“ഊർജ കേന്ദ്രങ്ങൾ ആക്രമിച്ചാൽ ഇസ്രയേലിനെ ചുട്ടുചാമ്പലാക്കും; ഇസ്രയേലികളെ സിനായ് ഉപദ്വീപിലേക്ക് നാടുകടത്തും”; കടുത്ത മുന്നറിയിപ്പുമായി ഇറാൻ

തെഹ്റാൻ: തങ്ങളുടെ ഊർജ കേന്ദ്രങ്ങൾക്ക് നേരെ എന്തെങ്കിലും തരത്തിലുള്ള ആക്രമണങ്ങളുണ്ടായാൽ ഇസ്രയേലിനെ ചുട്ടുചാമ്പലാക്കുമെന്ന് ഇറാൻ. രാജ്യത്തെ ഊർജ അടിസ്ഥാന സൗകര്യങ്ങൾക്ക് നേരെ ഇസ്രയേൽ എന്തെങ്കിലും തരത്തിലുള്ള അക്രമണം നടത്തിയാൽ, ഇസ്രയേലിനെ എന്നെന്നേക്കുമായി ചുട്ടുചാമ്പലാക്കുമെന്നും, അവിടുത്തെ ജനങ്ങളെ ഈജിപ്തിലെ സിനായ് പെനിൻസുലയിലേക്ക് നാടുകടത്തുമെന്നും ഐ.ആർ.ജി.സി വക്താവ് ബ്രിഗേഡിയർ ജനറൽ ഹുസൈൻ മൊഹെബ്ബി വ്യക്തമാക്കി.

ഇറാൻ്റെ വാർത്താ ഏജൻസിയായ ഐ.ആർ.എൻ.എയുടെ എക്സ് അക്കൗണ്ടിലൂടെയാണ് ഈ മുന്നറിയിപ്പ് പുറത്തുവിട്ടത്. ഞായറാഴ്ച വൈകിട്ടോടെയാണ് ഇസ്രയേലികളെ സിനായ് ഉപദ്വീപിലേക്ക് നാടുകടത്തുമെന്ന മുന്നറിയിപ്പ് പുറത്തുവന്നത്. 2026 ഫെബ്രുവരി 28 മുതൽ ആരംഭിച്ച ഇസ്രയേൽ-യു.എസ് സംയുക്ത ആക്രമണങ്ങളുടെ പശ്ചാത്തലത്തിൽ ഇരു രാജ്യങ്ങളും തമ്മിലുള്ള സംഘർഷം വർദ്ധിച്ചുവരുന്ന സാഹചര്യത്തിലാണ് ഇറാന്റെ ഈ പ്രതികരണം.

തങ്ങളുടെ ഊർജ കേന്ദ്രങ്ങൾക്ക് നേരെ എന്ത് ആക്രമണമുണ്ടായാലും തങ്ങളിലെ യുവ ശാസ്ത്രജ്ഞർ അത് ഉടനടി പരിഹരിക്കുമെന്നും എന്നാൽ ഇതിന് പകരമായി ഇസ്രയേൽ ജനതയെ സിനായ് ഉപദ്വീപിലേക്ക് തുരത്തുമെന്നുമാണ് ഐ.ആർ.ജി.സി വ്യക്തമാക്കിയത്. എന്താണ് സംഭവിക്കാൻ പോകുന്നതെന്ന് ഈ ലോകം കാണാൻ പോകുന്നതേയുള്ളൂവെന്നും മൊഹെബ്ബി പറഞ്ഞു. ഇറാൻ്റെ സംസ്ഥാന പ്രക്ഷേപണ മാധ്യമമായ പ്രസ് ടിവിയും മറ്റ് മാധ്യമങ്ങളും ഈ പ്രസ്താവന പ്രസിദ്ധീകരിച്ചിട്ടുണ്ട്. ഒക്ടോബർ 15-ന് പുറത്തുവന്ന റോയിട്ടേഴ്സിന്റെ റിപ്പോർട്ട് പ്രകാരം, യുദ്ധം ആരംഭിച്ചതിന് ശേഷം ഇറാനും അനുബന്ധ ഗ്രൂപ്പുകളും ചേർന്ന് ഗൾഫ് രാജ്യങ്ങളിലുടനീളമുള്ള 84 നിർണ്ണായക അടിസ്ഥാന സൗകര്യങ്ങൾ ലക്ഷ്യമാക്കി കുറഞ്ഞത് 135 ഡ്രോൺ, മിസൈൽ ആക്രമണങ്ങൾ നടത്തിയിട്ടുണ്ട്.

ഖത്തറിലെ റാസ് ലഫാൻ ലിക്വിഫൈഡ് നാച്ചുറൽ ഗ്യാസ് കോംപ്ലക്‌സ് ഉൾപ്പെടെയുള്ള ഗൾഫ് രാജ്യങ്ങളിലെ എണ്ണ സൗകര്യങ്ങളും സൗദിയിലെ പൈപ്പ് ലൈൻ അടിസ്ഥാന സൗകര്യങ്ങളും ഈ ആക്രമണങ്ങളുടെ ലക്ഷ്യങ്ങളിൽ ഉൾപ്പെട്ടിരുന്നു. ഈ സംഘർഷം ആഗോള ഊർജ വിപണിയെ സാരമായി ബാധിക്കുകയും ഹോർമുസ് കടലിടുക്കിലൂടെയുള്ള എണ്ണക്കപ്പലുകളുടെ യാത്ര ദുഷ്കരമാക്കുകയും ചെയ്തിട്ടുണ്ട്. വാണിജ്യ കപ്പലുകൾക്ക് നേരെയുള്ള ആക്രമണങ്ങളും സമുദ്ര ഗതാഗതം തടയാനുള്ള ഇറാന്റെ ശ്രമങ്ങളും കടലിടുക്കിന് ചുറ്റുമുള്ള വാണിജ്യ കപ്പൽ ഗതാഗതത്തിന് ഭീഷണിയുയർത്തുന്നതായി ഒക്ടോബർ 13-ന് പുറത്തുവന്ന അസോസിയേറ്റഡ് പ്രസ് റിപ്പോർട്ടും വ്യക്തമാക്കിയിരുന്നു.