തമിഴ്നാട് പിടിക്കാന് ഗോയലിനെ ഇറക്കി ബിജെപി
ന്യൂഡല്ഹി: തമിഴ്നാട്ടില് വേരുറപ്പിക്കാന് കേന്ദ്രമന്ത്രി പീയൂഷ് ഗോയലിനെ കളത്തിലിറക്കി ബിജെപി. നിരവധി സംസ്ഥാനങ്ങളിലെ വരാനിരിക്കുന്ന നിയമസഭാ തെരഞ്ഞെടുപ്പുകള്ക്കുള്ള തയ്യാറെടുപ്പുകളുടെ ഭാഗമായാണ് ബിജെപി ഇന്ന് പ്രധാന സംഘടനാ നിയമനങ്ങള് പ്രഖ്യാപിച്ചത്.
ഗോയലിനെ തമിഴ്നാടിന്റെ ബിജെപിയുടെ തെരഞ്ഞെടുപ്പ് ചുമതലക്കാരനായി നിയമിച്ചതോടെ ചൂടുള്ള ചര്ച്ചയാണ് രാഷ്ട്രീയ കേന്ദ്രങ്ങളില് നടക്കുന്നത്. അര്ജുന് റാം മേഘ്വാളും മുരളീധര് മോഹോളും തമിഴ്നാടിന്റെ സഹ ചുമതലക്കാരായി നിയമിക്കപ്പെട്ടതായി പാര്ട്ടി വൃത്തങ്ങള് അറിയിച്ചു.
കുറച്ചുനാളായി ബിജെപി തമിഴ്നാട്ടില് സ്വാധീനം ചെലുത്താന് നിരന്തരം ശ്രമിക്കുകയാണ്. 2021 ലെ നിയമസഭാ തെരഞ്ഞെടുപ്പില് 4 സീറ്റുകളാണ് ബിജെപി നേടിയത് .
അതേസമയം, അസമിന്റെ തെരഞ്ഞെടുപ്പ് ചുമതല മുതിര്ന്ന ബിജെപി നേതാവ് ബൈജയന്ത് പാണ്ഡയ്ക്കാണ്. സഹ ചുമതലക്കാരായി സുനില് കുമാര് ശര്മ്മയും ദര്ശന ബെന് ജാര്ദോഷും നിയമിക്കപ്പെട്ടു.
അസമിലും തമിഴ്നാട്ടിലും അടുത്ത വര്ഷം നിയമസഭാ തെരഞ്ഞെടുപ്പ് നടക്കാനിരിക്കുകയാണ്.
