‘അയോധ്യയില് അപവാദ പ്രചരണം നടക്കുന്നു, സനാതന മൂല്യങ്ങളെ ചൂഷണം ചെയ്യാൻ ശ്രമിക്കുന്നവരോട് ഒരു വിട്ടുവീഴ്ചയും ഇല്ല’; യോഗി ആദിത്യനാഥ്
അയോധ്യ: അയോധ്യയിലെ രാമക്ഷേത്ര നിർമ്മാണത്തിനുള്ള സംഭാവനയുമായി ബന്ധപ്പെട്ട തട്ടിപ്പ് വിവാദങ്ങളിൽ കർശന നടപടിയുമായി ഉത്തർപ്രദേശ് സർക്കാർ. സനാതന മൂല്യങ്ങളെയും ജനങ്ങളുടെ വിശ്വാസത്തെയും ചൂഷണം ചെയ്യാൻ ശ്രമിക്കുന്നവരോട് യാതൊരു തരത്തിലുള്ള വിട്ടുവീഴ്ചയും ഉണ്ടാകില്ലെന്ന് മുഖ്യമന്ത്രി യോഗി ആദിത്യനാഥ് വ്യക്തമാക്കി. അയോധ്യയുമായി ബന്ധപ്പെട്ട് ഇപ്പോൾ നടക്കുന്നത് അപവാദ പ്രചരണങ്ങളാണെന്നും, തട്ടിപ്പ് നടന്നതിന് വ്യക്തമായ തെളിവുള്ളവർ അത് പ്രത്യേക അന്വേഷണ സംഘത്തിന് (എസ്ഐടി) കൈമാറണമെന്നും അദ്ദേഹം ആവശ്യപ്പെട്ടു. തെളിവുകളോ വസ്തുതകളോ ഇല്ലാതെയുള്ള ആരോപണ പ്രത്യാരോപണങ്ങളും രാഷ്ട്രീയ പ്രസ്താവനകളും അവസാനിപ്പിക്കണമെന്നും എസ്ഐടിയുടെ ശുപാർശകൾ പ്രകാരം സർക്കാർ തുടർനടപടികൾ സ്വീകരിക്കുമെന്നും മുഖ്യമന്ത്രി കൂട്ടിച്ചേർത്തു.
സംഭാവന തട്ടിപ്പുമായി ബന്ധപ്പെട്ട് എട്ട് പേരെ അറസ്റ്റ് ചെയ്ത പശ്ചാത്തലത്തിലാണ് മുഖ്യമന്ത്രിയുടെ ഈ പ്രതികരണം. എസ്ഐടി തങ്ങളുടെ പ്രാഥമിക കണ്ടെത്തലുകൾ സമർപ്പിച്ചതിന് പിന്നാലെയാണ് അടിയന്തര നടപടികളിലേക്ക് സർക്കാർ കടന്നത്. മുതിർന്ന ഉദ്യോഗസ്ഥരടങ്ങിയ പ്രത്യേക സംഘമാണ് കേസ് അന്വേഷിക്കുന്നത്. അയോധ്യയുമായി ബന്ധപ്പെട്ട വിഷയങ്ങളിൽ യാതൊരു വിട്ടുവീഴ്ചയ്ക്കും സർക്കാർ തയ്യാറല്ലെന്ന് അദ്ദേഹം ജനങ്ങൾക്ക് ഉറപ്പുനൽകി.
അതേസമയം, തട്ടിപ്പിൽ ആരോപണവിധേയനായ വിഎച്ച്പി ഉപാധ്യക്ഷനും രാമജന്മഭൂമി തീർത്ഥക്ഷേത്ര ട്രസ്റ്റ് ജനറൽ സെക്രട്ടറിയുമായ ചമ്പത് റായ് സ്ഥാനം രാജിവെച്ചു. ട്രസ്റ്റിലെ മറ്റൊരു അംഗമായ അനിൽ മിശ്രയും രാജി സമർപ്പിച്ചിട്ടുണ്ട്. കനത്ത സമ്മർദ്ദത്തെത്തുടർന്ന് ചമ്പത് റായിക്കെതിരെ നടപടിയെടുക്കാൻ സർക്കാർ തീരുമാനിച്ചതിന് പിന്നാലെയാണ് ഈ രാജി. വിവാദങ്ങളുടെ പശ്ചാത്തലത്തിൽ, അയോധ്യ ക്ഷേത്രത്തിന്റെ ഭരണച്ചുമതല നിലവിൽ ജില്ലാ മജിസ്ട്രേറ്റിന് കൈമാറിയിരിക്കുകയാണ്.
