‘റിയൽ കേരള സ്റ്റോറി’; മതമൈത്രിയുടെ തിളക്കത്തിൽ ക്ഷേത്ര തിരുമുറ്റത്ത് സമൂഹ നോമ്പുതുറ
തച്ചങ്ങാട്: നാടിന്റെ മതസൗഹാർദ്ദത്തിന് പുത്തൻ ഊർജം പകർന്ന് കാസർകോട് തച്ചങ്ങാട് അരവത്ത് മട്ടൈങ്ങാനം കഴകം പൂബാണംകുഴി ക്ഷേത്രത്തിൽ സമൂഹ നോമ്പുതുറ സംഘടിപ്പിച്ചു. ക്ഷേത്രത്തിലെ ബ്രഹ്മകലശോത്സവത്തോടനുബന്ധിച്ച് പൂബാണം യു.എ.ഇ. കമ്മിറ്റിയുടെ നേതൃത്വത്തിലാണ് ഇന്നലെ ക്ഷേത്ര തിരുമുറ്റത്ത് ഇഫ്താർ വിരുന്ന് ഒരുക്കിയത്. വൈവിധ്യമാർന്ന വിശ്വാസങ്ങൾക്കിടയിലും മനുഷ്യത്വത്തിന്റെ വലിയ സന്ദേശം വിളിച്ചോതുന്ന വേദി ‘റിയൽ കേരള സ്റ്റോറി’യായിമാറി.
മൗവ്വൽ, പരവങ്ങാനം, തായൽ മൗവ്വൽ തുടങ്ങിയ പ്രദേശങ്ങളിലെ നിരവധി വിശ്വാസികൾ ചടങ്ങിൽ പങ്കെടുത്തു. യു.എ.ഇ കമ്മിറ്റി പ്രസിഡന്റ് കെ. അശോകൻ പതിക്കാൽ, അരുൺകുമാർ അരവത്ത്, ശ്യാംകുമാർ തച്ചങ്ങാട്, ശശിധരൻ തോക്കാനം തുടങ്ങി ക്ഷേത്ര ആഘോഷക്കമ്മിറ്റി ഭാരവാഹികൾ അതിഥികളെ സ്വീകരിച്ചു.
ഹക്കിം കുന്നിൽ, സാജിത് മൗവ്വൽ, കേരളവിഷൻ എം.ഡി. ഷുക്കൂർ കോളിക്കര, പാലക്കുന്ന് ഭരണസമിതി പ്രസിഡന്റ് അഡ്വ. കെ. ബാലകൃഷ്ണൻ, സെക്രട്ടറി ജയാനന്ദൻ എന്നിവരുൾപ്പെടെ സാമൂഹിക-സാംസ്കാരിക രംഗത്തെ പ്രമുഖർ സംഗമത്തിൽ സംബന്ധിച്ചു. ഉത്സവ ലഹരിയിലായിരുന്ന ക്ഷേത്ര മുറ്റത്ത് നടന്ന ഈ നോമ്പുതുറ നാട്ടിലെ സൗഹൃദവും സാഹോദര്യവും ഊട്ടിയുറപ്പിക്കുന്ന വേറിട്ടൊരു അനുഭവമായി മാറി.
