ലോകോത്തര സൗകര്യങ്ങളുമായി മസ്ജിദുൽ ഹറം വികസനം; 25,000 കാർപെറ്റുകളും 17,000 സംസം ഡിസ്പെൻസറുകളും തീർഥാടകർക്കായി സജ്ജം
റിയാദ്: വിശുദ്ധ നഗരമായ മക്കയിലെ ഗ്രാൻഡ് മോസ്കിന്റെ ചരിത്രത്തിലെ ഏറ്റവും വലിയ വികസന പദ്ധതികളിൽ ഒന്നായ മൂന്നാമത്തെ സൗദി വിപുലീകരണം തീർത്ഥാടകർക്കായി വിപുലമായ സേവനങ്ങളാണ് ഒരുക്കുന്നത്. അത്യാധുനിക സൗകര്യങ്ങളോടെ പൂർത്തിയാക്കിയ വിപുലീകരണ പദ്ധതി വഴി ലക്ഷക്കണക്കിന് വിശ്വാസികൾക്ക് സുഗമമായി ആരാധനകൾ നിർവ്വഹിക്കാൻ സാധിക്കുമെന്ന് അധികൃതർ അറിയിച്ചു.
ബൃഹത്തായ അടിസ്ഥാന സൗകര്യങ്ങൾ
രണ്ട് വിശുദ്ധ പള്ളികളുടെ കാര്യപരിപാലനത്തിനായുള്ള ജനറൽ അതോറിറ്റിയുടെ കണക്കുകൾ പ്രകാരം, ഏകദേശം 1.214 ദശലക്ഷം ചതുരശ്ര മീറ്റർ വിസ്തൃതിയിലാണ് പുതിയ വിപുലീകരണം വ്യാപിച്ചുകിടക്കുന്നത്. വർഷം മുഴുവനും പള്ളിക്കുള്ളിൽ സുഖകരമായ അന്തരീക്ഷം നിലനിർത്തുന്നതിനായി 90,000 ടൺ തണുപ്പിക്കൽ ശേഷിയുള്ള എയർ കണ്ടീഷനിങ് സംവിധാനമാണ് ഇവിടെ സജ്ജീകരിച്ചിരിക്കുന്നത്. പ്രാർത്ഥനകൾ എല്ലാ തലങ്ങളിലും വ്യക്തമായി കേൾക്കുന്നതിനായി 1,300 സ്പീക്കറുകളും സ്ഥാപിച്ചിട്ടുണ്ട്.
സേവനങ്ങളും ക്രമീകരണങ്ങളും
- ജലവിതരണം: 17,000 സംസം വാട്ടർ ഡിസ്പെൻസറുകളും 458 കുടിവെള്ള ജലധാരകളും.
- ശുചിത്വം: 11,436 വിശ്രമമുറികളും വുദു യൂണിറ്റുകളും.
- യാത്രസൗകര്യം: നിലകൾക്കിടയിലുള്ള സുഗമമായ സഞ്ചാരത്തിനായി 428 എസ്കലേറ്ററുകളും 28 ലിഫ്റ്റുകളും.
- മറ്റ് സൗകര്യങ്ങൾ: 25,000ത്തിലധികം കാർപെറ്റുകൾ, 80 പ്രവേശന കവാടങ്ങൾ, 120 പ്രാർത്ഥനാ മേഖലകൾ.
തിരക്കേറിയ സീസണുകളിൽ വിശ്വാസികളുടെ ചലനം സുഗമമാക്കുന്നതിന് ഗ്രൗണ്ട്, ഫസ്റ്റ്, സെക്കൻഡ്, മെസാനൈൻ, റൂഫ്ടോപ്പ് നിലകളിലായി ക്രമീകരണങ്ങൾ ഏർപ്പെടുത്തിയിട്ടുണ്ട്. സാങ്കേതിക വിദ്യയും എഞ്ചിനീയറിങ് മികവും ഒകോപിപ്പിച്ചുകൊണ്ടുള്ള സംയോജിത സംവിധാനം വഴി സുരക്ഷിതമായ അന്തരീക്ഷമാണ് ഉറപ്പാക്കുന്നത്. സേവനങ്ങളുടെ പൂർണ സന്നദ്ധത ഉറപ്പാക്കാൻ ഫീൽഡ് ടീമുകൾ 24 മണിക്കൂറും പ്രവർത്തിക്കുന്നുണ്ടെന്നും അതോറിറ്റി വ്യക്തമാക്കി.
