രക്തഗ്രൂപ്പ് ഇനി തടസ്സമല്ല; ‘യൂണിവേഴ്‌സൽ’ വൃക്കയുമായി ശാസ്ത്രലോകം, അവയവമാറ്റത്തിൽ വിപ്ലവം

വൃക്ക മാറ്റിവയ്ക്കൽ ശസ്ത്രക്രിയ കാത്തിരിക്കുന്ന ലക്ഷക്കണക്കിന് രോഗികൾക്ക് പ്രത്യാശ നൽകുന്ന സുപ്രധാന കണ്ടെത്തലുമായി ശാസ്ത്രലോകം. രക്തഗ്രൂപ്പ് പരിഗണിക്കാതെ ഏതൊരു രോഗിക്കും സ്വീകരിക്കാവുന്ന സാർവത്രിക വൃക്ക (Universal Kidney) കാനഡയിലെയും ചൈനയിലെയും ഗവേഷകർ സംയുക്തമായി വികസിപ്പിച്ചു. ബ്രിട്ടീഷ് കൊളംബിയ സർവകലാശാലയിലെ ബയോകെമിസ്റ്റ് സ്റ്റീഫൻ വിതേഴ്‌സിന്റെ നേതൃത്വത്തിൽ നടന്ന പഠനം പ്രമുഖ ശാസ്ത്ര മാസികയായ ‘നേച്ചർ ബയോമെഡിക്കൽ എഞ്ചിനീയറിങ്ങിൽ’ പ്രസിദ്ധീകരിച്ചിട്ടുണ്ട്.

നിലവിൽ വൃക്ക മാറ്റിവയ്ക്കൽ ശസ്ത്രക്രിയകളിൽ ദാതാവിന്റെയും സ്വീകർത്താവിന്റെയും രക്തഗ്രൂപ്പുകൾ തമ്മിലുള്ള പൊരുത്തം പ്രധാന വെല്ലുവിളിയാണ്. അനുയോജ്യമായ വൃക്ക ലഭിക്കാത്തതിനാൽ രോഗികൾ വർഷങ്ങളോളം കാത്തിരിക്കേണ്ടി വരുന്നതും ചികിത്സാ കാലയളവിലെ മരണനിരക്ക് വർദ്ധിക്കുന്നതും ആഗോളതലത്തിൽ വലിയ പ്രതിസന്ധിയാണ്. ഈ സാഹചര്യത്തിലാണ് രക്തഗ്രൂപ്പ് മാറ്റം സാധ്യമാക്കുന്ന നൂതന സാങ്കേതികവിദ്യയുമായി ഗവേഷകർ രംഗത്തെത്തിയത്.

മാറ്റത്തിന് പിന്നിലെ ശാസ്ത്രം

വൃക്കകളിൽ അടങ്ങിയിരിക്കുന്ന പ്രത്യേക ആന്റിജനുകളാണ് അവയവം നിരസിക്കപ്പെടുന്നതിന് പ്രധാന കാരണം. ഉദാഹരണത്തിന്, എ ഗ്രൂപ്പിലുള്ള ഒരാളുടെ വൃക്ക മറ്റൊരു ഗ്രൂപ്പുകാരന് നൽകുമ്പോൾ, സ്വീകർത്താവിന്റെ രോഗപ്രതിരോധ സംവിധാനം ഈ ആന്റിജനുകളെ തിരിച്ചറിയുകയും അവയവത്തെ ആക്രമിക്കുകയും ചെയ്യുന്നു.

ഗവേഷകർ വികസിപ്പിച്ചെടുത്ത പ്രത്യേക എൻസൈമുകൾ ഉപയോഗിച്ച് വൃക്കയിലെ ആന്റിജനുകളെ നീക്കം ചെയ്യുകയാണ് ചെയ്യുന്നത്. ഇതോടെ വൃക്ക ഏത് രക്തഗ്രൂപ്പുകാർക്കും സ്വീകാര്യമായ ഒ ഗ്രൂപ്പിന് സമാനമായ അവസ്ഥയിലേക്ക് മാറുന്നു. തലച്ചോറ് മരണം സംഭവിച്ച രോഗിയിൽ നടത്തിയ പരീക്ഷണത്തിൽ, ഇത്തരത്തിൽ മാറ്റം വരുത്തിയ വൃക്ക ദിവസങ്ങളോളം വിജയകരമായി പ്രവർത്തിച്ചതായി ഗവേഷകർ സ്ഥിരീകരിച്ചു.

പ്രതീക്ഷയും വെല്ലുവിളികളും

നിലവിൽ രക്തഗ്രൂപ്പ് വ്യത്യസ്തമായ രോഗികൾക്ക് വൃക്ക മാറ്റിവയ്ക്കാൻ സ്വീകർത്താവിന്റെ രോഗപ്രതിരോധ സംവിധാനത്തെ മരുന്നുകളിലൂടെ മന്ദീഭവിപ്പിക്കുന്ന രീതിയാണ് പിന്തുടരുന്നത്. ഇത് ചെലവേറിയതും സങ്കീർണവുമാണ്. എന്നാൽ പുതിയ കണ്ടെത്തൽ ഈ പ്രക്രിയ ലളിതമാക്കുമെന്നാണ് കരുതുന്നത്.

എങ്കിലും ചില വെല്ലുവിളികൾ ഇപ്പോഴും നിലനിൽക്കുന്നുണ്ട്. പരീക്ഷണത്തിനിടെ മൂന്നാം ദിവസമായപ്പോഴേക്കും വൃക്ക അതിന്റെ പഴയ രക്തഗ്രൂപ്പിലേക്ക് മടങ്ങുന്നതിന്റെ സൂചനകൾ കാണിച്ചിരുന്നു. ഇത് രോഗപ്രതിരോധ പ്രതികരണത്തിന് കാരണമായെങ്കിലും തീവ്രത കുറവായിരുന്നു. ഈ പ്രശ്‌നം പരിഹരിക്കുന്നതിനും അവയവത്തിന്റെ ദീർഘകാല പ്രവർത്തനക്ഷമത ഉറപ്പാക്കുന്നതിനുമുള്ള കൂടുതൽ ഗവേഷണങ്ങൾ നടന്നുവരികയാണ്.

ഈ സാങ്കേതികവിദ്യ പൂർണമായി വികസിപ്പിക്കാനായാൽ, അവയവ ദാനത്തിനുള്ള കാത്തിരിപ്പ് സമയം ഗണ്യമായി കുറയ്ക്കാനും കൂടുതൽ ജീവനുകൾ രക്ഷിക്കാനും സാധിക്കുമെന്ന് ഡോ. സ്റ്റീഫൻ വിതേഴ്‌സ് പറഞ്ഞു.