കാറിന്റെ ‘സ്മാർട്ട് കീ’ അലുമിനിയം ഫോയിലിൽ പൊതിയുന്നത് എന്തിന്?
പുതിയ തലമുറ കാറുകളുടെ സ്മാർട്ട് താക്കോലുകൾ അലുമിനിയം ഫോയിലിൽ പൊതിഞ്ഞുവെക്കുന്ന വാഹന ഉടമകളുടെ എണ്ണം ലോകമെമ്പാടും വർധിച്ചുവരികയാണ്. ഒറ്റനോട്ടത്തിൽ വിചിത്രമെന്ന് തോന്നാമെങ്കിലും, വളരെ ഗൗരവമേറിയ ഒരു കാരണമാണ് ഇതിന് പിന്നിലുള്ളത്. വാഹനത്തിന്റെ ലോക്കോ ഗ്ലാസോ തകർക്കാതെ നടത്തുന്ന ഹൈടെക് മോഷണങ്ങളിൽ നിന്ന് രക്ഷനേടാനാണ് ആളുകൾ ഈ പുതിയ വിദ്യ പരീക്ഷിക്കുന്നത്. നിമിഷങ്ങൾക്കുള്ളിൽ വാഹനം തുറക്കുന്ന ഈ മോഷണ രീതിക്ക് ‘റിലേ അറ്റാക്ക്’ എന്നാണ് പറയുന്നത്. പുതിയ കാറുകളിലെ ‘കീലെസ് എൻട്രി’ സംവിധാനത്തിലെ സുരക്ഷാ വീഴ്ചകൾ മുതലെടുത്താണ് ഇത്തരം മോഷണങ്ങൾ വ്യാപകമായി നടക്കുന്നത്.
താക്കോൽ ഇല്ലാതെ പ്രവർത്തിക്കുന്ന സംവിധാനമുള്ള കാറുകളുടെ താക്കോലുകൾ എപ്പോഴും ഒരു പ്രത്യേക റേഡിയോ സിഗ്നൽ പുറപ്പെടുവിക്കുന്നുണ്ട്. ഈ സിഗ്നലുകൾ തിരിച്ചറിഞ്ഞാണ് താക്കോൽ ഉപയോഗിക്കാതെ തന്നെ കാറിന്റെ വാതിലുകൾ തുറക്കാൻ സാധിക്കുന്നത്. രാത്രി സമയങ്ങളിൽ വീടിനുള്ളിൽ വെച്ചിരിക്കുന്ന താക്കോലിൽ നിന്നുള്ള സിഗ്നലുകൾ അതിതീവ്ര ശേഷിയുള്ള ആംപ്ലിഫയർ ഉപകരണങ്ങളുടെ സഹായത്തോടെ പിടിച്ചെടുക്കുകയാണ് മോഷ്ടാക്കൾ ആദ്യം ചെയ്യുന്നത്. വീടിന്റെ ജനലുകൾക്കോ വാതിലുകൾക്കോ സമീപം നിൽക്കുന്ന ഒരാൾ ഉപകരണത്തിന്റെ സഹായത്തോടെ ഈ സിഗ്നൽ പിടിച്ചെടുത്ത് കാറിന് സമീപം നിൽക്കുന്ന മറ്റൊരാൾക്ക് കൈമാറുന്നു. കാറിന്റെ സിസ്റ്റം ഈ സിഗ്നൽ തിരിച്ചറിയുകയും, ഉടമസ്ഥൻ താക്കോലുമായി കാറിന് സമീപത്തുണ്ടെന്ന് തെറ്റിദ്ധരിച്ച് ഡോറുകൾ അൺലോക്ക് ആകുകയും ചെയ്യുന്നു. ഇത്തരത്തിൽ എഞ്ചിൻ സ്റ്റാർട്ട് ചെയ്ത് നിമിഷങ്ങൾക്കകം മോഷ്ടാക്കൾക്ക് കാറുമായി കടന്നുകളയാൻ സാധിക്കും.
