പാരമ്പര്യ സ്വത്തോ വൻ ശമ്പളമോ ഇല്ല; 36-ാം വയസ്സിൽ ഒരു കോടി ആസ്തിയുമായി ഒരു സാധാരണക്കാരൻ!
ന്യൂഡൽഹി: പാരമ്പര്യമായി ലഭിച്ച സ്വത്തോ, ഐടി മേഖലയിലെ വമ്പൻ ‘ആർഎസ്യു’ പാക്കേജുകളോ, വിദേശത്തെ ജോലിയോ ഒന്നുമില്ലാതെ തന്റെ 36-ാം വയസ്സിൽ ഒരു കോടി രൂപയുടെ ആസ്തി സ്വന്തമാക്കിയിരിക്കുകയാണ് ഒരു യുവാവ്. റെഡ്ഡിറ്റിൽ (Reddit) ‘ശമ്പളക്കാരനായ ഏക വരുമാനക്കാരൻ’ (Sole earner) എന്ന തലക്കെട്ടിൽ പങ്കുവെച്ച ഈ സാമ്പത്തിക വിജയഗാഥ ഇപ്പോൾ സോഷ്യൽ മീഡിയയിൽ വലിയ ചർച്ചയായിരിക്കുകയാണ്.
വിജയരഹസ്യം അച്ചടക്കം
2016-ൽ ഔദ്യോഗിക ജീവിതം ആരംഭിച്ചെങ്കിലും 2022 മുതലാണ് നിക്ഷേപങ്ങൾക്ക് ഇദ്ദേഹം മുൻഗണന നൽകി തുടങ്ങിയത്. വരുമാനം വർദ്ധിക്കുന്നതിനനുസരിച്ച് ജീവിതച്ചെലവുകൾ കൂട്ടുന്ന ‘ലൈഫ്സ്റ്റൈൽ ഇൻഫ്ലേഷൻ’ (Lifestyle Inflation) എന്ന കെണിയിൽ വീഴാതെ നോക്കിയതാണ് തന്റെ വിജയമെന്ന് യുവാവ് പറയുന്നു. സ്വർണം, ഓഹരികൾ, മ്യൂച്വൽ ഫണ്ടുകൾ, ഡെബ്റ്റ് ഫണ്ടുകൾ എന്നിങ്ങനെ വൈവിധ്യമാർന്ന മേഖലകളിലായിട്ടായിരുന്നു നിക്ഷേപം.
സ്വന്തമായി വീട് വാങ്ങുന്നതിനായി 30 ലക്ഷം രൂപ ചെലവഴിച്ചില്ലായിരുന്നെങ്കിൽ ആസ്തി ഇതിലും കൂടുമായിരുന്നുവെന്നും കുറിപ്പിലുണ്ട്. നിലവിൽ 90 ലക്ഷം രൂപ വിലമതിക്കുന്ന വീടും അതിന് 63 ലക്ഷത്തിന്റെ വായ്പയും ഇദ്ദേഹത്തിനുണ്ട്. 55,000 രൂപയാണ് പ്രതിമാസ ഇഎംഐ.
ലക്ഷ്യം 5 കോടി
മറ്റുള്ളവരെ കാണിക്കാനുള്ള ആഡംബര കാറുകളോ വിലകൂടിയ ഗാഡ്ജെറ്റുകളോ ഇദ്ദേഹത്തിനില്ല. യാത്രകൾ മാത്രമാണ് ഏക വിനോദം. ഇതിനായി ഈ വർഷം മുതൽ പ്രത്യേക ‘ട്രാവൽ ഫണ്ട്’ ആരംഭിച്ചിട്ടുണ്ട്. 40-കളുടെ അവസാനത്തോടെ 5 കോടി രൂപയുടെ ആസ്തി ഉണ്ടാക്കി സാമ്പത്തിക സ്വാതന്ത്ര്യം (Financial Independence) നേടുകയാണ് ലക്ഷ്യം. ജോലി എന്നത് പണത്തിന് വേണ്ടിയുള്ള നെട്ടോട്ടമാകാതെ, ഒരു തിരഞ്ഞെടുപ്പ് മാത്രമായി മാറണമെന്നാണ് ഇദ്ദേഹത്തിന്റെ ആഗ്രഹം.
ഇരുപതാം വയസ്സിൽ കോടികൾ സമ്പാദിച്ചു എന്ന് അവകാശപ്പെടുന്ന അതിശയോക്തിപരമായ സോഷ്യൽ മീഡിയ പോസ്റ്റുകൾക്കിടയിൽ, സാധാരണക്കാരന് പിന്തുടരാൻ കഴിയുന്നതും യാഥാർത്ഥ്യബോധമുള്ളതുമായ ഈ കുറിപ്പിനെ അഭിനന്ദിക്കുകയാണ് നെറ്റിസൺസ്. കൃത്യമായ പ്ലാനിംഗിലൂടെ ഏതൊരു ശമ്പളക്കാരനും സാമ്പത്തിക ഭദ്രത കൈവരിക്കാമെന്ന് ഈ യുവാവ് തെളിയിക്കുന്നു.
