ഐഫോണിനെ മലർത്തിയടിക്കാൻ സാംസങ്; എസ്26 അൾട്ര വരുന്നത് 5 വമ്പൻ മാറ്റങ്ങളുമായി
ആപ്പിളിന്റെ ഐഫോൺ 17 പ്രോ മാക്സിനെ വെല്ലുവിളിക്കാൻ സാംസങ് ഗാലക്സി എസ്26 അൾട്ര ഉടൻ വിപണിയിലെത്തും. മുൻനിര ഫ്ലാഗ്ഷിപ്പായ ഐഫോണിനെ മറികടക്കാൻ ഇത്തവണ കൊറിയൻ ഫോൺ നിർമ്മാതാക്കളായ സാംസങ് അഞ്ച് പ്രധാന മേഖലകളിലാണ് വിപ്ലവകരമായ മാറ്റങ്ങൾ കൊണ്ടുവരുന്നത്.
- അത്യാധുനിക ഡിസ്പ്ലേ സാങ്കേതികവിദ്യ
ഐഫോൺ 17 പ്രോ മാക്സിലെ 6.9 ഇഞ്ച് OLED പാനലിനെ വെല്ലാൻ സാംസങ് അവതരിപ്പിക്കുന്നത് പുതിയ ‘പ്രൈവസി സ്ക്രീൻ’ സൗകര്യമാണ്. പുറത്ത് ഫോൺ ഉപയോഗിക്കുമ്പോൾ മറ്റുള്ളവർക്ക് സ്ക്രീനിലെ വിവരങ്ങൾ കാണാൻ കഴിയാത്ത വിധം സെൻസിറ്റീവ് വിവരങ്ങൾ ഇത് മറയ്ക്കും. കൂടാതെ, സാംസങ്ങിന്റെ പുതിയ M14 AMOLED പാനൽ കൂടുതൽ തിളക്കമുള്ള നിറങ്ങളും ഉയർന്ന റെസല്യൂഷനും ഉറപ്പാക്കുന്നു. - കരുത്തുറ്റ പെർഫോമൻസ്
ആപ്പിളിന്റെ A19 പ്രോ ചിപ്സെറ്റിനെ നേരിടാൻ സാംസങ് ഇത്തവണ രണ്ട് കരുത്തുറ്റ പ്രോസസറുകളാണ് ഒരുക്കുന്നത്. 2nm പ്രോസസ്സിൽ നിർമ്മിച്ച ലോകത്തിലെ ആദ്യത്തെ പ്രോസസറായ എക്സിനോസ് 2600 ചില വിപണികളിൽ എത്തുമ്പോൾ, മറ്റ് വിപണികളിൽ ഏറ്റവും പുതിയ സ്നാപ്ഡ്രാഗൺ 8 എലൈറ്റ് ജെൻ 5 ഉപയോഗിക്കും. പ്രകടനം മെച്ചപ്പെടുത്താൻ പ്രത്യേക വേപ്പർ കൂളിംഗ് ചേമ്പറും എസ്26 അൾട്രയിൽ ഉണ്ടാകും. - മെച്ചപ്പെടുത്തിയ ക്യാമറ സംവിധാനം
ഐഫോണിലെ 48 മെഗാപിക്സൽ ട്രിപ്പിൾ ക്യാമറയെ നേരിടാൻ സാംസങ് തങ്ങളുടെ പ്രശസ്തമായ ക്വാഡ്ക്യാമറ സെറ്റപ്പ് നിലനിർത്തും. 200 മെഗാപിക്സൽ മെയിൻ സെൻസറിനൊപ്പം ഇമേജ് പ്രോസസ്സിംഗിലും വലിയ മാറ്റങ്ങൾ സാംസങ് കൊണ്ടുവരുന്നുണ്ട്. ഇത് മികച്ച സ്കിൻ ടോണുകളും കൂടുതൽ വ്യക്തതയുള്ള രാത്രികാല ചിത്രങ്ങളും (Low-light photography) ഉറപ്പാക്കും. - വേഗത്തിലുള്ള ചാർജിംഗ്
ചാർജിംഗിന്റെ കാര്യത്തിൽ സാംസങ് ഇത്തവണ ആപ്പിളിനെ ബഹുദൂരം പിന്നിലാക്കും. ഐഫോൺ 17 പ്രോ മാക്സിലെ 40W ഫാസ്റ്റ് ചാർജിംഗിന് പകരമായി 60W ഫാസ്റ്റ് ചാർജിംഗ് പിന്തുണയാകും സാംസങ് നൽകുക. കൂടാതെ, ആപ്പിളിന്റെ മാഗ്സേഫ് ആക്സസറികൾ സപ്പോർട്ട് ചെയ്യുന്ന Qi2 വയർലെസ് ചാർജിംഗ് സാങ്കേതികവിദ്യയും ഈ ഫോണിൽ പ്രതീക്ഷിക്കുന്നുണ്ട്. - ഗാലക്സി AI കരുത്ത്
ആർട്ടിഫിഷ്യൽ ഇന്റലിജൻസിൽ ആപ്പിൾ ഇന്റലിജൻസിനെക്കാൾ ബഹുദൂരം മുന്നിലെത്താനാണ് സാംസങ്ങിന്റെ നീക്കം. സാൻ ഫ്രാൻസിസ്കോയിൽ നടക്കുന്ന ലോഞ്ച് ഇവന്റിൽ AI ഫീച്ചറുകൾക്ക് പ്രത്യേക പ്രാധാന്യം നൽകും. ജെമിനി ലൈവ് ഉൾപ്പെടെയുള്ള അത്യാധുനിക AI സൗകര്യങ്ങൾ സാംസങ് ഫോണുകളിൽ ലഭ്യമാകും.
