തലസ്ഥാനത്തും രക്തസാക്ഷി ഫണ്ട് തട്ടിപ്പ്: ഫണ്ട് തട്ടിയ നേതാവിന് പ്രമോഷൻ, പാർട്ടി വിടാനൊരുങ്ങി കൊല്ലപ്പെട്ട വിഷ്ണുവിന്റെ സഹോദരൻ

തിരുവനന്തപുരം: സി.പി.എമ്മിലെ രക്തസാക്ഷി ഫണ്ട് തട്ടിപ്പ് വിവാദം തിരുവനന്തപുരം ജില്ലയിലും പുകയുന്നു. വഞ്ചിയൂരിൽ കൊല്ലപ്പെട്ട ഡി.വൈ.എഫ്.ഐ പ്രവർത്തകൻ വിഷ്ണുവിന്റെ സ്മരണയ്ക്കായി പിരിച്ച ഫണ്ടിൽ ക്രമക്കേട് നടത്തിയ നേതാവിനെ സി.ഐ.ടി.യു ജില്ലാ ഭാരവാഹിയായി ഉയർത്തിയതാണ് പുതിയ വിവാദങ്ങൾക്ക് വഴിതെളിച്ചത്. ഇതിൽ പ്രതിഷേധിച്ച് വിഷ്ണുവിന്റെ സഹോദരനും പാർട്ടി ബ്രാഞ്ച് അംഗവുമായ വിനോദ് സി.പി.എം വിടാൻ തീരുമാനിച്ചു.

2008ൽ കൊല്ലപ്പെട്ട വിഷ്ണുവിന്റെ കുടുംബത്തെ സഹായിക്കാനായി പാർട്ടി 10 ലക്ഷം രൂപ പിരിച്ചിരുന്നു. എന്നാൽ ഇതിൽ അഞ്ച് ലക്ഷം രൂപ അന്നത്തെ ലോക്കൽ സെക്രട്ടറി ടി. രവീന്ദ്രൻ തിരിമറി നടത്തിയതായി പാർട്ടി അന്വേഷണത്തിൽ കണ്ടെത്തിയിരുന്നു. ഇതിനെത്തുടർന്ന് ഇയാളെ തരംതാഴ്ത്തി നടപടി എടുത്തെങ്കിലും, ഇപ്പോൾ സി.ഐ.ടി.യു ജില്ലാ സെക്രട്ടറിയായി ഇദ്ദേഹത്തെ നിയമിച്ചത് കൊല്ലപ്പെട്ട വിഷ്ണുവിന്റെ കുടുംബത്തെ പ്രകോപിപ്പിച്ചിരിക്കുകയാണ്. തിരുവനന്തപുരത്തെ പ്രമുഖ മന്ത്രിയുടെ ഇടപെടലിലൂടെയാണ് തട്ടിപ്പ് നടത്തിയ നേതാവിനെ പദവിയിലേക്ക് തിരികെ എത്തിച്ചതെന്നാണ് വിനോദിന്റെ ആരോപണം.

‘രക്തസാക്ഷിയുടെ പേരിൽ പണം തട്ടിച്ചവർക്ക് ഉന്നത പദവി നൽകുന്നത് നാണക്കേടാണ്. കുടുംബത്തോട് പാർട്ടി നീതി കാണിച്ചില്ല. ഇനി സി.പി.എമ്മിനൊപ്പം തുടരാനാകില്ല,’ വിനോദ് പറഞ്ഞു. കുടുംബത്തിന്റെ പരസ്യമായ പ്രതിഷേധം ജില്ലാ നേതൃത്വത്തെ പ്രതിരോധത്തിലാക്കിയിട്ടുണ്ട്. തട്ടിപ്പ് ആരോപണം നേരിട്ടവർക്ക് സംരക്ഷണം നൽകുന്ന പാർട്ടി നിലപാടിനെതിരെ അണികൾക്കിടയിലും അമർഷം പുകയുന്നുണ്ട്.