‘ഇസ്രയേലിൽ ജനാധിപത്യം ഭീഷിണിയിൽ; രാജ്യത്തെ ഇസ്ലാമികവൽക്കരിക്കാനുള്ള നീക്കമാണ് നടക്കുന്നത്; അറബ് പാർട്ടികൾ പ്രവർത്തിക്കുന്നത് വിദേശ ഫണ്ടുപയോഗിച്ച്’; ബെഞ്ചമിൻ നെതന്യാഹു
തെൽഅവീവ്: ഇസ്രയേലിൽ നടന്ന പൊതുതെരഞ്ഞെടുപ്പിന്റെ അന്തിമ ഫലം പുറത്തുവരാനിരിക്കെ രാജ്യത്ത് വൻ രാഷ്ട്രീയ വിവാദം. നിലവിലെ പ്രധാനമന്ത്രി ബെഞ്ചമിൻ നെതന്യാഹുവിനും അദ്ദേഹത്തിന്റെ വലതുപക്ഷ സഖ്യത്തിനും പാർലമെന്റിൽ ഭൂരിപക്ഷം നഷ്ടപ്പെട്ടുവെന്ന റിപ്പോർട്ടുകൾക്ക് പിന്നാലെയാണ് അറബ് പാർട്ടികൾക്കെതിരെ കടുത്ത ആരോപണങ്ങളുമായി നെതന്യാഹുവും അദ്ദേഹത്തിന്റെ ലിക്കുഡ് പാർട്ടിയും രംഗത്തെത്തിയത്.
തെരഞ്ഞെടുപ്പ് അട്ടിമറിക്കപ്പെട്ടുവെന്നും വിദേശ ഫണ്ടുകൾ ഉപയോഗിച്ച് പ്രവർത്തിക്കുന്ന അറബ് പാർട്ടികൾ ഇസ്രയേലിനെ ഇസ്ലാമികവൽക്കരിക്കാനും വലതുപക്ഷ സർക്കാരിനെ താഴെയിറക്കാനും ശ്രമിക്കുകയാണെന്നുമാണ് യാതൊരു തെളിവുകളുമില്ലാതെ ലിക്കുഡ് പാർട്ടി ആരോപിക്കുന്നത്. ഇസ്രയേൽ പാർലമെന്റായ നെസ്സെറ്റ് പിടിച്ചെടുക്കാൻ വിദേശ ശക്തികൾ ശ്രമിക്കുന്നുണ്ടെന്നും അതിനാൽ ഒരു പാർട്ടിയും അറബ് പാർട്ടികളുമായി സഹകരിക്കരുതെന്നും നെതന്യാഹു ആവശ്യപ്പെട്ടു.
തെരഞ്ഞെടുപ്പിൽ വിദേശ ഇടപെടൽ നടന്നുവെന്ന ആരോപണത്തെത്തുടർന്ന് ഇസ്രയേൽ തെരഞ്ഞെടുപ്പ് കമ്മിറ്റി രാജ്യത്തെ രഹസ്യാന്വേഷണ ഏജൻസിയായ ഷിൻ ബെറ്റിനോട് അന്വേഷണം നടത്താൻ ആവശ്യപ്പെട്ടിട്ടുണ്ട്. വിദേശ ഏജൻസികളെക്കുറിച്ചാണ് അന്വേഷണത്തിന് ഉത്തരവിട്ടതെങ്കിലും, ലിക്കുഡ് പാർട്ടി ഇത് അറബ് പാർട്ടികൾക്കെതിരെയുള്ള ആയുധമാക്കുകയായിരുന്നു. എന്നാൽ അറബ് വോട്ടുകൾ സ്വാധീനിക്കാൻ പണം നൽകിയെന്ന ആരോപണം ഖത്തർ ശക്തമായി നിഷേധിച്ചു. ഇസ്രയേൽ തെരഞ്ഞെടുപ്പിൽ തങ്ങൾ യാതൊരുവിധ ഇടപെടലുകളും നടത്തിയിട്ടില്ലെന്നും ഈ ആരോപണങ്ങൾ പൂർണ്ണമായും തള്ളിക്കളയുന്നതായും ഖത്തർ വ്യക്തമാക്കി. ഷിൻ ബെറ്റ് അന്വേഷണ റിപ്പോർട്ട് ഒരാഴ്ചയ്ക്കകം സമർപ്പിക്കാനാണ് തെരഞ്ഞെടുപ്പ് കമ്മിറ്റിയുടെ നിർദേശം. രാജ്യത്തെ നിയമപ്രകാരം നവംബർ നാലിനകം തെരഞ്ഞെടുപ്പ് ഫലം ഔദ്യോഗികമായി പ്രഖ്യാപിക്കേണ്ടതുണ്ട്.