ഇത്തരം ഹൈടെക് മോഷണങ്ങളെ തടയാൻ ശാസ്ത്രീയമായ ഒരു പ്രതിരോധമാർഗ്ഗമായാണ് അലുമിനിയം ഫോയിൽ പ്രവർത്തിക്കുന്നത്. പ്രശസ്ത ശാസ്ത്രജ്ഞനായ മൈക്കൽ ഫാരഡേ കണ്ടെത്തിയ ‘ഫാരഡേ കേജ്’ എന്ന തത്വമാണ് ഇതിന് പിന്നിൽ. കാറിന്റെ സ്മാർട്ട് കീ ഒരു അലുമിനിയം ഫോയിലിൽ നന്നായി പൊതിഞ്ഞുവെക്കുമ്പോൾ, താക്കോലിൽ നിന്നുള്ള വൈദ്യുതകാന്തിക തരംഗങ്ങൾക്ക് പുറത്തേക്ക് പോകാനോ, പുറത്തുനിന്നുള്ള ഉപകരണങ്ങൾക്ക് ഇതിലേക്ക് കടക്കാനോ സാധിക്കില്ല. അലുമിനിയം ഫോയിൽ പൂർണ്ണമായും ഒരു കവചം പോലെ പ്രവർത്തിച്ച് സിഗ്നലുകളെ തടയുന്നതോടെ മോഷ്ടാക്കളുടെ ഉപകരണങ്ങൾ പരാജയപ്പെടുന്നു. യാതൊരു ചെലവുമില്ലാതെ വീടുകളിൽ തന്നെ ലഭ്യമായ ഈ സുരക്ഷാ മാർഗ്ഗം വളരെ വേഗത്തിലാണ് വാഹന ഉടമകൾക്കിടയിൽ പ്രചാരം നേടിയത്.
എന്നാൽ, സ്മാർട്ട് കീ അലുമിനിയം ഫോയിലിൽ പൊതിയുമ്പോൾ ഒരിടത്തും വിടവുകളില്ലെന്ന് ഉറപ്പുവരുത്തേണ്ടതുണ്ട്. ഫോയിലിൽ ചെറിയ സുഷിരങ്ങളോ കീറലുകളോ ഉണ്ടെങ്കിൽ സിഗ്നലുകൾ പുറത്തേക്ക് പോകാൻ സാധ്യതയുണ്ട്. ഓരോ തവണയും കാർ ഉപയോഗിക്കുമ്പോൾ ഇത് അഴിച്ചെടുക്കുകയും വീണ്ടും പൊതിയുകയും ചെയ്യുന്നത് അൽപം ബുദ്ധിമുട്ടേറിയ കാര്യമായതിനാൽ, ഇതിന് പകരമായി വിപണിയിൽ ലഭ്യമായ ‘ഫാരഡേ പൗച്ചുകൾ’ ഉപയോഗിക്കുന്നതാണ് കൂടുതൽ സുരക്ഷിതം എന്ന് വിദഗ്ധർ ചൂണ്ടിക്കാണിക്കുന്നു. ഇത്തരം പൗച്ചുകളുടെ ഉൾഭാഗം സിഗ്നലുകളെ തടയുന്ന പ്രത്യേക ലോഹങ്ങൾ കൊണ്ടാണ് നിർമ്മിച്ചിരിക്കുന്നത്. ഇതിനുപുറമെ, സ്മാർട്ട് താക്കോലുകൾ വീടിന്റെ വാതിലിനോ ജനലുകൾക്കോ സമീപം വെക്കാതെ വീടിന്റെ ഉൾഭാഗത്ത് സുരക്ഷിതമായ സ്ഥാനത്ത് സൂക്ഷിക്കുന്നതും ഇത്തരം ഹൈടെക് മോഷണങ്ങളെ വലിയൊരു പരിധിവരെ തടയാൻ സഹായിക്കും.
