വധൂഗൃഹത്തിലെ മണിയറയിലെ ശുചിമുറിയിൽ എംഡിഎംഎ ഒളിപ്പിച്ചു; നവവരൻ അറസ്റ്റിൽ

തിരൂർ: നവവധുവിന്റെ വീട്ടിലെ മണിയറയിൽ ലഹരിമരുന്ന് ഒളിപ്പിച്ചുവെച്ച നവവരൻ പോലീസ് പിടിയിലായി. തവനൂർ പുത്തൻപുരയിൽ മുഹമ്മദ് ഷിബാനെയാണ് തിരൂർ പോലീസ് അറസ്റ്റ് ചെയ്തത്. വീടിന്റെ മുകളിലത്തെ നിലയിലുള്ള മണിയറയിലെ ശുചിമുറിയിൽ നിന്നാണ് പോലീസ് എംഡിഎംഎ കണ്ടെടുത്തത്.

പ്രതി സഞ്ചരിച്ചിരുന്ന കാറിൽ നിന്ന് നേരത്തെ പോലീസ് എംഡിഎംഎ പിടികൂടിയിരുന്നു. തുടർന്ന് നടത്തിയ ചോദ്യം ചെയ്യലിലാണ് വധുവിന്റെ വീട്ടിലും ലഹരിമരുന്ന് സൂക്ഷിച്ചിട്ടുണ്ടെന്ന വിവരം പുറത്തുവന്നത്. സ്വന്തം ഉപയോഗത്തിനും വിൽപനയ്ക്കുമായാണ് എംഡിഎംഎ എത്തിച്ചതെന്ന് പ്രതി പോലീസിനോട് സമ്മതിച്ചു. കാറിൽ നിന്നും വീട്ടിൽ നിന്നുമായി ആകെ 1.55 ഗ്രാം എംഡിഎംഎയാണ് പോലീസ് പിടിച്ചെടുത്തത്.

സ്വകാര്യ ആശുപത്രിയിൽ തെറാപ്പിസ്റ്റായി ജോലി ചെയ്തുവരികയായിരുന്നു മുഹമ്മദ് ഷിബാൻ. പ്രതിയെ കോടതിയിൽ ഹാജരാക്കി. ലഹരിമരുന്നിന്റെ ഉറവിടത്തെക്കുറിച്ച് പോലീസ് അന്വേഷണം ഊർജിതമാക്കിയിട്ടുണ്ട്.