അതേസമയം നെതന്യാഹുവിന്റെ അടിസ്ഥാനരഹിതമായ ആരോപണങ്ങൾക്കെതിരെ പ്രതിപക്ഷവും അറബ് നേതാക്കളും ശക്തമായി രംഗത്തെത്തി. സ്വന്തം തോൽവി മുന്നിൽക്കണ്ട നെതന്യാഹു തെരഞ്ഞെടുപ്പ് അട്ടിമറിക്കാൻ ശ്രമിക്കുകയാണെന്ന് അറബ് പാർട്ടികളുടെ സഖ്യമായ ജോയിന്റ് ലിസ്റ്റ് ആരോപിച്ചു. അറബ് ജനതയെ ലക്ഷ്യം വെച്ചുകൊണ്ട് തെരഞ്ഞെടുപ്പ് ഫലം അട്ടിമറിക്കാനുള്ള നെതന്യാഹുവിന്റെ ശ്രമം വിലപ്പോവില്ലെന്ന് ഡെമോക്രാറ്റ്സ് പാർട്ടി തലവൻ യെയർ ഗോലാൻ പറഞ്ഞു. വിദേശ ഇടപെടലിനെക്കുറിച്ചുള്ള അന്വേഷണത്തെ സ്വാഗതം ചെയ്ത റാം പാർട്ടി നേതാവ് മൻസൂർ അബ്ബാസ്, തങ്ങൾക്ക് ഇതിൽ യാതൊരു പങ്കുമില്ലെന്നും നെതന്യാഹു ജനങ്ങൾക്കിടയിൽ വിദ്വേഷം പടർത്തുകയാണെന്നും കുറ്റപ്പെടുത്തി. പുതിയ സർക്കാരിന്റെ സത്യപ്രതിജ്ഞ നടക്കുന്ന നവംബർ പത്തിന് മുൻപ് രാഷ്ട്രീയ മുതലെടുപ്പുകൾക്ക് ആരും ശ്രമിക്കരുതെന്ന് നെതന്യാഹുവിന്റെ പ്രധാന എതിരാളിയും മുൻ സൈനിക മേധാവിയുമായ ഗാഡി ഐസൻകോട്ട് മുന്നറിയിപ്പ് നൽകി.
തെരഞ്ഞെടുപ്പിൽ വ്യാപകമായ ക്രമക്കേടുകൾ നടന്നതിന് ഇതുവരെ യാതൊരു തെളിവുകളും ലഭിച്ചിട്ടില്ലെന്ന് തെരഞ്ഞെടുപ്പ് കമ്മിറ്റി വ്യക്തമാക്കി. സർക്കാരിനെ രൂപീകരിക്കാൻ നേതാക്കളെ ക്ഷണിക്കേണ്ട പ്രസിഡന്റ് ഐസക് ഹെർസോഗും വിഷയത്തിൽ പ്രതികരിച്ചു. ഇതൊരു സെൻസിറ്റീവ് സമയമാണെന്നും വിശദമായ അന്വേഷണം നടക്കട്ടെയെന്നും പറഞ്ഞ അദ്ദേഹം, വോട്ടുചെയ്യാൻ അവകാശം വിനിയോഗിച്ച ഒരു വലിയ ജനവിഭാഗത്തെ മുഴുവൻ അപമാനിക്കരുതെന്നും കൂട്ടിച്ചേർത്തു. രാജ്യത്തെ ജനസംഖ്യയുടെ ഇരുപത് ശതമാനം വരുന്ന അറബ് വോട്ടർമാർ ഇത്തവണ ചരിത്രത്തിലില്ലാത്ത വിധം വലിയ തോതിലാണ് വോട്ട് രേഖപ്പെടുത്തിയത്. നെതന്യാഹുവിന്റെ വിവേചനപരമായ നയങ്ങളോടുള്ള പ്രതിഷേധമാണ് അവരെ കൂട്ടത്തോടെ പോളിംഗ് ബൂത്തുകളിലെത്തിക്കാൻ കാരണമായത്.
