പെൺചരിതം; ദക്ഷിണാഫ്രിക്കയെ തകർത്ത് ഇന്ത്യയ്ക്ക് വനിതാ ലോക കിരീടം
മുംബൈ: ഐസിസി വനിതാ ലോകകപ്പിൽ ഇന്ത്യൻ ചരിത്രം. ദക്ഷിണാഫ്രിക്കയെ 52 റൺസിന് തകർത്ത് ഇന്ത്യൻ വനിതാ ടീം കന്നി ലോക കിരീടത്തിൽ മുത്തമിട്ടു. അർദ്ധ സെഞ്ചുറിക്കു പുറമെ അഞ്ചു വിക്കറ്റ് നേട്ടവുമായി ദീപ്തി ശർമയാണ് കലാശപ്പോരിൽ നീലപ്പടയുടെ വിജയനായികയായത്.
ഫൈനലിൽ ടോസ് നേടിയ ദക്ഷിണാഫ്രിക്ക ഇന്ത്യയെ ബാറ്റിങ്ങിന് അയക്കുകയായിരുന്നു. നിശ്ചിത 50 ഓവറിൽ 7 വിക്കറ്റ് നഷ്ടത്തിൽ 299 റൺസിന്റെ വിജയലക്ഷ്യമാണ് ഇന്ത്യ പ്രോട്ടീസിനു മുന്നിൽ പടുത്തുയർത്തിയത്.
ഇന്ത്യൻ ഇന്നിങ്സിൽ ഓപ്പണർ ഷഫാലി വർമ്മയുടെ തകർപ്പൻ ബാറ്റിങ് പ്രകടനമാണ് ശ്രദ്ധേയമായത്.
87 റൺസെടുത്ത ഷഫാലി, സ്മൃതി മന്ദാനയുമായി (45 റൺസ്) ചേർന്ന് മികച്ച അടിത്തറ നൽകി. പിന്നാലെ വന്ന ദീപ്തി ശർമയുടെ അർദ്ധ സെഞ്ച്വറി (58 റൺസ്) ഇന്ത്യയുടെ സ്കോർ 298-ൽ എത്തിക്കാൻ സഹായിച്ചു. ക്യാപ്റ്റൻ ഹർമൻപ്രീത് കൗർ 20 റൺസെടുത്തു പുറത്തായി.
മറുപടി ബാറ്റിങ്ങിൽ, ദീപ്തി ശർമയുടെ സ്പിൻ കെണിയാണ് ദക്ഷിണാഫ്രിക്കയ്ക്ക് തിരിച്ചടിയായത്. അഞ്ച് വിക്കറ്റുകൾ (5/39) വീഴ്ത്തി ദീപ്തി ശർമ ഇന്ത്യൻ വിജയം ഉറപ്പിച്ചു. ഷഫാലി വർമയും രണ്ട് വിക്കറ്റുകളെടുത്ത് ബാറ്റിങ്ങിന് പുറമേ ബോളിങ്ങിലും താരമായി.
299 റൺസ് വിജയലക്ഷ്യം പിന്തുടർന്ന് മറുപടി ബാറ്റിങ്ങിനിറങ്ങിയ ദക്ഷിണാഫ്രിക്കൻ നിരയ്ക്ക് തുടക്കത്തിൽ തന്നെ പിഴച്ചെങ്കിലും, ക്യാപ്റ്റൻ ലോറ വോൾവാർട്ടിന്റെ തകർപ്പൻ സെഞ്ച്വറി (101 റൺസ്) ടീമിന് പ്രതീക്ഷ നൽകി. എന്നാൽ, മറ്റു ബാറ്റർമാർക്ക് ഇന്ത്യൻ ബൗളർമാരുടെ കൃത്യതയ്ക്ക് മുന്നിൽ പിടിച്ചുനിൽക്കാനായില്ല. 45.3 ഓവറിൽ 246 റൺസിന് ദക്ഷിണാഫ്രിക്ക ഓൾഔട്ടായി.
