മഹാത്മാ ഗാന്ധിയുടെ പേര് വെട്ടും; തൊഴിലുറപ്പ് പദ്ധതിയിൽ ഭേദഗതിയുമായി കേന്ദ്രം
ന്യൂഡൽഹി: തൊഴിലുറപ്പ് പദ്ധതിയിൽ ഗാന്ധിജിയുടെ പേര് നീക്കം ചെയ്യാനും കേന്ദ്രവിഹിതം കുറയ്ക്കാനും തീരുമാനിച്ച് കേന്ദ്രസർക്കാർ. നിലവിലുള്ള മഹാത്മാഗാന്ധി ദേശീയ ഗ്രാമീണ തൊഴിലുറപ്പ് നിയമത്തിന് (എംജിഎൻആർഇജിഎ) പകരമായി വികസിത് ഭാരത് റോസ്ഗാർ ആൻഡ് അജീവിക മിഷൻ (ഗ്രാമീൺ) VB-G RAM-G ബിൽ 2025 എന്ന പേരിൽ പുതിയ നിയമനിർമ്മാണം കൊണ്ടുവരാൻ കേന്ദ്രം ഒരുങ്ങുകയാണ്. പുതിയ നിയമമനുസരിച്ച്, കേന്ദ്രം 100% വഹിച്ചിരുന്ന ഫണ്ടിംഗിൽ നിന്ന് മാറി കേന്ദ്രസംസ്ഥാന പങ്കാളിത്തത്തിലേക്ക് പദ്ധതി മാറുന്നതാണ് പ്രധാന ഭേദഗതി. കൂടാതെ, തൊഴിലുറപ്പ് പദ്ധതിയിൽ നിന്ന് മഹാത്മാഗാന്ധിയുടെ പേര് ഒഴിവാക്കാനും പുതിയ ബിൽ ലക്ഷ്യമിടുന്നുണ്ട്.
2047ലെ വികസിത് ഭാരതമെന്ന ദേശീയ കാഴ്ചപ്പാടിന് അനുസൃതമായ ഗ്രാമീണ വികസന ചട്ടക്കൂട് സ്ഥാപിക്കുകയാണ് ബില്ലിന്റെ ലക്ഷ്യം. പുതിയ നിയമപ്രകാരം, അവിദഗ്ധ കായിക ജോലികൾക്ക് സന്നദ്ധത പ്രകടിപ്പിക്കുന്ന മുതിർന്ന അംഗങ്ങൾക്ക് ഓരോ സാമ്പത്തിക വർഷത്തിലും 125 ദിവസത്തെ വേതന തൊഴിൽ നിയമപരമായി ഉറപ്പുനൽകും. നിലവിൽ എംജിഎൻആർഇജിഎ പ്രകാരം 100 ദിവസമാണ് തൊഴിലുറപ്പ്.
പ്രധാന മാറ്റങ്ങൾ:
തൊഴിൽ ദിനം: 100ൽ നിന്ന് 125 ദിവസമായി വർദ്ധിപ്പിച്ചു.
ഫണ്ട് പങ്കിടൽ: എംജിഎൻആർഇജിഎ പ്രകാരം കേന്ദ്രം 100% ധനസഹായം നൽകിയിരുന്നിടത്ത്, പുതിയ പദ്ധതി കേന്ദ്രസംസ്ഥാന പങ്കാളിത്തത്തോടെയായിരിക്കും. വടക്കുകിഴക്കൻ, ഹിമാലയൻ സംസ്ഥാനങ്ങൾക്ക് 90:10 എന്ന അനുപാതത്തിലും മറ്റ് സംസ്ഥാനങ്ങൾക്ക് 60:40 എന്ന അനുപാതത്തിലുമായിരിക്കും ഫണ്ട് പങ്കിടൽ.
കാർഷിക സീസണിലെ വിലക്ക്: കാർഷിക മേഖലയിലെ തിരക്കുള്ള സീസണുകളിൽ തൊഴിലാളികളുടെ ലഭ്യത ഉറപ്പാക്കുന്നതിനായി, ആ സമയങ്ങളിൽ ഈ പദ്ധതി പ്രകാരമുള്ള ജോലികൾ നിരോധിക്കുന്ന വ്യവസ്ഥ ബില്ലിൽ ആദ്യമായി ഉൾപ്പെടുത്തിയിട്ടുണ്ട്.
ഭരണ സംവിധാനം: പദ്ധതിയുടെ മേൽനോട്ടം വഹിക്കുന്നതിനായി കേന്ദ്രതലത്തിൽ സെൻട്രൽ ഗ്രാമീൺ റോസ്ഗാർ ഗ്യാരണ്ടി കൗൺസിലും സംസ്ഥാനതലത്തിൽ സംസ്ഥാന ഗ്രാമീൺ റോസ്ഗാർ ഗ്യാരണ്ടി കൗൺസിലും രൂപീകരിക്കും. പഞ്ചായത്ത് രാജ് സ്ഥാപനങ്ങൾ, തൊഴിലാളികളുടെ പ്രതിനിധികൾ എന്നിവരും കൗൺസിലിൽ അംഗങ്ങളായിരിക്കും.
തൊഴിലില്ലായ്മ വേതനം: അപേക്ഷ ലഭിച്ച് 15 ദിവസത്തിനകം തൊഴിൽ നൽകിയില്ലെങ്കിൽ, അപേക്ഷകന് ദൈനംദിന തൊഴിലില്ലായ്മ വേതനത്തിന് അർഹതയുണ്ടായിരിക്കും.
വികസിത് ഭാരത് നാഷണൽ റൂറൽ ഇൻഫ്രാസ്ട്രക്ചർ സ്റ്റാക്ക് രൂപീകരിക്കുന്നതിലേക്ക് സംയോജിപ്പിച്ചുകൊണ്ട്, ജലസുരക്ഷ ഉൾപ്പെടെയുള്ള പ്രധാന അടിസ്ഥാന സൗകര്യ വികസന പ്രവൃത്തികളിലായിരിക്കും പുതിയ പദ്ധതി ശ്രദ്ധ കേന്ദ്രീകരിക്കുക. സംസ്ഥാനങ്ങൾക്ക് അവരുടെ സ്വന്തം നിയമം നടപ്പിലാക്കാനുള്ള ഓപ്ഷനും ബില്ലിൽ നൽകുന്നുണ്ട്.
