ആഴ്ചയിലൊരിക്കൽ ഐസ് ഫ്ലഷ് ചെയ്യൂ; ഈ ലളിതമായ വിദ്യയ്ക്ക് പിന്നിലെ രഹസ്യം ഇതാ
ടോയ്ലറ്റ് വൃത്തിയാക്കാൻ മണിക്കൂറുകളോളം അധ്വാനിക്കുന്നവർക്കും വിലകൂടിയ കെമിക്കൽ ക്ലീനറുകൾ വാങ്ങി മടുത്തവർക്കും പരീക്ഷിക്കാവുന്ന ലളിതമായ വിദ്യ സോഷ്യൽ മീഡിയയിൽ തരംഗമാകുന്നു. ആഴ്ചയിൽ ഒരിക്കൽ ടോയ്ലറ്റിൽ ഐസ് ക്യൂബുകൾ ഇട്ട് ഫ്ലഷ് ചെയ്യുന്നത് വഴി ബാത്ത്റൂം കൂടുതൽ വൃത്തിയായി സൂക്ഷിക്കാൻ സാധിക്കുമെന്നാണ് വിദഗ്ധർ പറയുന്നത്.
എങ്ങനെയാണ് ഐസ് പ്രവർത്തിക്കുന്നത്?
സാധാരണ ലിക്വിഡ് ക്ലീനറുകൾ ടോയ്ലറ്റിൽ ഒഴിക്കുമ്പോൾ അവ വേഗത്തിൽ ഡ്രെയിനിലേക്ക് ഒഴുകിപ്പോകുകയാണ് പതിവ്. എന്നാൽ ഐസ് ക്യൂബുകൾക്കൊപ്പം ക്ലീനർ ഉപയോഗിക്കുമ്പോൾ, ഐസ് ഒരു താൽക്കാലിക തടസ്സമായി പ്രവർത്തിക്കുകയും ക്ലീനർ കൂടുതൽ സമയം ടോയ്ലറ്റ് ഭിത്തികളിൽ തങ്ങിനിൽക്കാൻ സഹായിക്കുകയും ചെയ്യുന്നു. കൂടാതെ, ഐസ് ക്യൂബുകൾ ഫ്ലഷ് ചെയ്യപ്പെടുമ്പോൾ ഉണ്ടാകുന്ന ഘർഷണം (Friction) ഉപരിതലത്തിലെ നേരിയ അഴുക്കുകളെയും ധാതുക്കളുടെ അടിഞ്ഞുകൂടലിനെയും നീക്കം ചെയ്യാൻ സഹായിക്കും. ഇത് പോർസലൈൻ പ്രതലത്തിൽ പോറലുകൾ വീഴ്ത്തുകയുമില്ല.
കൂടുതൽ ഫലപ്രദമായ ശുചീകരണത്തിനായി ഐസിനോടൊപ്പം അല്പം വിനാഗിരിയോ ബേക്കിങ് സോഡയോ ചേർക്കാവുന്നതാണ്. ഇത് ദുർഗന്ധം അകറ്റാനും കറകൾ നീക്കം ചെയ്യാനും സഹായിക്കും. എന്നാൽ വാണിജ്യ ക്ലീനറുകൾക്കൊപ്പം ഇവ ഒരിക്കലും കലർത്തരുത്.
ഈ രീതി പിന്തുടരുമ്പോൾ ചില കാര്യങ്ങൾ ശ്രദ്ധിക്കേണ്ടതുണ്ട്. സാധാരണ ഐസ് ക്യൂബുകൾ ഉപയോഗിക്കുന്നത് സുരക്ഷിതമാണെങ്കിലും വലിയ ഐസ് കട്ടകൾ പ്ലംബിങ് തകരാറുകൾക്ക് കാരണമായേക്കാം. കൂടാതെ, ഒരേസമയം ഒന്നിലധികം കെമിക്കലുകൾ ഉപയോഗിക്കുന്നത് വിഷവാതകങ്ങൾ പുറന്തള്ളാൻ കാരണമാകുമെന്നതിനാൽ ജാഗ്രത പാലിക്കണം. കഠിനമായ കറകൾ നീക്കം ചെയ്യാൻ ഈ രീതി മതിയാവില്ലെങ്കിലും, ആഴ്ചയിലൊരിക്കൽ ഇത് ചെയ്യുന്നത് വഴി ടോയ്ലറ്റ് കൂടുതൽ പുതുമയോടെ നിലനിർത്താൻ സാധിക്കുമെന്ന് ‘ഹൗസ് ഡൈജസ്റ്റ്’ പോലുള്ള പ്രസിദ്ധീകരണങ്ങൾ വ്യക്തമാക്കുന്നു. കുറഞ്ഞ ചിലവിൽ മികച്ച ശുചിത്വം ഉറപ്പാക്കാൻ ഈ ലളിതമായ മാർഗം ആർക്കും പരീക്ഷിക്കാവുന്നതാണ്.
