പശുവിന്റെ പേരിൽ വീണ്ടും കൊല; പശുമോഷണം ആരോപിച്ച് ത്രിപുരയിൽ മുസ്ലിം യുവാവിനെ ആൾക്കൂട്ടം തല്ലിക്കൊന്നു
ത്രിപുര: ത്രിപുരയിലെ ഖോവായ് ജില്ലയിൽ പശുവിനെ മോഷ്ടിച്ചെന്ന സംശയത്തെ തുടർന്ന് 45-കാരനായ മുസ്ലിം യുവാവിനെ ആൾക്കൂട്ടം ക്രൂരമായി മർദ്ദിച്ചു കൊലപ്പെടുത്തി. കല്യാൺപൂർ പോലീസ് സ്റ്റേഷൻ പരിധിയിലുള്ള ബാഗ്ബർ പ്രദേശത്താണ് ഈ ദാരുണമായ സംഭവം നടന്നത്. കല്യാൺപൂരിലെ ഗിലാതലി ബസാർ സ്വദേശിയും കന്നുകാലി വ്യാപാരിയുമായ ജലീൽ റഹ്മാൻ ആണ് കൊല്ലപ്പെട്ടത്.
ഗ്രാമവാസികളിൽ ഒരാൾ പശുമോഷണം നടക്കുന്നുവെന്ന് പുലർച്ചെ മുന്നറിയിപ്പ് നൽകിയതിനെ തുടർന്നാണ് ഒരു കൂട്ടം ആളുകൾ ഇദ്ദേഹത്തെ തടഞ്ഞുനിർത്തി ക്രൂരമായി മർദ്ദിച്ചതെന്നാണ് പോലീസ് നൽകുന്ന വിവരം. എന്നാൽ താൻ നിയമപരമായി വിലകൊടുത്തു വാങ്ങിയ പശുവുമായി വീട്ടിലേക്ക് മടങ്ങുകയായിരുന്നു ജലീൽ റഹ്മാൻ എന്ന് അദ്ദേഹത്തിന്റെ കുടുംബം പറയുന്നു. മർദ്ദനത്തിന് ശേഷം അക്രമികൾ തന്നെ പോലീസിൽ വിവരമറിയിക്കുകയായിരുന്നു. പോലീസ് സ്ഥലത്തെത്തുമ്പോൾ ഗുരുതരമായി പരിക്കേറ്റ നിലയിലായിരുന്നു അദ്ദേഹം. ഉടൻ തന്നെ അദ്ദേഹത്തെ കല്യാൺപൂർ ആശുപത്രിയിൽ എത്തിച്ചെങ്കിലും ഡോക്ടർമാർ മരണം സ്ഥിരീകരിക്കുകയായിരുന്നു.
പോസ്റ്റ്മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുനൽകി. ഈ കൊലപാതകത്തിൽ പങ്കുള്ളവരെ തിരിച്ചറിയാനും ഇതിന് പിന്നിലെ യഥാർത്ഥ വസ്തുതകൾ കണ്ടെത്താനുമായി പോലീസ് വിശദമായ അന്വേഷണം ആരംഭിച്ചിട്ടുണ്ട്. കുറ്റക്കാർക്കെതിരെ കർശന നിയമനടപടി സ്വീകരിക്കണമെന്ന് ആവശ്യപ്പെട്ട് ജലീൽ റഹ്മാന്റെ കുടുംബം പോലീസിൽ ഔദ്യോഗികമായി പരാതി നൽകിയിട്ടുണ്ട്.
