കോടതി ഉത്തരവിന് പുല്ലുവില; നെതന്യാഹു സർക്കാറിനെതിരെ തെൽ അവീവിൽ വൻ പ്രതിഷേധം
തെൽഅവീവ്: നെതന്യാഹു സർക്കാരിന്റെ നയങ്ങൾക്കും ഇറാനുമായുള്ള യുദ്ധത്തിനുമെതിരെ തെൽ അവീവിലെ ഹബിമ സ്ക്വയറിൽ ശനിയാഴ്ച രാത്രി വൻ പ്രതിഷേധം. സുരക്ഷാ പ്രശ്നങ്ങളുണ്ടെന്ന് ചൂണ്ടിക്കാട്ടി ആയിരം ആളുകൾ മാത്രമേ പങ്കെടുക്കാവൂ എന്ന കോടതി ഉത്തരവിനെ മറികടന്ന് 2000ത്തോളം ആളുകൾ പ്രതിഷേധത്തിൽ പങ്കെടുത്തതായി ഇസ്രയേലി മാധ്യമങ്ങൾ റിപ്പോർട്ട് ചെയ്തു. സമാധാനപരമായ രീതിയിൽ നടന്ന ഈ പ്രതിഷേധത്തിൽ പോലീസ് ഇടപെടാനോ ആളുകളെ പിരിച്ചുവിടാനോ ശ്രമിച്ചില്ല എന്നതും ശ്രദ്ധേയമാണ്.
പ്രധാനമന്ത്രി ബെഞ്ചമിൻ നെതന്യാഹുവിന്റെ സർക്കാരിനെതിരെയുള്ള ആറാമത്തെ തുടർച്ചയായ വാരാന്ത്യ പ്രതിഷേധമായിരുന്നു ഇത്. ഇറാനുമായുള്ള യുദ്ധം നിർത്തണമെന്നും, ഗവൺമെന്റ് നടപ്പിലാക്കാൻ ശ്രമിക്കുന്ന ജുഡീഷ്യൽ പരിഷ്കാരങ്ങൾ ഉപേക്ഷിക്കണമെന്നും പ്രതിഷേധക്കാർ ആവശ്യപ്പെട്ടു. നെതന്യാഹുവിനെതിരെയുള്ള അഴിമതി ആരോപണങ്ങളും തീവ്ര ഓർത്തഡോക്സ് വിഭാഗക്കാർക്ക് സൈനിക സേവനത്തിൽ നൽകുന്ന ഇളവുകളും പ്രതിഷേധത്തിന് ആക്കം കൂട്ടി. സമാധാനത്തിനായുള്ള പോരാട്ടത്തിൽ ജൂത-അറബ് കൂട്ടായ്മ അത്യാവശ്യമാണെന്ന് ഹദഷ് പാർട്ടി നേതാവ് അയ്മാൻ ഒഡെ ചടങ്ങിൽ സംസാരിക്കവെ വ്യക്തമാക്കി.
ഇറാനിൽ നിന്നുള്ള മിസൈൽ ആക്രമണ ഭീഷണിയെത്തുടർന്നാണ് കോടതി പ്രതിഷേധക്കാരുടെ എണ്ണത്തിൽ നിയന്ത്രണം ഏർപ്പെടുത്തിയിരുന്നത്. എന്നാൽ കഴിഞ്ഞയാഴ്ച പ്രാബല്യത്തിൽ വന്ന വെടിനിർത്തൽ കരാറിനെത്തുടർന്ന് ആളുകളുടെ എണ്ണം അറുനൂറിൽ നിന്ന് ആയിരമായി ഉയർത്താൻ കോടതി അനുമതി നൽകിയിരുന്നു. ഹബിമ സ്ക്വയറിന് താഴെ വലിയ ബോംബ് ഷെൽട്ടറുകൾ ഉള്ളതിനാൽ ആളുകൾ കൂടുന്നത് വലിയ അപകടമല്ലെന്ന് പ്രതിഷേധക്കാർ വാദിച്ചു. ടെൽ അവീവിന് പുറമെ ഹൈഫ, ജെറുസലേം എന്നിവിടങ്ങളിലും സമാനമായ പ്രതിഷേധങ്ങൾ നടന്നു. ജെറുസലേമിൽ പോലീസ് ബാരിക്കേഡ് മറികടക്കാൻ ശ്രമിച്ച മൂന്ന് പേരെ പോലീസ് കസ്റ്റഡിയിലെടുത്തു.
