കോൺഗ്രസ് നേതാക്കൾക്കെതിരെ മൊഴി നൽകാൻ CBI സമ്മർദം നേരിട്ട ബ്രിട്ടീഷ് പൗരൻ; 7 വർഷമായി വിചാരണയില്ലാതെ തടവറയിൽ; ക്രിസ്റ്റ്യൻ മൈക്കിളിനെ മോചിപ്പിക്കാൻ സമ്മർദവുമായി ബ്രിട്ടൻ
ലണ്ടൻ: ബ്രിട്ടീഷ് പൗരനായ ക്രിസ്റ്റ്യൻ മൈക്കിളിനെ വിചാരണയില്ലാതെ ഏഴ് വർഷത്തോളമായി ഇന്ത്യയിൽ തടങ്കലിൽ വെച്ചിരിക്കുന്ന വിഷയത്തിൽ യുകെ ഇന്ത്യക്കുമേൽ സമ്മർദ്ദം ശക്തമാക്കി. ഈ മാസം 11-ന് കാനഡയിൽ നടന്ന ജി7 വിദേശകാര്യ മന്ത്രിമാരുടെ യോഗത്തിൽ വെച്ച് ബ്രിട്ടീഷ് വിദേശകാര്യ സെക്രട്ടറി യെവെറ്റ് കൂപ്പർ, ഇന്ത്യൻ വിദേശകാര്യ മന്ത്രി എസ്. ജയശങ്കറുമായി നടത്തിയ കൂടിക്കാഴ്ചയിൽ ഈ വിഷയം ശക്തമായി ഉന്നയിച്ചു.
മൈക്കിളിൻ്റെ കേസ് പരിഹരിക്കപ്പെടുന്നതുവരെ എല്ലാ ഉചിതമായ അവസരങ്ങളിലും ഇന്ത്യാ ഗവൺമെൻ്റിനോട് വിഷയം ഉന്നയിക്കുന്നത് തുടരുമെന്ന് യുകെ വിദേശകാര്യ ഓഫീസ് (എഫ്സിഡിഒ) ഔദ്യോഗികമായി അറിയിച്ചു. കഴിഞ്ഞ മാസം 9-ന് മുംബൈയിൽ വെച്ച് ബ്രിട്ടീഷ് പ്രധാനമന്ത്രി കീർ സ്റ്റാർമർ ഇന്ത്യൻ പ്രധാനമന്ത്രി നരേന്ദ്ര മോദിയുമായി മൈക്കിളിൻ്റെ ദുരവസ്ഥ രണ്ടാമതും ചർച്ച ചെയ്തതിന് തൊട്ടുപിന്നാലെയാണ് ബ്രിട്ടീഷ് വിദേശകാര്യ സെക്രട്ടറിയുടെ ഈ നീക്കം.
വിവിഐപി ആവശ്യങ്ങൾക്കായി ഹെലികോപ്റ്റർ വാങ്ങിയതുമായി ബന്ധപ്പെട്ട അഗസ്റ്റ വെസ്റ്റ്ലാൻഡ് അഴിമതി കേസിലെ ഇടനിലക്കാരനാണ് ക്രിസ്റ്റ്യൻ മൈക്കിൾ. 2018 ഡിസംബറിലാണ് ഇദ്ദേഹത്തെ ദുബൈയിൽ നിന്ന് ഇന്ത്യയിലേക്ക് കൈമാറിയത്.
ഇറ്റാലിയൻ കോടതി കുറ്റവിമുക്തനാക്കിയ വ്യക്തിയാണ് മൈക്കിൾ. മൈക്കിളിൻ്റെ തടങ്കൽ മനുഷ്യാവകാശ ലംഘനമാണെന്ന് യുഎൻ വർക്കിംഗ് ഗ്രൂപ്പ് നേരത്തെ പ്രഖ്യാപിച്ചിരുന്നു.
നിയമപരമായ കൈമാറ്റത്തിന് വിരുദ്ധമായി, ചില കോൺഗ്രസ് നേതാക്കൾക്കെതിരെ കുറ്റസമ്മതം നടത്താൻ മുൻ സിബിഐ ഉദ്യോഗസ്ഥൻ രാകേഷ് അസ്താന സമ്മർദ്ദം ചെലുത്തി എന്ന് മൈക്കിൾ കോടതിയിൽ വെളിപ്പെടുത്തിയിരുന്നു. എന്നാൽ അസ്താന ഈ ആരോപണങ്ങൾ നിഷേധിച്ചു.
നിലവിൽ, കൈമാറ്റ കരാറിലെ വ്യവസ്ഥകൾ ലംഘിച്ച് തനിക്കെതിരെ പുതിയ കുറ്റങ്ങൾ ചുമത്തി എന്ന് ചൂണ്ടിക്കാട്ടി മൈക്കിളിൻ്റെ അഭിഭാഷകൻ ഡൽഹി ഹൈക്കോടതിയെ സമീപിച്ചിരിക്കുകയാണ്. ഏഴ് വർഷം തടവ് പൂർത്തിയാക്കിയ മൈക്കിളിന് ജാമ്യവ്യവസ്ഥകൾ പാലിക്കാൻ നിലവിൽ സാധിക്കുന്നില്ല. കേസിൻ്റെ അടുത്ത വാദം കേൾക്കൽ ജനുവരി 9നാണ് നിശ്ചയിച്ചിരിക്കുന്നത്.
