‘ഭീകരവാദത്തിനെതിരെ ഇരട്ടത്താപ്പില്ല’; പാക് ഉപപ്രധാനമന്ത്രിയെ മുന്നിലിരുത്തി നിലപാട് വ്യക്തമാക്കി രാജ്‌നാഥ് സിംഗ്
ന്യൂഡൽഹി: ഭീകരവാദത്തെ ന്യായീകരിക്കാൻ കഴിയില്ലെന്നും, അത് കൈകാര്യം ചെയ്യുന്നതിൽ ഇരട്ടത്താപ്പ് പാടില്ലെന്നും പ്രതിരോധ മന്ത്രി രാജ്‌നാഥ് സിംഗ്. താജിക്കിസ്ഥാൻ തലസ്ഥാനമായ ദുഷാൻബെയിൽ നടക്കുന്ന ഷാങ്ഹായ് കോർപ്പറേഷൻ ഓർഗനൈസേഷൻ (എസ്.സി.ഒ) ഗവൺമെൻ്റ് തലവന്മാരുടെ കൗൺസിൽ യോഗത്തിലാണ് അദ്ദേഹം ഈ സുപ്രധാന പ്രസ്താവന നടത്തിയത്.
പാകിസ്ഥാൻ വിദേശകാര്യ മന്ത്രിയും ഉപപ്രധാനമന്ത്രിയുമായ ഇഷാഖ് ദാറിൻ്റെ സാന്നിധ്യത്തിലായിരുന്നു രാജ്‌നാഥ് സിംഗിൻ്റെ ഈ പ്രതികരണം. ഭീകരവാദത്തെ വികസനത്തിന് നേരെയുള്ള ഏറ്റവും വലിയ ഭീഷണികളിലൊന്നായി വിശേഷിപ്പിച്ച അദ്ദേഹം, അത് നിരപരാധികളുടെ ജീവൻ മാത്രമല്ല, നിക്ഷേപങ്ങളെയും വാണിജ്യത്തെയും ദോഷകരമായി ബാധിക്കുമെന്നും ചൂണ്ടിക്കാട്ടി.
ഭീകരവാദം സമൂഹത്തെ തീവ്രവാദത്തിലേക്ക് നയിക്കുമെന്നും യുവാക്കൾക്ക് അർഹമായ അവസരങ്ങൾ ഇല്ലാതാക്കുമെന്നും പ്രതിരോധ മന്ത്രി പറഞ്ഞു. ഭീകരർക്ക് സാമ്പത്തിക സഹായം നൽകുകയോ പിന്തുണയ്ക്കുകയോ സുരക്ഷിത താവളമൊരുക്കുകയോ ചെയ്യുന്നവർക്ക് യാതൊരു സ്ഥാനവും നൽകാൻ പാടില്ലെന്നും, ഭീകരവാദത്തിന്റെ മുഴുവൻ ആവാസവ്യവസ്ഥയും കൂട്ടായി ശക്തമായി ഇല്ലാതാക്കണമെന്നും അദ്ദേഹം ആവശ്യപ്പെട്ടു. രാജ്‌നാഥ് സിംഗ് സംസാരിക്കുമ്പോൾ ഇഷാഖ് ദാർ അദ്ദേഹത്തിന് എതിർവശത്ത് ഇരിക്കുന്നതിന്റെ വീഡിയോ പാകിസ്ഥാൻ വിദേശകാര്യ മന്ത്രാലയം പുറത്തുവിട്ടിട്ടുണ്ട്.
നേരത്തെ സെപ്റ്റംബറിൽ നടന്ന എസ്.സി.ഒ യോഗത്തിൽ പ്രധാനമന്ത്രി നരേന്ദ്ര മോദിയും സമാനമായ നിലപാട് വ്യക്തമാക്കിയിരുന്നു. ഭീകരർക്ക് സാമ്പത്തിക സഹായം, റിക്രൂട്ട്മെന്റ്, സുരക്ഷിത താവളങ്ങൾ എന്നിവ നൽകുന്ന സംവിധാനങ്ങളെ ഇല്ലാതാക്കാൻ അംഗരാജ്യങ്ങൾ ഒരുമിച്ച് പ്രവർത്തിക്കണമെന്ന് അദ്ദേഹം ആവശ്യപ്പെട്ടിരുന്നു. പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ്, ചൈനീസ് പ്രസിഡന്റ് ഷി ജിൻപിംഗ്, റഷ്യൻ പ്രസിഡന്റ് വ്‌ളാഡിമിർ പുടിൻ തുടങ്ങിയവരുടെ സാന്നിധ്യത്തിലായിരുന്നു പ്രധാനമന്ത്രിയുടെ ആ പ്രസ്താവന.
പാകിസ്ഥാൻ സർക്കാരും സൈന്യവും ഭീകരവാദത്തെ പിന്തുണയ്ക്കുകയും അവർക്ക് അഭയം നൽകുകയും ചെയ്യുന്നുവെന്ന് ഇന്ത്യ നിരന്തരം ആരോപിക്കുന്നുണ്ട്. ഭീകരവാദത്തെയും അതിന് അഭയം നൽകുന്നവരെയും ഇന്ത്യ രണ്ടായി കാണുന്നില്ലെന്നും വ്യക്തമാക്കിയിട്ടുണ്ട്. ഇന്ത്യ വിനോദസഞ്ചാരത്തിൽ വിശ്വസിക്കുമ്പോൾ പാകിസ്ഥാൻ ഭീകരവാദത്തെയാണ് വിനോദസഞ്ചാരമായി കാണുന്നതെന്നും, ഇത് ലോകത്തിന് തന്നെ വലിയ അപകടമാണെന്നും അടുത്തിടെ പ്രധാനമന്ത്രി നരേന്ദ്ര മോദി വിമർശിച്ചിരുന്നു. താജിക്കിസ്ഥാനിൽ രണ്ട് ദിവസത്തെ ഔദ്യോഗിക സന്ദർശനത്തിനെത്തിയ രാജ്‌നാഥ് സിംഗിന് ദുഷാൻബെ വിമാനത്താവളത്തിൽ ആചാരപരമായ സ്വീകരണം നൽകി. താജിക്കിസ്ഥാൻ പ്രതിരോധ മന്ത്രി എമോമാലി സോബിർസോദ, വിദേശകാര്യ മന്ത്രാലയത്തിലെ ഷെരാലി ജോനൻ എന്നിവർ ചേർന്നാണ് അദ്ദേഹത്തെ സ്വീകരിച്ചത്.
