99% ഹൃദയാഘാതങ്ങൾക്കും കാരണം ഈ 5 ‘നിശബ്ദ വില്ലന്മാർ’! തിരിച്ചറിയാം, പ്രതിരോധിക്കാം
ഇന്ത്യയിൽ ഹൃദയാഘാത മരണങ്ങൾ വർധിച്ചുവരുന്ന സാഹചര്യത്തിൽ സുപ്രധാന മുന്നറിയിപ്പുമായി ആരോഗ്യവിദഗ്ധർ. രാജ്യത്ത് റിപ്പോർട്ട് ചെയ്യപ്പെടുന്ന 99 ശതമാനം ഹൃദയാഘാതങ്ങൾക്കും പക്ഷാഘാതങ്ങൾക്കും പിന്നിൽ പ്രധാനമായും അഞ്ച് അപകട ഘടകങ്ങളാണുള്ളതെന്ന് റിപ്പോർട്ടുകൾ ചൂണ്ടിക്കാട്ടുന്നു. പലപ്പോഴും പ്രാരംഭഘട്ടത്തിൽ ലക്ഷണങ്ങൾ പ്രകടിപ്പിക്കാത്തതിനാൽ ഈ ‘നിശബ്ദ ഘാതകരെ’ തിരിച്ചറിയാൻ വൈകുന്നതാണ് അപകടസാധ്യത വർധിപ്പിക്കുന്നത്.
മരണകാരണമാകുന്നതുവരെ പലരും അവഗണിക്കുന്ന ആ 5 പ്രധാന വില്ലന്മാർ ഇവയാണ്:
- ഉയർന്ന രക്തസമ്മർദ്ദം(Blood Pressure): മരുന്നുകൾ കഴിക്കേണ്ട അളവിലല്ലെങ്കിൽ പോലും, രക്തസമ്മർദ്ദത്തിലുണ്ടാകുന്ന ചെറിയ വർധനവ് പോലും ദീർഘകാലാടിസ്ഥാനത്തിൽ ധമനികളെ തകരാറിലാക്കാം. ഇത് ഹൃദയത്തിൻ്റെ പ്രവർത്തനത്തെ ബാധിക്കുന്നു.
- രക്തത്തിലെ പഞ്ചസാരയും പ്രീഡയബറ്റിസും: പ്രമേഹരോഗികളിൽ മാത്രമല്ല, പ്രമേഹത്തിന് തൊട്ടുമുമ്പുള്ള അവസ്ഥയിലുള്ളവരിലും (Prediabetes) ഹൃദയാഘാത സാധ്യത കൂടുതലാണ്. പഞ്ചസാരയുടെ അളവിലുണ്ടാകുന്ന നേരിയ വ്യതിയാനം പോലും രക്തക്കുഴലുകളെ ക്രമേണ നശിപ്പിക്കുന്നു.
- ഉയർന്ന കൊളസ്ട്രോൾ: ചീത്ത കൊളസ്ട്രോൾ (LDL) യാതൊരു ലക്ഷണങ്ങളും കാണിക്കാതെ ധമനികളിൽ അടിഞ്ഞുകൂടുന്നു. ബ്ലോക്കുകൾ രൂപപ്പെട്ട് ഒടുവിൽ ഹൃദയാഘാതത്തിലേക്ക് നയിക്കുന്നതുവരെ ഇത് തിരിച്ചറിയപ്പെടാതെ പോകുന്നു.
- ഉദര സംബന്ധമായ അമിതവണ്ണം (Central Obesity): സാധാരണ ശരീരഭാരമുള്ളവരാണെങ്കിൽ പോലും വയറിനു ചുറ്റും കൊഴുപ്പ് അടിഞ്ഞുകൂടുന്നത് ഇന്ത്യക്കാരിൽ വലിയ ഭീഷണിയാണ്. ഇത് പ്രമേഹം, ബിപി എന്നിവയുമായി നേരിട്ട് ബന്ധപ്പെട്ടിരിക്കുന്നു. അരക്കെട്ടിന്റെ അളവ് കൂടുന്നത് അപായ സൂചനയാണ്.
- വായു മലിനീകരണം: അന്തരീക്ഷ മലിനീകരണം ശ്വാസകോശത്തെ മാത്രമല്ല, ഹൃദയത്തെയും ബാധിക്കുന്നു. മലിനമായ വായുവിലെ സൂക്ഷ്മകണങ്ങൾ രക്തത്തിൽ കലരുന്നത് ഹൃദയധമനികളിൽ വീക്കമുണ്ടാക്കാനും ഹൃദയാഘാതത്തിനും കാരണമാകുന്നു.
ശ്രദ്ധിക്കേണ്ട ലക്ഷണങ്ങൾ
നെഞ്ചുവേദന, നെഞ്ചിൽ ഭാരം അനുഭവപ്പെടുക, നേരിയ ശ്വാസംമുട്ടൽ, അസാധാരണമായ വിയർപ്പ്, ഓക്കാനം, തലകറക്കം, താടിയെല്ലിലോ കൈകളിലോ അനുഭവപ്പെടുന്ന വേദനയോ തളർച്ചയോ എന്നിവ അവഗണിക്കരുത്.
പ്രതിരോധം എങ്ങനെ?
കൃത്യമായ ഇടവേളകളിൽ ബിപി, ഷുഗർ, കൊളസ്ട്രോൾ എന്നിവ പരിശോധിക്കുക എന്നതാണ് പ്രധാനം. പുകവലി പൂർണ്ണമായും ഉപേക്ഷിക്കുക, വായു മലിനീകരണം കൂടിയ സാഹചര്യങ്ങളിൽ മാസ്ക് ധരിക്കുകയോ പുറത്തിറങ്ങുന്നത് കുറയ്ക്കുകയോ ചെയ്യുക. ധാന്യങ്ങളും പച്ചക്കറികളും അടങ്ങിയ ഭക്ഷണരീതിയും, ദിവസേനയുള്ള വ്യായാമവും, മാനസിക സമ്മർദ്ദം കുറയ്ക്കാനുള്ള മാർഗ്ഗങ്ങളും ഹൃദയാരോഗ്യം സംരക്ഷിക്കാൻ അനിവാര്യമാണ്.
