ദുബൈ എയര് ഷോയ്ക്കിടെ ഇന്ത്യയുടെ തേജസ് യുദ്ധവിമാനം തകര്ന്നുവീണു; പൈലറ്റിന് വീരമ്യത്യു
ദുബൈ: ഇന്ത്യന് നിര്മ്മിത തേജസ് യുദ്ധവിമാനം ദുബൈ എയര്ഷോയ്ക്കിടെ തകര്ന്നു വീണു. അപകടത്തില് വിമാനത്തിലുണ്ടായിരുന്ന പൈലറ്റ് കൊല്ലപ്പെട്ടു. ദുബൈ അല് മക്തൂം വിമാനത്താവളത്തിന് സമീപം പ്രാദേശിക സമയം 3.30ഓടെയാണ് ദാരുണമായ സംഭവം.
വ്യോമാഭ്യാസ പ്രകടനങ്ങള്ക്കിടെ വിമാനം നിയന്ത്രണം വിട്ട് താഴേക്ക് പതിച്ച് പൊട്ടിത്തെറിക്കുകയായിരുന്നു. സംഘമായുള്ള പ്രകടനത്തിനു ശേഷം ഒറ്റയ്ക്ക് അഭ്യാസം നടത്തുന്നതിനിടെയാണ് ഹിന്ദുസ്ഥാന് എയ്റോനോട്ടിക്സ് ലിമിറ്റഡ് നിര്മ്മിച്ച തേജസ് യുദ്ധവിമാനം തകര്ന്നുവീണത്.
വിമാനം തീഗോളമായി മാറിയതിനെ തുടര്ന്ന് ആകാശത്തേക്ക് കറുത്ത പുക ഉയര്ന്നു. അപകടത്തെ തുടര്ന്ന് ദുബൈ എയര്ഷോ താല്ക്കാലികമായി നിര്ത്തിവച്ചു.
