരുന്നുണ്ടെന്നും പ്രധാനമന്ത്രി വ്യക്തമാക്കിയിരുന്നു. ചെറുപ്പകാലം മുതലേ ശീലിച്ച ചൂടുവെള്ളം കുടിക്കുന്ന പതിവും പ്രാദേശികമായി ലഭിക്കുന്ന ഇന്ത്യൻ ഭക്ഷണങ്ങൾ കഴിക്കുന്നതുമാണ് പ്രായത്തെ തോൽപ്പിച്ച് മുന്നേറാൻ പ്രധാനമന്ത്രിക്ക് കരുത്തേകുന്നത്.