‘ഇത്തവണ പാകിസ്ഥാൻ എത്ര കഷ്ണങ്ങളാകുമെന്ന് ദൈവത്തിനറിയാം’; ഖ്വാജ ആസിഫിന് രാജ്നാഥ് സിങ്ങിന്റെ കടുത്ത മറുപടി
ന്യൂഡൽഹി: ഇന്ത്യക്കെതിരെ പ്രകോപനപരമായ പ്രസ്താവനകൾ നടത്തുന്ന പാകിസ്ഥാന് ശക്തമായ മുന്നറിയിപ്പുമായി പ്രതിരോധ മന്ത്രി രാജ്നാഥ് സിങ്. ഇന്ത്യയുടെ ഭാഗത്തുനിന്ന് നീക്കങ്ങളുണ്ടായാൽ കൊൽക്കത്തയെ ലക്ഷ്യമിടുമെന്ന പാക് പ്രതിരോധ മന്ത്രി ഖ്വാജ ആസിഫിന്റെ ഭീഷണിയോട് പ്രതികരിക്കുകയായിരുന്നു അദ്ദേഹം. ബംഗാളിലെ ബാരക്പൂരിൽ നടന്ന തെരഞ്ഞെടുപ്പ് റാലിയിലാണ് രാജ്നാഥ് സിങ് പാകിസ്ഥാനെതിരെ ആഞ്ഞടിച്ചത്.
1971-ലെ വിഭജനം ഓർമിപ്പിച്ചുകൊണ്ടായിരുന്നു അദ്ദേഹത്തിന്റെ വാക്കുകൾ. “55 വർഷം മുമ്പ് പാകിസ്ഥാൻ രണ്ട് ഭാഗങ്ങളായി വിഭജിക്കപ്പെട്ടപ്പോൾ അതിന്റെ അനന്തരഫലങ്ങൾ അവർ അനുഭവിച്ചതാണ്. ഇനിയും ബംഗാളിൽ കണ്ണുവെക്കാൻ ശ്രമിച്ചാൽ, ഇത്തവണ പാകിസ്ഥാൻ എത്ര ഭാഗങ്ങളായി വിഭജിക്കപ്പെടുമെന്ന് ദൈവത്തിന് മാത്രമേ അറിയൂ,” എന്ന് അദ്ദേഹം പറഞ്ഞു. ഇത്തരം പ്രസ്താവനകൾ നടത്തുന്നതിൽ നിന്ന് ഇസ്ലാമാബാദ് വിട്ടുനിൽക്കണമെന്നും മുൻകാല തെറ്റുകൾ ആവർത്തിക്കരുതെന്നും അദ്ദേഹം കൂട്ടിച്ചേർത്തു.
ഇന്ത്യ വ്യാജ ഫ്ലാഗ് ഓപറേഷന് മുതിർന്നാൽ യുദ്ധം കൊൽക്കത്തയിലേക്ക് വ്യാപിപ്പിക്കുമെന്നായിരുന്നു സിയാൽകോട്ടിൽ സംസാരിക്കവെ ഖ്വാജ ആസിഫ് അവകാശപ്പെട്ടത്. എന്നാൽ ഇതിന് അദ്ദേഹം തെളിവുകളൊന്നും നൽകിയിരുന്നില്ല. പാകിസ്ഥാന്റെ ആഭ്യന്തര പരാജയങ്ങളിൽ നിന്നും സാമ്പത്തിക തകർച്ചയിൽ നിന്നും ശ്രദ്ധ തിരിക്കാനാണ് ഇത്തരം പ്രകോപനങ്ങളെന്ന് ബിജെപി എംപി ജഗദംബിക പാൽ പ്രതികരിച്ചു.
കഴിഞ്ഞ വർഷം ഏപ്രിലിലെ പഹൽഗാം ഭീകരാക്രമണത്തിന് പിന്നാലെ ഇന്ത്യ നടത്തിയ ‘ഓപറേഷൻ സിന്ദൂർ’ ഉൾപ്പെടെയുള്ള സൈനിക നടപടികൾ ഇരുരാജ്യങ്ങളും തമ്മിലുള്ള ബന്ധം കൂടുതൽ വഷളാക്കിയിട്ടുണ്ട്. ഭീകരതയെ പ്രോത്സാഹിപ്പിക്കുന്ന നിലപാട് തുടർന്നാൽ ഇന്ത്യയുടെ പ്രതികരണം അഭൂതപൂർവവും നിർണായകവുമായിരിക്കുമെന്ന് രാജ്നാഥ് സിങ് ആവർത്തിച്ചു വ്യക്തമാക്കി.
