വെസ്റ്റ് ബാങ്കില് ഇസ്രയേല് സൈനിക ഹെലികോപ്റ്റര് തകര്ന്നുവീണു
തെല് അവീവ്: വെസ്റ്റ് ബാങ്കിലെ ഗുഷ് എറ്റ്സിയോണ് മേഖലയില് ഇസ്രയേല് ഡിഫന്സ് ഫോഴ്സിന്റെ ഹെലികോപ്റ്റര് തകര്ന്നു വീണു. പ്രാദേശിക സമയം ഇന്നു രാവിലെയായിരുന്നു സംഭവം. തകരാറിലായ ഹെലികോപ്റ്ററിനെ മറ്റൊരു ഹെലികോപ്റ്റര് ഉപയോഗിച്ച് ഉയര്ത്തി മാറ്റാന് ശ്രമിക്കുന്നതിനിടെയാണ് അപകടമുണ്ടായത്.
‘യാന്ഷുഫ്’ (ബ്ലാക്ക് ഹോക്ക്) വിഭാഗത്തില്പ്പെട്ട ഹെലികോപ്റ്ററാണ് തകര്ന്നത്. മോശം കാലാവസ്ഥയെത്തുടര്ന്ന് ചൊവ്വാഴ്ച ഈ ഹെലികോപ്റ്റര് ഇവിടെ അടിയന്തരമായി ഇറക്കിയിരുന്നു. വെള്ളിയാഴ്ച ഇത് വീണ്ടെടുക്കാനുള്ള ശ്രമത്തിനിടെ, മറ്റൊരു ഹെലികോപ്റ്ററുമായി ഘടിപ്പിച്ചിരുന്ന വടം വേര്പെടുകയും ഹെലികോപ്റ്റര് താഴേക്ക് പതിക്കുകയുമായിരുന്നുവെന്ന് ഇസ്രയേല് മാധ്യമങ്ങള് റിപ്പോര്ട്ട് ചെയ്തു.
ജനവാസമേഖലയ്ക്ക് സമീപമാണ് ഹെലികോപ്റ്റര് വീണതെങ്കിലും ആളപായമൊന്നും റിപ്പോര്ട്ട് ചെയ്തിട്ടില്ലെന്ന് ഐഡിഎഫ് വൃത്തങ്ങള് വ്യക്തമാക്കി. സംഭവത്തില് ഇസ്രയേല് വ്യോമസേനാ മേധാവി മേജര് ജനറല് ടോമര് ബാര് അടിയന്തര അന്വേഷണത്തിന് ഉത്തരവിട്ടിട്ടുണ്ട്.
സൈനിക ആവശ്യങ്ങള്ക്കും രക്ഷാപ്രവര്ത്തനങ്ങള്ക്കുമായി ഇസ്രയേല് വ്യോമസേന വ്യാപകമായി ഉപയോഗിക്കുന്ന ഹെലികോപ്റ്ററാണ് ‘യാന്ഷുഫ്’. സംഭവത്തിന്റെ വീഡിയോ ദൃശ്യങ്ങള് സമൂഹമാധ്യമങ്ങളില് പ്രചരിക്കുന്നുണ്ട്.
