ഗ്യാനേഷ് കുമാറിന്റെ രാജി: ലണ്ടനിലെ ഇന്ത്യൻ ഹൈക്കമ്മീഷന് മുന്നിൽ എസ്എഫ്ഐ പ്രതിഷേധം; ബദൽ പ്രതിഷേധവുമായി ബിജെപി അനുകൂലികളും

ലണ്ടൻ: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിഷേധങ്ങൾ രാജ്യത്തിന് പുറത്തേക്കും വ്യാപിക്കുന്നു. ലണ്ടനിലെ ഇന്ത്യൻ ഹൈക്കമ്മീഷൻ ഓഫീസിന് മുന്നിൽ എസ്എഫ്ഐ പ്രവർത്തകർ പ്രതിഷേധ പ്രകടനം നടത്തി. ഇതിനിടെ കേന്ദ്ര സർക്കാരിനെ അനുകൂലിച്ചുകൊണ്ട് ബിജെപി അനുകൂലികളും ഇവിടെ ബദൽ പ്രതിഷേധവുമായി എത്തിയതോടെ സ്ഥലത്ത് നേരിയ സംഘർഷാവസ്ഥ ഉടലെടുത്തു. ഇരുവിഭാഗങ്ങളും കയ്യിൽ ദേശീയ പതാകകളേന്തി പരസ്പരം മുദ്രാവാക്യം വിളികളുമായി രംഗത്തെത്തിയതാണ് സ്ഥിതിഗതികൾ പ്രക്ഷുബ്ധമാക്കിയത്.

അതേസമയം, പ്രമുഖ യൂട്യൂബർ ധ്രുവ് റാഠിയുടെ ആഹ്വാനപ്രകാരം ലണ്ടനിൽ മറ്റൊരു വൻ പ്രതിഷേധവും നടക്കുന്നുണ്ട്. താൻ ലണ്ടനിൽ എത്തിയെന്നും ഇന്ത്യയിലെ വോട്ടുകൊള്ള ലോകം അറിയേണ്ട സമയമായെന്നും ധ്രുവ് റാഠി സമൂഹമാധ്യമങ്ങളിലൂടെ അറിയിച്ചു. ലണ്ടനിലെ പാർലമെന്റ് സ്ക്വയറിലുള്ള മഹാത്മാ ഗാന്ധി പ്രതിമയ്ക്ക് സമീപം ഇന്ത്യൻ സമയം വൈകിട്ടോടെ പ്രതിഷേധത്തിനായി ഒത്തുകൂടാനാണ് അദ്ദേഹം ആഹ്വാനം നൽകിയിട്ടുള്ളത്.

കഴിഞ്ഞയാഴ്ച ഇന്ത്യയിലെത്തിയ ധ്രുവ് റാഠി ബംഗളൂരു ഉൾപ്പെടെയുള്ള വിവിധ നഗരങ്ങളിൽ തെരഞ്ഞെടുപ്പ് കമ്മീഷനെതിരായ സമരങ്ങളിൽ പങ്കാളിയായിരുന്നു. തുടർന്ന് ഹരിയാനയിലെ വസതിയിൽ വെച്ച് പോലീസ് കസ്റ്റഡിയിലെടുത്ത അദ്ദേഹത്തെ 18 മണിക്കൂർ ചോദ്യം ചെയ്ത ശേഷമാണ് വിട്ടയച്ചത്. താൻ പോരാട്ടം അവസാനിപ്പിക്കില്ലെന്നും കമ്മീഷനെതിരായ പ്രതിഷേധം അന്താരാഷ്ട്ര തലത്തിലേക്ക് വ്യാപിപ്പിക്കുമെന്നും കസ്റ്റഡിയിൽ നിന്ന് മോചിതനായ ശേഷം ധ്രുവ് റാഠി വ്യക്തമാക്കിയിരുന്നു.