‘ഓടിക്കാൻ ആഗ്രഹം തോന്നി, ഓടിച്ചു’; കെഎസ്ആർടിസി ബസ് കടത്തിക്കൊണ്ടുപോയ യുവാവ് 18 ദിവസങ്ങൾക്ക് ശേഷം പിടിയിൽ

പാലക്കാട്: ജീവനക്കാർ നോക്കിനിൽക്കെ ഡിപ്പോയ്ക്ക് സമീപത്തുനിന്ന് കെഎസ്ആർടിസി ബസ് കടത്തിക്കൊണ്ടുപോയ യുവാവ് 18 ദിവസങ്ങൾക്ക് ശേഷം പിടിയിലായി. മേപ്പറമ്പ് സ്വദേശി ഫാസിലിനെയാണ് (25) പാലക്കാട് ടൗൺ സൗത്ത് പോലീസ് അറസ്റ്റ് ചെയ്തത്. ജൂൺ ഏഴിന് പുലർച്ചെയായിരുന്നു സംഭവം.

മദ്യലഹരിയിൽ ബസ് ഓടിക്കാനുള്ള ആഗ്രഹം കൊണ്ടാണ് വണ്ടിയെടുത്തതെന്നാണ് പ്രതിയുടെ മൊഴി. സംഭവത്തിന് ശേഷം തമിഴ്‌നാട്, ഹിമാചൽപ്രദേശ് എന്നിവിടങ്ങളിൽ കറങ്ങിയ ഇയാൾ നാട്ടിൽ തിരിച്ചെത്തിയപ്പോഴാണ് പിടിയിലായത്. അന്ന് രാത്രി തന്നെ ഡിപിഒ റോഡിന് സമീപത്തുനിന്ന് ഒരു മിനിലോറിയും ഇയാൾ മോഷ്ടിച്ചിരുന്നതായി പോലീസ് കണ്ടെത്തിയിട്ടുണ്ട്. ഈ ലോറി പിന്നീട് കോയമ്പത്തൂരിൽ ഉപേക്ഷിച്ച നിലയിൽ കണ്ടെത്തുകയായിരുന്നു. പ്രതിക്കെതിരെ മുൻപും ഒൻപതോളം കേസുകൾ നിലവിലുണ്ടെന്ന് പോലീസ് അറിയിച്ചു.