‘ക്രിസ്റ്റ്യാനോയോട് എന്തിന് മാപ്പ് പറയണം? എനിക്കിഷ്ടമുള്ളവരെ ഞാൻ കളിപ്പിക്കും’: മാധ്യമപ്രവർത്തകന്റെ ചോദ്യത്തിൽ പൊട്ടിത്തെറിച്ച് പോർച്ചുഗൽ പരിശീലകൻ

ലിസ്ബൺ: പോർച്ചുഗൽ ദേശീയ ടീം ക്യാമ്പിൽ നിന്നും സൂപ്പർ താരം ക്രിസ്റ്റ്യാനോ റൊണാൾഡോ മടങ്ങിയതുമായി ബന്ധപ്പെട്ട ചോദ്യങ്ങളിൽ രൂക്ഷമായി പ്രതികരിച്ച് പരിശീലകൻ യൊർഗെ ജെസ്യൂസ്. വാർത്താസമ്മേളനത്തിനിടെ ക്രിസ്റ്റ്യാനോയോട് മാപ്പ് പറയുമോ എന്ന മാധ്യമപ്രവർത്തകന്റെ ചോദ്യമാണ് പരിശീലകനെ പ്രകോപിപ്പിച്ചത്. സംഭവിച്ച കാര്യങ്ങളുടെ ഉത്തരവാദിത്തം തനിക്കാണെങ്കിലും ഇതിൽ മാപ്പ് പറയേണ്ട യാതൊരു കാര്യവുമില്ലെന്ന് അദ്ദേഹം വ്യക്തമാക്കി. താനാണ് ടീമിന്റെ പരിശീലകനെന്നും തനിക്ക് താത്പര്യമുള്ള കളിക്കാരെയാണ് തെരഞ്ഞെടുക്കുകയെന്നും അദ്ദേഹം തുറന്നടിച്ചു.

യുവേഫ നേഷൻസ് ലീഗിൽ നോർവെയ്ക്കെതിരായ മത്സരശേഷമാണ് ജെസ്യൂസ് ഇക്കാര്യങ്ങൾ വിശദീകരിച്ചത്. മാപ്പ് പറയേണ്ട ആവശ്യമില്ലെന്നും ഇതൊരു വലിയ തമാശയാണെന്നുമാണ് അദ്ദേഹം പറഞ്ഞത്. താരത്തെ വാം അപ്പ് ചെയ്യിപ്പിച്ചതിലും പിന്നീട് കളത്തിലിറക്കാതിരുന്നതിലും തനിക്ക് ഉത്തരവാദിത്തമുണ്ട്. എന്നാൽ ഇതിൽ ആരോടാണ് മാപ്പ് പറയേണ്ടതെന്നും അദ്ദേഹം ചോദിച്ചു. ടീമിലേക്ക് ആരെ വിളിക്കണം, ആരെ കളിപ്പിക്കണം എന്ന കാര്യത്തിൽ താൻ ആരോടും അനുവാദം ചോദിക്കാറില്ല. പരിശീലകൻ എന്ന നിലയിൽ വിട്ടുവീഴ്ച ചെയ്യാൻ സാധിക്കാത്ത ചില കാര്യങ്ങളുണ്ടെന്നും ജെസ്യൂസ് വ്യക്തമാക്കി. വാം അപ്പ് ചെയ്തിട്ടും കളിക്കാൻ ഇറങ്ങാൻ കഴിയാത്ത എത്രയോ താരങ്ങൾ അന്ന് ഉണ്ടായിരുന്നുവെന്നും അവരാരും ഇത് ഒരു പ്രശ്നമായി മാറ്റിയിട്ടില്ലെന്നും അദ്ദേഹം ചൂണ്ടിക്കാട്ടി.

അതേസമയം, ദേശീയ ടീമിലേക്ക് ക്രിസ്റ്റ്യാനോയ്ക്ക് ഇനിയും വരാമെന്നും അതിനുള്ള വാതിലുകൾ തുറന്നുകിടക്കുകയാണെന്നും അദ്ദേഹം പറഞ്ഞു. തങ്ങൾക്കിടയിൽ യാതൊരു വിദ്വേഷവുമില്ലെന്നും, നിലവിലുണ്ടായത് എളുപ്പത്തിൽ പരിഹരിക്കാൻ കഴിയുന്ന ഒരു ചെറിയ തെറ്റിദ്ധാരണ മാത്രമാണെന്നും അദ്ദേഹം വിശദീകരിച്ചു. തന്റെ ഭാവി തീരുമാനിക്കേണ്ടത് താരം തന്നെയാണെന്നും അടുത്ത തവണ ടീമിനൊപ്പം ചേരാൻ അദ്ദേഹം ആഗ്രഹിക്കുന്നുണ്ടെങ്കിൽ അതിന് യാതൊരു തടസ്സവുമില്ലെന്നും പരിശീലകൻ കൂട്ടിച്ചേർത്തു. നേഷൻസ് ലീഗിൽ വെയ്ൽസിനെതിരായ മത്സരത്തിൽ കളിച്ച ക്രിസ്റ്റ്യാനോയെ നോർവേക്കെതിരായ മത്സരത്തിൽ വാം അപ്പ് ചെയ്യിച്ചെങ്കിലും കളത്തിലിറക്കിയിരുന്നില്ല. ഇതിനെച്ചൊല്ലി ഇരുവരും തമ്മിൽ അഭിപ്രായവ്യത്യാസങ്ങൾ ഉണ്ടായിരുന്നു. ഇതിന് പിന്നാലെ ഡെൻമാർക്കിനെതിരായ അടുത്ത മത്സരത്തിൽ ക്രിസ്റ്റ്യാനോയ്ക്ക് പകരം ഗോൺസാലോ റാമോസ് ആദ്യ ഇലവനിൽ ഇറങ്ങുമെന്ന് പരിശീലകൻ പ്രഖ്യാപിച്ചതാണ് താരത്തെ ചൊടിപ്പിച്ചതും ക്യാമ്പ് വിടാൻ കാരണമായതും.