ഹോട്ടൽ ജീവനക്കാരിക്ക് നേരെ ലൈംഗികാതിക്രമം; ഇന്ത്യൻ പാരാ നീന്തൽ താരത്തെ ജപ്പാനിൽ നിന്ന് തിരിച്ചയച്ചു; ആജീവനാന്ത വിലക്കിന് സാധ്യത

നഗോയ: ജപ്പാനിലെ നഗോയയിൽ നടക്കുന്ന 2026-ലെ ഏഷ്യൻ പാരാ ഗെയിംസിൽ പങ്കെടുക്കാൻ പോയ ഇന്ത്യൻ പാരാ നീന്തൽ താരം മുഹമ്മദ് ഷംസ് ആലം ഷെയ്ഖിനെ ലൈംഗികാതിക്രമ ആരോപണത്തെ തുടർന്ന് നാട്ടിലേക്ക് തിരിച്ചയച്ചു. നഗോയയിലെ ഫോർ പോയിൻ്റ്സ് ബൈ ഷെറാട്ടൺ ഹോട്ടലിലെ ജാപ്പനീസ് വനിതാ ജീവനക്കാരിക്ക് നേരെ ലൈംഗികാതിക്രമം നടത്തിയെന്ന പരാതിയിലാണ് 40-കാരനായ താരത്തിനെതിരെ നടപടിയെടുത്തത്.

പുറത്തുവരുന്ന പുതിയ റിപ്പോർട്ടുകൾ പ്രകാരം, ഈ സംഭവത്തിന്റെ പശ്ചാത്തലത്തിൽ മുഹമ്മദ് ഷംസ് ആലം ഷെയ്ഖിനെതിരെ ആജീവനാന്ത വിലക്ക് ഏർപ്പെടുത്തിയേക്കാം. ഏഷ്യൻ പാരാ ഗെയിംസിലെ തന്റെ ഇനങ്ങളിൽ മത്സരിക്കുന്നതിന് മുമ്പ് തന്നെ താരത്തിന് മടങ്ങേണ്ടി വന്നു.

ഒക്ടോബർ 19 തിങ്കളാഴ്ചയാണ് ഇന്ത്യൻ കായികതാരങ്ങൾ താമസിച്ചിരുന്ന ഹോട്ടലിൽ വെച്ച് ഈ സംഭവമുണ്ടായത്. ഹോട്ടലിലെ ഹൗസ് കീപ്പിംഗ് ജീവനക്കാരി ഷെയ്ഖിന്റെ മുറിയിൽ ജോലി ചെയ്യുന്നതിനിടെ അദ്ദേഹം അവരെ അനുചിതമായി സ്പർശിക്കുകയും കടന്നുപിടിക്കാൻ ശ്രമിക്കുകയും ചെയ്തുവെന്നാണ് ആരോപണം. ഉടൻ തന്നെ മുറിയിൽ നിന്ന് പുറത്തിറങ്ങിയ ജീവനക്കാരി തൻ്റെ മേലുദ്യോഗസ്ഥരെ വിവരമറിയിക്കുകയായിരുന്നു. തുടർന്ന് പ്രാദേശിക സംഘാടക സമിതി ഇന്ത്യൻ അധികൃതരെ വിവരമറിയിക്കുകയും ജാപ്പനീസ് പോലീസ് വിഷയത്തിൽ ഇടപെടുകയും ചെയ്തു.

പരാതിയെത്തുടർന്ന് ജാപ്പനീസ് പോലീസ് ഷെയ്ഖിനെ കസ്റ്റഡിയിലെടുത്ത് ചോദ്യം ചെയ്തു. തുടർന്ന് ഒക്ടോബർ 20 ചൊവ്വാഴ്ച അദ്ദേഹത്തെ ജപ്പാനിൽ നിന്ന് ഇന്ത്യയിലേക്ക് തിരിച്ചയക്കാൻ അധികൃതർ അനുമതി നൽകുകയായിരുന്നു. ഈ സംഭവം ഇന്ത്യൻ കായിക സംഘത്തിന് വലിയ നാണക്കേടുണ്ടാക്കിയിട്ടുണ്ട്. വിഷയത്തിൽ പാരാലിമ്പിക് കമ്മിറ്റി ഓഫ് ഇന്ത്യ താരത്തിനെതിരെ ആജീവനാന്ത വിലക്ക് ഉൾപ്പെടെയുള്ള കർശന അച്ചടക്ക നടപടികൾ പരിഗണിക്കുന്നതായാണ് റിപ്പോർട്ടുകൾ. ഏഷ്യൻ പാരാ ഗെയിംസിന്റെ നിയമാവലി പ്രകാരം കായികതാരങ്ങൾ മത്സരവേദികൾക്ക് പുറത്തും കർശനമായ പെരുമാറ്റച്ചട്ടങ്ങൾ പാലിക്കേണ്ടതുണ്ട്.

ബിഹാർ സ്വദേശിയായ മുഹമ്മദ് ഷംസ് ആലം ഷെയ്ഖ് പാരാ നീന്തലിൽ ഇന്ത്യയ്ക്കായി നിരവധി അന്താരാഷ്ട്ര നേട്ടങ്ങൾ കൈവരിച്ച കായികതാരമാണ്. 2018-ൽ ഇന്തോനേഷ്യയിലെ ജക്കാർത്തയിൽ നടന്ന ഏഷ്യൻ പാരാ ഗെയിംസിൽ 200 മീറ്റർ, 50 മീറ്റർ ബ്രെസ്റ്റ്സ്ട്രോക്ക് ഇനങ്ങളിൽ അദ്ദേഹം സ്വർണ്ണ മെഡലുകൾ നേടിയിരുന്നു. പുരുഷന്മാരുടെ 100 മീറ്റർ ബട്ടർഫ്ലൈ എസ് 5, 50 മീറ്റർ ബ്രെസ്റ്റ്സ്ട്രോക്ക് എസ്ബി 4 വിഭാഗങ്ങളിൽ മുൻ ലോക ഒന്നാം നമ്പർ താരമായിരുന്ന അദ്ദേഹം 2025-ൽ ഐസ്‌ലാൻഡിൽ നടന്ന റെയ്ക്ജാവീക് ഇൻ്റർനാഷണൽ ഗെയിംസിലും സ്വർണ്ണം നേടിയിട്ടുണ്ട്. അദ്ദേഹത്തിന്റെ തുടർച്ചയായ മൂന്നാമത്തെ ഏഷ്യൻ പാരാ ഗെയിംസ് വേദിയായിരുന്നു നഗോയയിലേത്.