‘ഒരു സാധാരണ മരുന്ന് നൽകിയിരുന്നെങ്കിൽ മറഡോണയുടെ ജീവൻ രക്ഷിക്കാമായിരുന്നു’; വിചാരണയ്ക്കിടെ ഡോക്ടറുടെ നിർണ്ണായക വെളിപ്പെടുത്തൽ

ബ്യൂണസ് അയേഴ്സ്: ഫുട്ബോൾ ഇതിഹാസം ഡീഗോ മറഡോണയുടെ മരണവുമായി ബന്ധപ്പെട്ട കേസിൽ അർജന്റീന കോടതിയിൽ നടുക്കുന്ന വെളിപ്പെടുത്തലുമായി തീവ്രപരിചരണ വിഭാഗം വിദഗ്ദ്ധൻ. മരണത്തിന് തൊട്ടുമുൻപുള്ള ദിവസങ്ങളിൽ വെറുമൊരു സാധാരണ ‘ഡൈയൂററ്റിക്’ (ശരീരത്തിലെ അമിത ദ്രാവകം മൂത്രത്തിലൂടെ പുറന്തള്ളാനുള്ള മരുന്ന്) നൽകിയിരുന്നെങ്കിൽ കേവലം 48 മണിക്കൂറിനുള്ളിൽ അദ്ദേഹത്തിന്റെ ആരോഗ്യം മെച്ചപ്പെടുമായിരുന്നുവെന്ന് ഡോക്ടർ കോടതിയെ അറിയിച്ചു. 2000-കളുടെ തുടക്കത്തിൽ മറഡോണയെ ചികിത്സിക്കുകയും 2020-ൽ അദ്ദേഹത്തിന്റെ പോസ്റ്റ്മോർട്ടത്തിൽ പങ്കെടുക്കുകയും ചെയ്ത ഡോ. മാരിയോ ഷീറ്റർ ആണ് അർജന്റീനയിലെ സാൻ ഇസിദ്രോ കോടതിയിൽ വ്യാഴാഴ്ച ഈ നിർണ്ണായക പ്രസ്താവന നടത്തിയത്.

മരണം തടയാൻ മെഡിക്കൽ സംഘത്തിന് എന്ത് ചെയ്യാമായിരുന്നു എന്ന കോടതിയുടെ ചോദ്യത്തിന് മറുപടി നൽകുകയായിരുന്നു ഡോ. ഷീറ്റർ. ഹൃദയസ്തംഭനത്തിന്റെ ലക്ഷണങ്ങളുമായി ഐ.സി.യുവിൽ വരുന്ന രോഗികളിൽ ശരീരത്തിലെ ദ്രാവകത്തിന്റെ അളവ് കുറയ്ക്കാൻ തങ്ങൾ സാധാരണയായി ഡൈയൂററ്റിക്സ് നൽകാറുണ്ടെന്നും, മരുന്ന് നൽകി 12 മണിക്കൂറിനുള്ളിൽ തന്നെ അത്തരം രോഗികൾക്ക് സുഖം പ്രാപിച്ച് വീട്ടിലേക്ക് മടങ്ങാൻ സാധിക്കാറുണ്ടെന്നും അദ്ദേഹം ചൂണ്ടിക്കാണിച്ചു. കഴിഞ്ഞ ആഴ്ച കോടതിയിൽ മൊഴി നൽകിയ പോസ്റ്റ്മോർട്ടത്തിൽ പങ്കെടുത്ത മറ്റൊരു ഡോക്ടറായ കാർലോസ് കാസിനെല്ലിയും സമാനമായ കാര്യങ്ങളാണ് വ്യക്തമാക്കിയത്. മരണസമയത്ത് മറഡോണയുടെ ശരീരത്തിൽ മുഴുവൻ വെള്ളമായിരുന്നുവെന്നും പല പ്രധാന അവയവങ്ങളിലും അമിതമായി ദ്രാവകം അടിഞ്ഞുകൂടിയിരുന്നുവെന്നും അദ്ദേഹം കോടതിയെ അറിയിച്ചു.

ലിറ്റർ കണക്കിന് ദ്രാവകം ശരീരത്തിൽ അടിഞ്ഞുകൂടാൻ കുറഞ്ഞത് ഒരു വാരമോ പത്ത് ദിവസമോ എടുക്കുമെന്നും, മറഡോണയെ പരിചരിച്ച മെഡിക്കൽ സംഘത്തിന് അദ്ദേഹത്തിന്റെ ശരീരത്തിലുണ്ടായ ഈ വീക്കം വളരെ എളുപ്പത്തിൽ തിരിച്ചറിയാമായിരുന്നു എന്നുമാണ് ഡോക്ടർമാർ വ്യക്തമാക്കുന്നത്. 2020-ൽ മറഡോണയുടെ തലച്ചോറിലെ ശസ്ത്രക്രിയയ്ക്ക് ശേഷം അദ്ദേഹത്തെ വീട്ടിൽ താമസിപ്പിച്ചു പരിചരിക്കുന്നതിനെ ഡോ. ഷീറ്റർ ശക്തമായി എതിർത്തിരുന്നു. എന്നാൽ, കൂടുതൽ സുരക്ഷിതമായ ഒരു പുനരധിവാസ കേന്ദ്രത്തിലേക്ക് മാറുന്നതിന് പകരം ബ്യൂണസ് ഐറിസിന് വടക്കുള്ള ഒരു വാടകവീട്ടിൽ വിശ്രമിക്കാനാണ് മറഡോണ തീരുമാനിച്ചത്. അവിടെവെച്ച് ആവശ്യമായ പരിചരണവും ചികിത്സയും ലഭിക്കാതെ, ശ്വാസകോശത്തിലെ വീക്കത്തെയും ഹൃദയാഘാതത്തെയും തുടർന്ന് തന്റെ 60-ാം വയസ്സിൽ അദ്ദേഹം അന്തരിക്കുകയായിരുന്നു.

മറഡോണയുടെ മരണത്തിൽ ഗുരുതരമായ ചികിത്സാ വീഴ്ചയും അനാസ്ഥയും വരുത്തിയതിന് അദ്ദേഹത്തിന്റെ വ്യക്തിഗത ഡോക്ടർമാരും നഴ്സുമാരും ഉൾപ്പെടെ ഏഴ് ആരോഗ്യ പ്രവർത്തകരാണ് ഇപ്പോൾ കോടതിയിൽ വിചാരണ നേരിടുന്നത്. കുറ്റം തെളിയിക്കപ്പെട്ടാൽ ഇവർക്ക് 8 മുതൽ 25 വർഷം വരെ തടവുശിക്ഷ ലഭിച്ചേക്കാം. വരും ദിവസങ്ങളിൽ കൂടുതൽ സാക്ഷിവിസ്താരങ്ങളോടെ ഈ കേസിന്റെ വിചാരണ ജൂലൈ വരെ നീളുമെന്നാണ് റിപ്പോർട്ടുകൾ സൂചിപ്പിക്കുന്നത്. കഴിഞ്ഞ ദിവസങ്ങളിലെ വിചാരണയ്ക്കിടെ മറഡോണയ്ക്ക് കടുത്ത ‘ബൈപോളാർ ഡിസോർഡർ’ (മാനസികാവസ്ഥയിലുണ്ടാകുന്ന തീവ്രമായ മാറ്റങ്ങൾ) ഉണ്ടായിരുന്നതായും മനഃശാസ്ത്രജ്ഞർ കോടതിയിൽ മൊഴി നൽകിയിരുന്നു.