120 അംഗ ഇസ്രയേൽ പാർലമെന്റിൽ ഭൂരിപക്ഷത്തിന് 61 സീറ്റുകളാണ് വേണ്ടത്. പ്രാദേശിക മാധ്യമങ്ങളുടെ റിപ്പോർട്ടുകൾ പ്രകാരം നെതന്യാഹുവിന്റെ സഖ്യത്തിന് 53 സീറ്റുകളും പ്രതിപക്ഷത്തിന് 48 സീറ്റുകളും അറബ് പാർട്ടികൾക്ക് 19 സീറ്റുകളുമാണ് ലഭിക്കാൻ സാധ്യത. അറബ് പാർട്ടികളുടെ പിന്തുണ ലഭിച്ചാൽ പ്രതിപക്ഷത്തിന് ഇസ്രയേലിൽ പുതിയ സർക്കാർ രൂപീകരിക്കാനാകും. ഇതിന്റെ ഭാഗമായി ജൂത-അറബ് സഖ്യം അധികാരത്തിൽ വരണമെന്നാവശ്യപ്പെട്ട് ടെൽ അവീവിലും യാഥാസ്ഥിതിക മേഖലയായ ജറുസലേമിലും റാലികൾ നടന്നു. നെസ്സെറ്റ് സ്പീക്കറെ തെരഞ്ഞെടുക്കുന്നതിലടക്കം അറബ് പാർട്ടികൾക്ക് നിർണായക പങ്കുവഹിക്കാൻ കഴിയും. സ്പീക്കർ സ്ഥാനത്തേക്ക് പ്രതിപക്ഷ സ്ഥാനാർത്ഥിയെ പിന്തുണയ്ക്കുമെന്ന് ജോയിന്റ് ലിസ്റ്റ് നേതാവ് അഹമ്മദ് തിബി വ്യക്തമാക്കിയിട്ടുണ്ട്. 2021-ന് മുൻപ് ഇസ്രയേൽ ചരിത്രത്തിൽ ഒരു അറബ് പാർട്ടിയും ഭരണസഖ്യത്തിന്റെ ഭാഗമായിരുന്നില്ല.
തെരഞ്ഞെടുപ്പിൽ പരാജയപ്പെട്ട് അധികാരം നഷ്ടപ്പെട്ടാൽ നെതന്യാഹു വർഷങ്ങൾ പഴക്കമുള്ള അഴിമതിക്കേസുകൾ നേരിടേണ്ടി വരും. കൂടാതെ 2023 ഒക്ടോബർ ഏഴിന് ഹമാസ് നടത്തിയ ആക്രമണത്തിന് വഴിവെച്ച സുരക്ഷാ വീഴ്ചകളെക്കുറിച്ചുള്ള അന്വേഷണവും അദ്ദേഹത്തിന് നേരിടേണ്ടി വരും. ഗസ്സയിലെയും വെസ്റ്റ് ബാങ്കിലെയും ഫലസ്തീനികൾക്ക് നേരെയുള്ള ആക്രമണങ്ങൾ, ബന്ദികളെ മോചിപ്പിക്കുന്നതിലെ കാലതാമസം, യാഥാസ്ഥിതിക ജൂതവിഭാഗത്തിന് സൈനിക സേവനത്തിൽ നൽകുന്ന ഇളവുകൾ തുടങ്ങി നിരവധി വിഷയങ്ങൾ ഇസ്രയേൽ സമൂഹത്തെ വിഭജിച്ചിരിക്കുന്ന സാഹചര്യത്തിലാണ് ഈ തെരഞ്ഞെടുപ്പ് ഫലം വരുന്നത്. സർക്കാരുണ്ടാക്കാൻ ആർക്കും കഴിഞ്ഞില്ലെങ്കിൽ അടുത്ത വർഷം ആദ്യം വീണ്ടും തെരഞ്ഞെടുപ്പ് നടത്തേണ്ടി വരും. അതിനിടെ, ഇറാനുമായുള്ള യുദ്ധഭീതി നിലനിൽക്കുന്നതിനാൽ ഈ സുരക്ഷാ സാഹചര്യം മുതലെടുത്ത് തന്റെ നേതൃത്വത്തിലുള്ള ഒരു ഐക്യ സർക്കാർ രൂപീകരിക്കാൻ നെതന്യാഹു ശ്രമിച്ചേക്കുമെന്നും വിലയിരുത്തലുകളുണ്ട്. പുതിയ സർക്കാരിൽ തങ്ങൾക്കും അവകാശങ്ങൾ ലഭിക്കുമെന്ന വലിയ പ്രതീക്ഷയിലാണ് ഇസ്രയേലിലെ അറബ് ജനത.