പിണറായി സ്ഫോടനം: സിപിഎം പ്രവർത്തകന്റെ കൈപ്പത്തി അറ്റുപോകുന്ന ദൃശങ്ങൾ പുറത്ത്
കണ്ണൂർ: പിണറായിൽ സ്ഫോടകവസ്തു കൈകാര്യം ചെയ്യുന്നതിനിടെ സിപിഎം പ്രവർത്തകന് പരിക്കേറ്റ സംഭവത്തിന്റെ ദൃശ്യങ്ങൾ പുറത്തുവന്നു. വെണ്ടുട്ടായി സ്വദേശിയായ വിബിൻ രാജിന്റെ (26) വലതുകൈപ്പത്തിയിലെ മൂന്ന് വിരലുകൾ സ്ഫോടനത്തിൽ അറ്റുപോയി. കനാൽക്കരയിൽ വെച്ച് സുഹൃത്ത് പകർത്തിയ വീഡിയോയാണ് ഇപ്പോൾ പ്രചരിക്കുന്നത്.
സോഷ്യൽ മീഡിയ റീൽസ് ചിത്രീകരിക്കുന്നതിനിടെയാണ്സ് ഫോടനമുണ്ടായതെന്നാണ് ഒപ്പമുണ്ടായിരുന്നവരുടെ മൊഴി. പൊട്ടാതെ കിടന്ന പടക്കം പരിശോധിക്കുന്നതിനിടെയാണ് അപകടമെന്ന് സിപിഎം പ്രാദേശിക നേതൃത്വം വിശദീകരിക്കുന്നുണ്ടെങ്കിലും ഇത് നാടൻ ബോംബാണെന്ന സംശയവും ശക്തമാണ്. സ്ഫോടകവസ്തു കത്തിക്കാൻ ശ്രമിക്കുന്നതും അത് കയ്യിലിരുന്ന് പൊട്ടിത്തെറിക്കുന്നതും വീഡിയോയിൽ വ്യക്തമാണ്.
അപകടത്തെ തുടർന്ന് പോലീസ് സ്ഥലത്തെത്തി പരിശോധന നടത്തി. കോൺഗ്രസ് ഓഫീസ് കത്തിക്കാൻ ശ്രമിച്ചതടക്കം മൂന്ന് ക്രിമിനൽ കേസുകളിൽ പ്രതിയാണ് പരിക്കേറ്റ വിബിൻ രാജ്. തെരഞ്ഞെടുപ്പ് വിജയം ആഘോഷിക്കാൻ നിർമ്മിച്ച പടക്കമാണ് പൊട്ടിത്തെറിച്ചതെന്ന വാദത്തിൽ പോലീസ് കൂടുതൽ വ്യക്തത തേടുന്നുണ്ട്.
