ഫ്രാൻസിൽ വിദ്യാർത്ഥി പ്രക്ഷോഭം ശക്തമാകുന്നു; സ്‌കൂളുകൾക്ക് തീയിട്ട് സമരക്കാർ; 500-ഓളം സ്‌കൂളുകള്‍ അടച്ചിടുമെന്ന് വിദ്യാഭ്യാസ മന്ത്രി
പാരീസ്: സ്‌കൂളുകളുടെ അടിസ്ഥാന സൗകര്യമില്ലായ്മയിലും മോശം അവസ്ഥയിലും പ്രതിഷേധിച്ച് ഫ്രാൻസിൽ വിദ്യാർത്ഥി പ്രക്ഷോഭം കൂടുതൽ ശക്തമാകുന്നു. പ്രതിഷേധം അക്രമാസക്തമായതോടെ തിങ്കളാഴ്ച രാജ്യത്തുടനീളമുള്ള 400 മുതൽ 500 വരെ ഹൈസ്‌കൂളുകൾ ഭാഗികമായോ പൂർണ്ണമായോ അടച്ചിടുമെന്ന് വിദ്യാഭ്യാസ മന്ത്രി എഡ്വാർഡ് ഗെഫ്രെ അറിയിച്ചു. വിദ്യാർത്ഥികളുടെയും ജീവനക്കാരുടെയും സുരക്ഷ ഉറപ്പാക്കാൻ കഴിയാത്ത സാഹചര്യത്തിലാണ് ഈ കടുത്ത നടപടിയെന്ന് അദ്ദേഹം വ്യക്തമാക്കി.
പാരീസിൽ ആരംഭിച്ച വിദ്യാർത്ഥി പ്രതിഷേധം അതിവേഗം രാജ്യത്തിന്റെ മറ്റ് ഭാഗങ്ങളിലേക്കും വ്യാപിക്കുകയായിരുന്നു. പ്രക്ഷോഭകർ ഇതിനോടകം ഇരുപതിലധികം സ്‌കൂളുകൾക്ക് തീയിടുകയും വലിയ തോതിൽ നാശനഷ്ടങ്ങൾ വരുത്തുകയും ചെയ്തിട്ടുണ്ട്. അക്രമസംഭവങ്ങളിൽ വിദ്യാഭ്യാസ മേഖലയിലെ എൺപതോളം ജീവനക്കാർക്ക് പരിക്കേറ്റതായാണ് റിപ്പോർട്ടുകൾ. പലയിടത്തും വിദ്യാർത്ഥികൾ സ്‌കൂളുകളുടെ പ്രവേശന കവാടങ്ങൾ ഉപരോധിക്കുകയും ക്ലാസുകൾ തടസ്സപ്പെടുത്തുകയും ചെയ്തു. ചില പ്രദേശങ്ങളിൽ പ്രതിഷേധം പോലീസുമായുള്ള രൂക്ഷമായ സംഘർഷത്തിലേക്കും വഴിമാറി.
സ്‌കൂളുകളിലെ അമിതമായ തിരക്ക്, അധ്യാപകരുടെയും പകരക്കാരുടെയും കടുത്ത ക്ഷാമം, അറ്റകുറ്റപ്പണികൾ നടത്താത്ത കാലപ്പഴക്കം ചെന്ന കെട്ടിടങ്ങൾ, സുദീർഘമായ അധ്യയന സമയം എന്നിവയാണ് വിദ്യാർത്ഥികളെ പ്രധാനമായും തെരുവിലിറക്കിയത്. ഇതിന് പുറമെ, ഉഷ്ണതരംഗ സമയത്ത് ക്ലാസ് മുറികളിലെ അസഹനീയമായ ചൂട്, സർവകലാശാലാ പ്രവേശന നടപടികളിലെ അമിത സമ്മർദ്ദം, പിന്നാക്ക മേഖലകളിലെ വിദ്യാഭ്യാസ അസമത്വം തുടങ്ങിയ വിഷയങ്ങളും അവർ ഉന്നയിക്കുന്നുണ്ട്. മതിയായ അധ്യാപകരില്ലാത്തതിനാൽ പല ക്ലാസുകളും നഷ്ടപ്പെട്ടിട്ടും വിദ്യാർത്ഥികളെ പരീക്ഷയെഴുതാൻ അധികൃതർ നിർബന്ധിച്ചതും പ്രതിഷേധത്തിന്റെ ആക്കം കൂട്ടി.
