പോപ്പുലർ ഫ്രണ്ട് ബന്ധം: വളാഞ്ചേരി സ്വദേശി നെടുമ്പാശ്ശേരി വിമാനത്താവളത്തിൽ എൻഐഎ പിടിയിൽ
കൊച്ചി: നിരോധിത സംഘടനയായ പോപ്പുലർ ഫ്രണ്ട് ഓഫ് ഇന്ത്യയുമായി(പിഎഫ്ഐ) ബന്ധപ്പെട്ട കേസിൽ ഒരാൾ അറസ്റ്റിൽ. എൻഐഎ തിരയുന്ന മലപ്പുറം വളാഞ്ചേരി സ്വദേശി മൊയ്തീൻ കുട്ടിയാണ് നെടുമ്പാശ്ശേരി വിമാനത്താവളത്തിൽനിന്നു പിടിയിലായത്. വിദേശത്തേക്ക് കടക്കാൻ ശ്രമിക്കുന്നതിനിടെയാണ് ഇയാളെ കസ്റ്റഡിയിലെടുത്തത്.
മൊയ്തീൻ കുട്ടിയെ കണ്ടെത്താൻ സഹായിക്കുന്നവർക്കായി എൻഐഎ നേരത്തെ ഏഴ് ലക്ഷം രൂപ പാരിതോഷികം പ്രഖ്യാപിച്ചിരുന്നു. ദീർഘകാലമായി ഒളിവിൽ കഴിഞ്ഞിരുന്ന ഇയാൾക്കായി ലുക്ക് ഔട്ട് നോട്ടീസും പുറപ്പെടുവിച്ചിരുന്നു.
മൊയ്തീൻ കുട്ടി പോപ്പുലർ ഫ്രണ്ട് പ്രവർത്തകനാണെന്നാണു വിവരം. സംഘടനാ പ്രവർത്തകർക്ക് ആയുധ പരിശീലനം നൽകുന്നതിൽ പ്രധാന പങ്കുവഹിച്ചതായും അന്വേഷണ സംഘം പറയുന്നു.
വിദേശത്തേക്ക് കടക്കാനായിരുന്നു മൊയ്തീൻ കുട്ടിയുടെ നീക്കം. എന്നാൽ, വിമാനത്താവളത്തിലെ പരിശോധനയ്ക്കിടെ അന്വേഷണ സംഘം ഇയാളെ തിരിച്ചറിയുകയായിരുന്നു. എൻഐഎ കോടതിയിൽ ഹാജരാക്കിയ പ്രതിയെ നിലവിൽ റിമാൻഡ് ചെയ്തിട്ടുണ്ട്.
