ആർഎസ്എസ് ഫണ്ടിംഗിൽ സുതാര്യത എവിടെ? ചോദ്യങ്ങളുമായി വീണ്ടും പ്രിയങ്ക് ഖാർഗെ
ബെംഗളൂരു: ആർഎസ്എസ് പ്രവർത്തന ഫണ്ടിനെച്ചൊല്ലിയുള്ള പോര് കർണാടകയിൽ മുറുകുന്നു. സംഘടനയുടെ സാമ്പത്തിക ഇടപാടുകളിൽ സുതാര്യതയില്ലെന്നും ഇത് സംബന്ധിച്ച് താൻ മുമ്പ് ഉന്നയിച്ച ചോദ്യങ്ങൾക്ക് വ്യക്തമായ മറുപടി വേണമെന്നും കർണാടക മന്ത്രി പ്രിയങ്ക് ഖാർഗെ ആവശ്യപ്പെട്ടു. രാജ്യത്തിന്റെ വളർച്ചയ്ക്ക് തടസ്സം നിൽക്കുന്ന ഘടകമാണ് ആർഎസ്എസ് എന്ന് വിശേഷിപ്പിച്ച അദ്ദേഹം, ഫണ്ടിംഗുമായി ബന്ധപ്പെട്ടു കൊണ്ടുള്ള തന്റെ ചോദ്യങ്ങൾ എക്സ് പോസ്റ്റിൽ ആവർത്തിച്ച് ഉന്നയിച്ചു.
സ്വയംസേവകരുടെ സംഭാവനകൾ കൊണ്ടാണ് സംഘടന പ്രവർത്തിക്കുന്നതെന്ന ആർഎസ്എസ് മേധാവി മോഹൻ ഭാഗവതിന്റെ പ്രസ്താവനയെ ഖാർഗെ ചോദ്യം ചെയ്തു. താഴെ പറയുന്ന പ്രധാന വിഷയങ്ങളാണ് അദ്ദേഹം ഉന്നയിച്ചത്:
ആരാണ് ഈ സന്നദ്ധപ്രവർത്തകർ? അവരെ എങ്ങനെയാണ് തിരിച്ചറിയുന്നത്?
സംഭാവനകളുടെ കൃത്യമായ അളവും സ്വഭാവവും എന്താണ്?
രജിസ്റ്റർ ചെയ്ത ഒരു സ്ഥാപനമില്ലാതെ എങ്ങനെയാണ് സംഭാവനകൾ സ്വീകരിക്കുന്നത്?
ഫുൾടൈം പ്രവർത്തകർ (പ്രചാരക്), അടിസ്ഥാന സൗകര്യങ്ങൾ, യൂണിഫോം എന്നിവയ്ക്ക് ആവശ്യമായ പണം എവിടെ നിന്ന് വരുന്നു?
മറ്റ് സ്ഥാപനങ്ങൾ സാമ്പത്തിക നിയമങ്ങൾ പാലിക്കാൻ ബാധ്യസ്ഥരായിരിക്കുമ്പോൾ, ഇത്രയേറെ സ്വാധീനമുള്ള ആർഎസ്എസ് എന്തുകൊണ്ട് ഒരു രജിസ്റ്റർ ചെയ്ത സ്ഥാപനമായി പ്രവർത്തിക്കുന്നില്ലെന്നും അദ്ദേഹം ചോദിച്ചു. ഡൽഹിയിലെ കോടികൾ വിലമതിക്കുന്ന ‘കേശവ് കുഞ്ച്’ എന്ന ആസ്ഥാന മന്ദിരത്തിന്റെ നിർമ്മാണത്തെയും അദ്ദേഹം വിമർശിച്ചു. തനിക്കെതിരെയുള്ള മാനനഷ്ടക്കേസുകളെക്കുറിച്ച് പരാമർശിച്ച ഖാർഗെ, നിയമനടപടികൾ കാട്ടി തന്നെ നിശബ്ദനാക്കാൻ കഴിയില്ലെന്നും വ്യക്തമാക്കി.
ആർഎസ്എസ്സിനെതിരായ പ്രസ്താവനകളുടെ പേരിൽ പ്രിയങ്ക് ഖാർഗെ, ദിനേഷ് ഗുണ്ടുറാവു എന്നിവർക്ക് ബെംഗളൂരു കോടതി നേരത്തെ നോട്ടീസ് അയച്ചിരുന്നു. കർണാടകയിൽ ആർഎസ്എസ് പ്രവർത്തനങ്ങൾക്ക് കോൺഗ്രസ് സർക്കാർ നിയന്ത്രണങ്ങൾ ഏർപ്പെടുത്തുന്നതിനിടെയാണ് പുതിയ വിവാദം ഉടലെടുത്തിരിക്കുന്നത്. വിദ്യാഭ്യാസ സ്ഥാപനങ്ങളിൽ ആർഎസ്എസുമായി ബന്ധപ്പെട്ട പ്രവർത്തനങ്ങൾ നിരോധിക്കണം എന്നാവശ്യപ്പെട്ടതിന് തനിക്ക് ഭീഷണിയുണ്ടെന്നും ഖാർഗെ പറഞ്ഞിരുന്നു.
