കാർത്തികപ്പള്ളിയിലെ കുഞ്ഞിന്റെ മരണം: കുട്ടികൾക്ക് ലഭിച്ച സൗജന്യ അരി പിതാവ് ഹോട്ടലിന് മറിച്ചുവിറ്റു; ഗുരുതര ആരോപണവുമായി പഞ്ചായത്തംഗം
ആലപ്പുഴ: കാർത്തികപ്പള്ളിയിൽ പോഷകാഹാരക്കുറവ് മൂലം രണ്ടുവയസ്സുകാരൻ രാഹുൽ മരിച്ച സംഭവത്തിൽ കുട്ടിയുടെ പിതാവിനെതിരെ ഗുരുതര ആരോപണവുമായി പഞ്ചായത്തംഗം രംഗത്ത്. കുട്ടികൾക്ക് സ്കൂളിൽനിന്ന് ലഭിച്ചിരുന്ന അരി പിതാവ് രാജേഷ് മറിച്ചുവിറ്റിരുന്നെന്നാണ് കാർത്തികപ്പള്ളി ഒൻപതാം വാർഡ് അംഗം വിനീത് പറഞ്ഞത്. കഴിഞ്ഞ മാസം 20 കിലോ അരി ലഭിച്ചതിൽ നല്ലൊരു പങ്കും രാജേഷ് പ്രദേശത്തെ ഹോട്ടലിന് 500 രൂപയ്ക്ക് വിറ്റതായി തനിക്ക് വിവരം ലഭിച്ചെന്നും വിനീത് വെളിപ്പെടുത്തി.
അതേസമയം, രാജേഷ് കടുത്ത മദ്യപാനിയായിരുന്നെന്ന് നാട്ടുകാരും വെളിപ്പെടുത്തി. രാഹുലിനെ മരിച്ചനിലയിൽ കണ്ടെത്തിയ ദിവസവും ഇയാൾ മദ്യപിച്ചിരുന്നു. കഴിഞ്ഞ ദിവസം രാവിലെ 6.30-നാണ് കുഞ്ഞിനെ ചലനമറ്റ നിലയിൽ കണ്ടെത്തിയത്. എന്നാൽ, കുഞ്ഞിന് ജന്മനാ ആരോഗ്യ പ്രശ്നങ്ങളുണ്ടായിരുന്നെന്നും പോസ്റ്റ്മോർട്ടം റിപ്പോർട്ടിലും പോഷകാഹാര കുറവുണ്ടെന്ന് കണ്ടെത്തിയെന്നുമാണ് പിതാവ് രാജേഷ് മാധ്യമങ്ങളോട് പ്രതികരിച്ചത്.
കാർത്തികപ്പള്ളി പഞ്ചായത്തിലെ വലിയകുളങ്ങര തൈമുട്ടിൽ രാജേഷ് – താര ദമ്പതികളുടെ ആറാമത്തെ കുട്ടി രാഹുലാണ് കഴിഞ്ഞ ദിവസം മരിച്ചത്. അമ്മയെ പ്രസവത്തിനായി ആലപ്പുഴ ഗവ. മെഡിക്കൽ കോളജിൽ പ്രവേശിപ്പിച്ചിരുന്നതിനാൽ വീട്ടിൽ കുട്ടികളും പിതാവും മാത്രമാണ് ഉണ്ടായിരുന്നത്. പോഷകാഹാരക്കുറവ് മൂലമുള്ള അനീമിയയാണ് മരണകാരണമെന്ന് പോസ്റ്റ്മോർട്ടത്തിൽ വ്യക്തമായതായി തൃക്കുന്നപ്പുഴ പോലീസ് അറിയിച്ചിരുന്നു. രാഹുലിന്റെ മരണത്തെ തുടർന്ന് മറ്റു നാലു കുട്ടികളുടെ സംരക്ഷണം ജില്ലാ ശിശുക്ഷേമസമിതി ഏറ്റെടുത്തു.
