‘ജാതിക്കും മതത്തിനും കുടുംബ രാഷ്ട്രീയത്തിനും അതീതമായി രാജ്യത്തിന്റെ പുരോഗതിക്കായി ചിന്തിക്കണം എങ്കിൽ മാത്രമേ ജനാധിപത്യം ശക്തമാകൂ’:യോഗി ആദിത്യനാഥ്
ലക്നൗ: ‘ജാതിക്കും മതത്തിനും പ്രാദേശികവാദത്തിനും കുടുംബ രാഷ്ട്രീയത്തിനും അതീതമായി രാജ്യത്തിന്റെ പുരോഗതിക്കായി നാം ചിന്തിക്കണമെന്നും എങ്കിൽ മാത്രമേ ജനാധിപത്യം കൂടുതൽ ശക്തമാകൂ’ എന്നും ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. തന്റെ എക്സ് അക്കൗണ്ടിലൂടെ പങ്കുവെച്ച കുറിപ്പിലാണ് അദ്ദേഹം ഇക്കാര്യം വ്യക്തമാക്കിയത്. ഒരു പൊതുചടങ്ങിൽ അദ്ദേഹം നടത്തിയ പ്രസംഗത്തിന്റെ വീഡിയോയും ഇതോടൊപ്പം പങ്കുവെച്ചിട്ടുണ്ട്. ജനാധിപത്യ രാജ്യത്ത് ദേശീയ ഐക്യത്തിന്റെ പ്രാധാന്യത്തെക്കുറിച്ചും വിഘടനവാദ ചിന്തകൾക്ക് മുകളിൽ രാജ്യത്തിന് മുൻഗണന നൽകേണ്ടതിനെക്കുറിച്ചും അദ്ദേഹം സംസാരിച്ചു.
പ്രതിപക്ഷ പാർട്ടികളായ സമാജ്വാദി പാർട്ടിയും കോൺഗ്രസും പിന്തുടരുന്ന രാഷ്ട്രീയത്തെ നിരന്തരം വിമർശിക്കാറുള്ള വ്യക്തിയാണ് യോഗി ആദിത്യനാഥ്. ഇതിന്റെ തുടർച്ചയെന്നോണമാണ് രാജ്യനന്മയ്ക്കായി ഒന്നിച്ചുനിൽക്കാൻ ആഹ്വാനം ചെയ്തുകൊണ്ടുള്ള അദ്ദേഹത്തിന്റെ പുതിയ സോഷ്യൽ മീഡിയ പോസ്റ്റ്. യോഗിയുടെ നിലപാടിനെ അനുകൂലിച്ച് ‘ഭാരത് മാതാ കീ ജയ്’ വിളികളുമായി നിരവധി അനുയായികൾ രംഗത്തെത്തിയപ്പോൾ, ബി.ജെ.പിയുടെ രാഷ്ട്രീയ നിലപാടുകളിലെ വൈരുദ്ധ്യങ്ങളെ ചോദ്യം ചെയ്തും ഉത്തർപ്രദേശിലെ കടുത്ത ചൂടിനിടയിലുള്ള വൈദ്യുതി തടസ്സം പോലുള്ള ജനകീയ പ്രശ്നങ്ങൾ ഉന്നയിച്ചും ചിലർ വിമർശനങ്ങൾ ഉന്നയിക്കുന്നുണ്ട്.
