2028 മുതൽ ഡൽഹിയിൽ ഇലക്ട്രിക് ഇരുചക്ര വാഹനങ്ങൾ മാത്രം
ന്യൂഡൽഹി: ദേശീയ തലസ്ഥാനത്ത് വായു മലിനീകരണം കുറയ്ക്കുന്നതിനായി പരിസ്ഥിതി സൗഹൃദ വാഹനങ്ങളെ പ്രോത്സാഹിപ്പിക്കുന്ന ‘ഡൽഹി ഇവി നയം 2026’ ഡൽഹി സർക്കാർ ഔദ്യോഗികമായി പുറത്തിറക്കി. ഇന്ത്യ കണ്ടിട്ടുള്ളതിൽ വച്ച് ഏറ്റവും ശക്തമായ വാഹന വൈദ്യുതീകരണ നയമാണിത്. 7,000 കോടി രൂപയുടെ ബജറ്റ് പിന്തുണയോടെ നടപ്പിലാക്കുന്ന ഈ പദ്ധതി പ്രകാരം, 2028 ഏപ്രിൽ 1 മുതൽ ഡൽഹിയിൽ പുതിയ പെട്രോൾ ഇരുചക്ര വാഹനങ്ങളുടെ രജിസ്ട്രേഷൻ പൂർണമായും നിരോധിക്കും. ഇതിനുശേഷം തലസ്ഥാനത്ത് രജിസ്റ്റർ ചെയ്യുന്ന ഇരുചക്ര വാഹനങ്ങൾ 100% വും ഇലക്ട്രിക് ആയിരിക്കണം. 2030 മാർച്ച് 31 വരെയാണ് ഈ നയത്തിന് പ്രാബല്യമുള്ളത്.
പുതിയ ഇവി നയത്തിലൂടെ ഉപഭോക്താക്കൾക്ക് വലിയ സാമ്പത്തിക ആനുകൂല്യങ്ങളാണ് സർക്കാർ പ്രഖ്യാപിച്ചിരിക്കുന്നത്. 30 ലക്ഷം രൂപ വരെ വിലയുള്ള (എക്സ്-ഷോറൂം) ഇലക്ട്രിക് കാറുകൾക്ക് റോഡ് നികുതിയിലും രജിസ്ട്രേഷൻ ഫീസിലും 100% ഇളവ് ലഭിക്കും. ഇതിനുപുറമെ, ഇലക്ട്രിക് ഇരുചക്ര വാഹനങ്ങൾക്ക് 30,000 രൂപ വരെയും, ത്രീ-വീലറുകൾക്ക് 50,000 രൂപ വരെയും, എൻ-1 ട്രക്കുകൾക്ക് ഒരു ലക്ഷം രൂപ വരെയും നേരിട്ടുള്ള വാങ്ങൽ സബ്സിഡി (DBT) ലഭിക്കുന്നതാണ്.
പഴയ ആന്തരിക ജ്വലന എഞ്ചിൻ (ICE) വാഹനങ്ങൾ പൊളിച്ചുമാറ്റി ഇലക്ട്രിക് വാഹനം വാങ്ങുന്നവർക്കായി 1,500 കോടി രൂപയുടെ സ്ക്രാപ്പേജ് ബോണസും പ്രഖ്യാപിച്ചിട്ടുണ്ട്. ഇതിലൂടെ പഴയ നാലു ചക്ര വാഹനങ്ങൾക്ക് ഒരു ലക്ഷം രൂപയും, ഇരുചക്ര വാഹനങ്ങൾക്ക് 10,000 രൂപയും ഇളവ് ലഭിക്കും. ചരക്ക് വാഹനങ്ങൾക്കും സ്കൂൾ ബസുകൾക്കും പ്രത്യേക ഇവി മാനദണ്ഡങ്ങൾ നിശ്ചയിച്ചിട്ടുള്ള ഈ നയത്തിന്റെ ഭാഗമായി ഡൽഹിയിലുടനീളം 30,000 ചാർജിങ് പോയിന്റുകൾ സ്ഥാപിക്കാനും ലക്ഷ്യമിടുന്നുണ്ട്.
