‘അയോധ്യയിലെ സംഭവത്തിന്റെ പേരിൽ ഹിന്ദു വിശ്വാസങ്ങളെ അധിക്ഷേപിക്കാൻ ശ്രമിക്കുന്ന പ്രതിപക്ഷം, വഖഫ് ഭൂമി കൈയേറ്റങ്ങളിൽ മിണ്ടാട്ടമില്ല’, നിറം മാറുന്നതിൽ ഓന്ത് പോലും നാണിക്കും; പരിഹാസവുമായി യോഗി ആദിത്യനാഥ്
അയോധ്യ: അയോധ്യയിലെ രാമക്ഷേത്ര നിർമ്മാണ ഫണ്ടുമായി ബന്ധപ്പെട്ട് ഉയർന്ന വിവാദങ്ങളിൽ സമാജ്വാദി പാർട്ടിക്കും കോൺഗ്രസിനുമെതിരെ പുതിയ ആരോപണങ്ങളുമായി ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. രാമക്ഷേത്ര ഫണ്ടിലെ ക്രമക്കേടുകളെക്കുറിച്ച് സംസാരിക്കുന്ന പ്രതിപക്ഷം വഖഫ് ബോർഡിന്റെ പേരിലുള്ള ഭൂമി ഇടപാടുകളെക്കുറിച്ച് ബോധപൂർവ്വം മൗനം പാലിക്കുകയാണെന്ന് പ്രതാപ്ഗഢിൽ നടന്ന റാലിയിൽ അദ്ദേഹം ആരോപിച്ചു. അയോധ്യയിലെ സംഭവങ്ങളെ പർവ്വതീകരിച്ച് കാണിച്ച് പ്രതിപക്ഷം ഹിന്ദു വിശ്വാസങ്ങളെ അധിക്ഷേപിക്കാൻ ശ്രമിക്കുകയാണെന്നാണ് അദ്ദേഹത്തിന്റെ പ്രധാന വാദം.
വഖഫിന്റെ പേരിൽ ആയിരക്കണക്കിന് ഹെക്ടർ ഭൂമി ചിലർ കൈയേറി വിറ്റഴിച്ചതായി യോഗി ആരോപിച്ചു. പാവപ്പെട്ടവർക്കും ദുർബലവിഭാഗങ്ങൾക്കും ലഭിക്കേണ്ടിയിരുന്ന ഭൂമിയാണ് ഇത്തരത്തിൽ ചില വ്യക്തികൾ സ്വന്തമാക്കിയതെന്നും, ഇതിൽ കോൺഗ്രസും എസ്പിയും യാതൊന്നും മിണ്ടുന്നില്ലെന്നും അദ്ദേഹം കുറ്റപ്പെടുത്തി. അതേസമയം, രാമക്ഷേത്ര ഫണ്ടിലെ ക്രമക്കേട് ആരോപണത്തിൽ രാമജന്മഭൂമി ട്രസ്റ്റിന്റെ ആവശ്യപ്രകാരം അന്വേഷണം നടക്കുന്നുണ്ടെന്നും കുറ്റക്കാർക്കെതിരെ നടപടിയെടുത്തിട്ടുണ്ടെന്നും അദ്ദേഹം അവകാശപ്പെട്ടു.
രാമക്ഷേത്ര ഫണ്ട് ക്രമക്കേട് ആരോപണത്തിൽ ശ്രീരാമ ജന്മഭൂമി തീർത്ഥ ക്ഷേത്ര ട്രസ്റ്റ് തന്നെയാണ് പ്രത്യേക അന്വേഷണ സംഘത്തെ നിയോഗിക്കാൻ ആവശ്യപ്പെട്ടതെന്ന് യോഗി വിശദീകരിച്ചു. അന്വേഷണത്തിൽ സത്യം പുറത്തുകൊണ്ടുവരുമെന്ന് താൻ ഉറപ്പുനൽകിയിരുന്നതായും, തെളിവുകളുടെ അടിസ്ഥാനത്തിൽ കുറ്റക്കാർക്കെതിരെ നടപടിയെടുത്തിട്ടുണ്ടെന്നും അദ്ദേഹം അവകാശപ്പെട്ടു. എന്നാൽ വഖഫ് വിഷയത്തിൽ കോൺഗ്രസിന്റെയും എസ്പിയുടെയും വായ ‘ഫെവിക്കോൾ’ വെച്ച് ഒട്ടിച്ചിരിക്കുകയാണോ എന്ന് അദ്ദേഹം പരിഹസിച്ചു. സമാജ്വാദി പാർട്ടിക്കാരെയും കോൺഗ്രസുകാരെയും കണ്ടാൽ, തങ്ങളേക്കാൾ വേഗത്തിൽ നിറം മാറുന്ന പുതിയൊരു വർഗ്ഗം വന്നിട്ടുണ്ടല്ലോ എന്ന് കരുതി ഒരു ഓന്ത് പോലും നാണിക്കുമെന്ന് അദ്ദേഹം കുറ്റപ്പെടുത്തി.
ഹിന്ദു മതസ്ഥാപനങ്ങൾക്കായി നൽകിയ പണം സെമിത്തേരികളുടെ മതിൽ കെട്ടാൻ ദുരുപയോഗം ചെയ്തപ്പോൾ ഇവരുടെയൊന്നും ഹിന്ദു വിശ്വാസം വ്രണപ്പെട്ടില്ലേ എന്നും പ്രതിപക്ഷത്തോട് യോഗി ആദിത്യനാഥ് ചോദിച്ചു. നിയമവിരുദ്ധമായി കശാപ്പുശാലകൾ നടത്തിയപ്പോഴും, ഗോമാതാവിനെ കള്ളക്കടത്തുകാർക്ക് വിട്ടുകൊടുത്ത് കൊലപ്പെടുത്തിയപ്പോഴും ഹിന്ദുക്കളുടെ വികാരം വ്രണപ്പെട്ടില്ലേ എന്ന് അദ്ദേഹം ചോദിച്ചു. അയോധ്യയിൽ രാമഭക്തർക്ക് നേരെ ലാത്തിച്ചാർജ് നടത്തുകയും വെടിയുതിർക്കുകയും ചെയ്തപ്പോഴും, കാവടിയാത്രയ്ക്ക് വിലക്കേർപ്പെടുത്തിയപ്പോഴും ഈ വിശ്വാസം എവിടെയായിരുന്നുവെന്നാണ് യോഗിയുടെ ചോദ്യം. രാമക്ഷേത്രത്തിന്റെ കാര്യങ്ങൾ നോക്കിനടത്തുന്നത് ശ്രീരാമ ജന്മഭൂമി ട്രസ്റ്റാണെന്നും അവരുടെ പ്രവർത്തനങ്ങളിൽ പുറത്തുനിന്നുള്ള യാതൊരു ഇടപെടലുകളുമില്ലെന്നും അദ്ദേഹം കൂട്ടിച്ചേർത്തു.
