ഒരു ആരാധകന് ഇതിൽക്കൂടുതൽ എന്ത് വേണം? ലോകത്ത് ആകെ 2 എണ്ണം മാത്രം! സ്പീഡിനെ തേടിയെത്തിയ റൊണാൾഡോയുടെ ഗോൾഡൻ സർപ്രൈസ്
ന്യൂയോർക്ക്: പ്രശസ്ത യൂട്യൂബറും സ്ട്രീമറുമായ ഐഷോസ്പീഡിനെ അമ്പരപ്പിച്ച് ഫുട്ബോൾ ഇതിഹാസം ക്രിസ്റ്റ്യാനോ റൊണാൾഡോയുടെ അപ്രതീക്ഷിത സമ്മാനം. 2026 ഫിഫ ലോകകപ്പിൽ താൻ ഉപയോഗിച്ച ‘നൈക്കി മെർക്കുറിയൽ സൂപ്പർഫ്ലൈ 11 സിആർ7 ഗോൾഡ് സ്കോർപിയോൺ’ ബൂട്ടുകളാണ് റൊണാൾഡോ തന്റെ കടുത്ത ആരാധകന് സമ്മാനിച്ചത്. ലോകത്ത് ആകെ രണ്ടെണ്ണം മാത്രം നിർമ്മിച്ചിട്ടുള്ള ഈ അത്യപൂർവ്വ ബൂട്ടുകൾ സ്പീഡിന് ലഭിച്ചതിൽ വെച്ച് ഏറ്റവും വിലപിടിപ്പുള്ളതും വ്യക്തിപരവുമായ സമ്മാനമാണ്. സ്പെയിനും ബെൽജിയവും തമ്മിൽ വെള്ളിയാഴ്ച നടന്ന ക്വാർട്ടർ ഫൈനൽ മത്സരം തത്സമയം സ്ട്രീം ചെയ്യുന്നതിനിടെയാണ് റൊണാൾഡോ അയച്ച പാഴ്സൽ സ്പീഡിന് ലഭിച്ചത്. പാക്കറ്റ് തുറന്ന് സ്വർണ്ണ നിറത്തിലുള്ള ബൂട്ടുകൾ കണ്ട സ്പീഡ് അക്ഷരാർത്ഥത്തിൽ ആവേശഭരിതനാവുകയും ഇത് ലോകത്താകെയുള്ള രണ്ട് ജോഡികളിൽ ഒന്നാണെന്ന് തിരിച്ചറിഞ്ഞപ്പോൾ വികാരഭരിതനാവുകയും ചെയ്തു.
പോർച്ചുഗൽ ലോകകപ്പിന്റെ ക്വാർട്ടർ ഫൈനലിൽ പ്രവേശിച്ചിരുന്നുവെങ്കിൽ ഈ ബൂട്ടുകൾ നേരിട്ട് സ്പീഡിന് കൈമാറാനായിരുന്നു റൊണാൾഡോ ആദ്യം തീരുമാനിച്ചിരുന്നത്. എന്നാൽ പ്രീക്വാർട്ടറിൽ സ്പെയിനോട് എതിരില്ലാത്ത ഒരു ഗോളിന് തോറ്റ് പോർച്ചുഗൽ പുറത്തായതോടെ ആ പദ്ധതികൾ മാറിമറിയുകയായിരുന്നു. റൊണാൾഡോയുടെ അവസാന ലോകകപ്പ് മത്സരം കൂടിയായിരുന്നു അത്. എങ്കിലും തന്റെ ഏറ്റവും വലിയ ആരാധകന് ആ സമ്മാനം നേരിട്ട് അയച്ചുകൊടുക്കാൻ പോർച്ചുഗീസ് നായകൻ തീരുമാനിച്ചു. ലോകകപ്പിൽ പോർച്ചുഗൽ പുറത്തായതിന്റെ വലിയ സങ്കടത്തിലായിരുന്നു സ്പീഡ്. എന്നാൽ സ്ട്രീമിംഗിനിടെ അപ്രതീക്ഷിതമായി ഈ സമ്മാനം ലഭിച്ചതോടെ സ്പീഡ് വലിയ സന്തോഷത്തോടെ തന്റെ പ്രേക്ഷകർക്ക് മുന്നിൽ ബൂട്ടുകൾ ഉയർത്തിക്കാണിച്ചു.
ഈ ബൂട്ടുകൾക്ക് ഫുട്ബോൾ ലോകത്ത് വലിയ പ്രാധാന്യമാണുള്ളത്. ആറ് വ്യത്യസ്ത ഫിഫ ലോകകപ്പുകളിൽ ഗോൾ നേടുന്ന ആദ്യ പുരുഷ താരം എന്ന നേട്ടം സ്വന്തമാക്കിയ റൊണാൾഡോയോടുള്ള ആദരസൂചകമായാണ് നൈക്കി ഈ സ്പെഷ്യൽ എഡിഷൻ ബൂട്ടുകൾ പുറത്തിറക്കിയത്. വിപണിയിൽ ലഭിക്കുന്ന സാധാരണ ബൂട്ടുകൾക്ക് പകരം 2026 ലോകകപ്പിൽ റൊണാൾഡോ നേരിട്ട് ഉപയോഗിച്ച ബൂട്ടുകളാണ് സ്പീഡിന് ലഭിച്ചിരിക്കുന്നത്. ലോകത്ത് ആകെയുള്ള രണ്ട് ജോഡി ബൂട്ടുകളിൽ ഒന്നാണിത് എന്നത് ഇതിന്റെ മാറ്റുകൂട്ടുന്നു. റൊണാൾഡോയുടെ കടുത്ത ആരാധകനായി ലോകമെമ്പാടും അറിയപ്പെടുന്ന സ്പീഡ് പോർച്ചുഗലിന്റെ ഓരോ മത്സരങ്ങളും വലിയ ആവേശത്തോടെയാണ് പിന്തുടർന്നിരുന്നത്. ബെൽജിയത്തിനെതിരായ ക്വാർട്ടറിൽ പോർച്ചുഗൽ കളിക്കുമെന്ന് സ്പീഡ് ഉൾപ്പെടെയുള്ള ആരാധകർ പ്രതീക്ഷിച്ചിരുന്നെങ്കിലും സ്പെയിനിനോട് തോറ്റ് പുറത്താവുകയായിരുന്നു. തുടർന്ന് ബെൽജിയത്തെ ഒന്നിനെതിരെ രണ്ട് ഗോളുകൾക്ക് പരാജയപ്പെടുത്തി സ്പെയിൻ സെമി ഫൈനലിൽ പ്രവേശിച്ചു. പോർച്ചുഗലിന്റെ ലോകകപ്പ് യാത്ര നിരാശയോടെയാണ് അവസാനിച്ചതെങ്കിലും തന്റെ ഐതിഹാസിക ലോകകപ്പ് കരിയറിലെ ഏറ്റവും അമൂല്യമായ ഒരു ഓർമ്മ സ്വന്തം ആരാധകന് നൽകിയാണ് റൊണാൾഡോ മടങ്ങുന്നത്.
