ഊണിനൊപ്പം അച്ചാർ എന്തിനാണ്? ഗുണങ്ങൾ അറിയാം
മലയാളികൾക്ക് ഒഴിച്ചുകൂടാനാകാത്ത ഒന്നാണ് ഊണിനൊപ്പം അച്ചാർ. ഭക്ഷണത്തിന്റെ രുചി വർധിപ്പിക്കാൻ മാത്രമല്ല, ആരോഗ്യ സംരക്ഷണത്തിനും അച്ചാറുകൾ മികച്ചതാണെന്ന് പുതിയ പഠനങ്ങൾ വ്യക്തമാക്കുന്നു. അച്ചാറുകൾ കൃത്യമായ അളവിൽ കഴിക്കുന്നത് ശരീരത്തിന് പലവിധ ഗുണങ്ങൾ നൽകുന്നു. പച്ചക്കറികളും പഴങ്ങളും പുളിപ്പിച്ചെടുക്കുന്നതിലൂടെ (Fermentation) രൂപപ്പെടുന്ന ‘നല്ല ബാക്ടീരിയകൾ’ കുടലിന്റെ ആരോഗ്യം മെച്ചപ്പെടുത്താനും ദഹനപ്രക്രിയ സുഗമമാക്കാനും സഹായിക്കുന്നു.
അച്ചാറുകളുടെ പ്രധാന ഗുണങ്ങൾ
ദഹനവും മെറ്റബോളിസവും: പ്രോബയോട്ടിക് ഗുണങ്ങളുള്ള അച്ചാറുകൾ ദഹനപ്രശ്നങ്ങൾ അകറ്റുകയും ശരീരത്തിന്റെ ഉപാപചയ പ്രവർത്തനങ്ങൾ (Metabolism) വേഗത്തിലാക്കുകയും ചെയ്യുന്നു.
പ്രതിരോധശേഷി: ഇതിലടങ്ങിയിരിക്കുന്ന ആന്റിമൈക്രോബയൽ ഘടകങ്ങൾ രോഗപ്രതിരോധ ശേഷി വർധിപ്പിക്കാൻ സഹായിക്കുന്നു.
കരളിന്റെ ആരോഗ്യം: നെല്ലിക്ക അച്ചാർ പതിവായി കഴിക്കുന്നത് കരളിലെ കോശങ്ങളെ സംരക്ഷിക്കാനും അൾസർ പോലുള്ള പ്രശ്നങ്ങൾ കുറയ്ക്കാനും ഫലപ്രദമാണ്.
പ്രമേഹ നിയന്ത്രണം: ഇൻസുലിൻ സംവേദനക്ഷമത വർദ്ധിപ്പിക്കാൻ സഹായിക്കുന്നതിലൂടെ പ്രമേഹരോഗികൾക്കും ഇത് മിതമായ അളവിൽ ഗുണകരമാണ്.
ഗർഭകാലം: മോണിംഗ് സിക്ക്നസ് കുറയ്ക്കാനും ശരീരത്തിലെ അസിഡിറ്റി ക്രമീകരിക്കാനും അച്ചാറുകൾ സഹായിക്കാറുണ്ട്.
വിറ്റാമിൻ എ, സി, നാരുകൾ എന്നിവയാൽ സമ്പന്നമായ വീട്ടിലുണ്ടാക്കുന്ന അച്ചാറുകൾ ഭക്ഷണത്തിൽ ഉൾപ്പെടുത്തുന്നത് ദീർഘകാലാടിസ്ഥാനത്തിൽ ആരോഗ്യത്തിന് ഗുണം ചെയ്യുമെന്ന് വിദഗ്ധർ ചൂണ്ടിക്കാട്ടുന്നു. എങ്കിലും ഉപ്പും എണ്ണയും അധികമായതിനാൽ അമിതമാകാതെ ശ്രദ്ധിക്കണം.
