സൊഹൈൽ ഖാന്റെ വീട്ടിൽ ഗണേശോത്സവം; ഗണപതിക്ക് ആരതിയുഴിഞ്ഞ് സൽമ ഖാൻ, സഹോദരങ്ങൾക്കൊപ്പം പൂജയിൽ പങ്കുചേർന്ന് സൽമാൻ ഖാനും

മുംബൈ: ബോളിവുഡ് നടൻ സൊഹൈൽ ഖാന്റെ വീട്ടിൽ ഗണേശ ചതുർത്ഥി ആഘോഷങ്ങൾക്ക് തുടക്കം. ഗണേശോത്സവത്തിന്റെ ഭാഗമായി സൊഹൈൽ ഖാൻ തന്റെ വീട്ടിലേക്ക് ഗണപതി ഭഗവാനെ ആചാരപൂർവ്വം വരവേറ്റു. കുടുംബാംഗങ്ങളായ അർപ്പിത ഖാൻ ശർമ്മ, അൽവീര ഖാൻ അഗ്നിഹോത്രി, ഇവരുടെ മാതാവ് സൽമ ഖാൻ എന്നിവർ പൂജാ ചടങ്ങുകളിൽ പങ്കെടുത്തു.

ഖാൻ കുടുംബത്തിന്റെ ഗണേശ ചതുർത്ഥി ആഘോഷങ്ങളുടെ നിരവധി ചിത്രങ്ങളും വീഡിയോകളും ഇതിനോടകം സമൂഹ മാധ്യമങ്ങളിൽ വ്യാപകമായി പ്രചരിക്കുന്നുണ്ട്. സൊഹൈലിന്റെ വീട്ടിൽ വെച്ച് സൽമാൻ ഖാന്റെ അമ്മ സൽമ ഖാൻ ഗണപതിക്ക് മുന്നിൽ ആരതി ഉഴിയുന്ന ദൃശ്യങ്ങളും പുറത്തുവന്ന വീഡിയോകളിലുണ്ട്. പരമ്പരാഗത വസ്ത്രങ്ങൾ ധരിച്ചാണ് സഹോദരിമാരായ അർപ്പിതയും അൽവീരയും സഹോദരൻ സൊഹൈലിന്റെ വസതിയിലെത്തിയത്. കുടുംബാംഗങ്ങൾ എല്ലാവരും ഒത്തുചേർന്ന് പ്രാർത്ഥനകളോടെയാണ് ഗണപതിയെ വരവേറ്റത്.

പൂജ നടക്കുന്ന സമയത്ത് സൽമാൻ ഖാൻ കുടുംബത്തോടൊപ്പം ഉണ്ടായിരുന്നില്ലെങ്കിലും, വൈകുന്നേരം സൊഹൈലിന്റെ വീട്ടിൽ നടക്കുന്ന ആരതിയിൽ താരം പങ്കെടുത്തതായാണ് വിവരം. വർഷങ്ങളായി ഗണേശ ചതുർത്ഥി ദിനങ്ങളിൽ ഖാൻ കുടുംബം ഒന്നിച്ചുകൂടാറുണ്ട്. പരസ്പര ഐക്യത്തോടും ഭക്തിയോടും കൂടി ഏറെ സവിശേഷമായാണ് അവർ എല്ലാ വർഷവും ഈ ഉത്സവം ആഘോഷിക്കാറുള്ളത്. കഴിഞ്ഞ വർഷം സഹോദരി അർപ്പിതയുടെ വീട്ടിൽ നടന്ന ഗണേശ ആരതിയിലാണ് സൽമാൻ ഖാൻ പങ്കെടുത്തത്.

അർപ്പിത ഖാൻ ശർമ്മ എല്ലാ വർഷവും വീട്ടിൽ ഗണപതി വിഗ്രഹം പ്രതിഷ്ഠിക്കാറുണ്ട്. ഗണേശോത്സവ നാളുകളിൽ സൽമാൻ ഖാന്റെ കുടുംബം എപ്പോഴും മാധ്യമശ്രദ്ധ നേടാറുണ്ട്. സൊഹൈൽ ഖാന്റെയും അർപ്പിത ഖാന്റെയും വീടുകളിലാണ് ഗണപതി വിഗ്രഹങ്ങൾ പ്രതിഷ്ഠിക്കാറുള്ളത്. തുടർന്ന് നടക്കുന്ന വിഗ്രഹ നിമജ്ജന ചടങ്ങുകളിലും കുടുംബം മുഴുവൻ ഒന്നിച്ചെത്താറുണ്ട്. 2024-ൽ വാരിയെല്ലിന് പരിക്കേറ്റിരുന്നിട്ടും സൽമാൻ ഖാൻ സഹോദരിയുടെ ഗണപതി നിമജ്ജന ചടങ്ങുകളിൽ ആവേശത്തോടെ നൃത്തം ചെയ്ത് പങ്കെടുത്തിരുന്നു. വിഗ്രഹ പ്രതിഷ്ഠ മുതൽ നിമജ്ജനം വരെയുള്ള ഗണേശോത്സവത്തിന്റെ എല്ലാ ഘട്ടങ്ങളിലും സൽമാൻ ഖാൻ സജീവമായി പങ്കുചേരാറുണ്ട്.