ആംബുലൻസ് ലഭിച്ചില്ല; മകൻ്റെ മൃതദേഹം ഉന്തുവണ്ടിയിൽ വീട്ടിലെത്തിച്ച് കുടുംബം

ഹൈദരാബാദ്: തെലങ്കാനയിലെ കരിംനഗറിൽ ആംബുലൻസ് സൗകര്യം ലഭിക്കാത്തതിനെത്തുടർന്ന് യുവാവിൻ്റെ മൃതദേഹം ഉന്തുവണ്ടിയിൽ കയറ്റി വീട്ടിലെത്തിച്ച് കുടുംബം. ശങ്കരപട്ടണം ഗ്രാമത്തിൽ അസുഖം ബാധിച്ച് മരിച്ച യാകുബ് എന്ന യുവാവിൻ്റെ മൃതദേഹമാണ് ദയനീയാവസ്ഥയിൽ വീട്ടിലെത്തിച്ചത്. സ്വകാര്യ ആംബുലൻസിന് നൽകാൻ പണമില്ലാത്തതും സർക്കാർ സംവിധാനങ്ങളുടെ അഭാവവുമാണ് ഈ ദുരവസ്ഥയ്ക്ക് കാരണമായത്.

രാജ്യത്തെ ആരോഗ്യ-ഗതാഗത മേഖലയിലെ അടിസ്ഥാന സൗകര്യങ്ങളുടെ പോരായ്മയിലേക്കാണ് സംഭവം വിരൽ ചൂണ്ടുന്നത്. സമാനമായ രീതിയിൽ മുൻപും രാജ്യത്തിൻ്റെ വിവിധ ഭാഗങ്ങളിൽ ഇത്തരത്തിലുള്ള വാർത്തകൾ റിപ്പോർട്ട് ചെയ്തിട്ടുണ്ട്. കഴിഞ്ഞ ജനുവരിയിൽ ഫരീദാബാദിൽ ആശുപത്രി ജീവനക്കാർ സഹായം നിഷേധിച്ചതിനെത്തുടർന്ന് ക്ഷയരോഗം ബാധിച്ച് മരിച്ച യുവതിയുടെ മൃതദേഹം 12 കിലോമീറ്റർ അകലെയുള്ള വീട്ടിലെത്തിച്ചത് മോട്ടോർ ഘടിപ്പിച്ച ഉന്തുവണ്ടിയിലായിരുന്നു.

2025 ആഗസ്റ്റിലും തെലങ്കാനയിൽ ആംബുലൻസ് വൈകിയതിനെ തുടർന്ന് അപകടത്തിൽ മരിച്ച യുവാവിൻ്റെ മൃതദേഹം പോലീസ് ഉന്തുവണ്ടിയിൽ ആശുപത്രിയിലെത്തിച്ചിരുന്നു. അടിയന്തര ഘട്ടങ്ങളിൽ പോലും പാവപ്പെട്ടവർക്ക് ആംബുലൻസ് സേവനം നിഷേധിക്കപ്പെടുന്നതിനെതിരെ വ്യാപകമായ പ്രതിഷേധമാണ് ഉയരുന്നത്. പ്രദേശവാസികളും മനുഷ്യാവകാശ പ്രവർത്തകരും ഇതിനെതിരെ രംഗത്തെത്തിയിട്ടുണ്ട്.