പ്രായവും സമ്മർദവുമെന്ന് കരുതി തള്ളിക്കളയരുത്; കാൻസറിന്റെ ഈ 10 നിശബ്ദ സൂചനകൾ നിങ്ങൾ അറിയാതെ പോകരുത്
ശരീരത്തിൽ പ്രത്യക്ഷപ്പെടുന്ന പല ചെറിയ മാറ്റങ്ങളും സമ്മർദം മൂലമോ പ്രായമാകുന്നതിന്റെ ഭാഗമായോ ഉള്ളതാണെന്ന് കരുതി തള്ളിക്കളയുന്നത് വലിയ അപകടങ്ങൾക്ക് കാരണമായേക്കാമെന്ന് ആരോഗ്യ വിദഗ്ദ്ധർ ചൂണ്ടിക്കാണിക്കുന്നു. മൂർച്ചയുള്ള വേദനയോ പെട്ടെന്ന് ദൃശ്യമാകുന്ന വലിയ മുഴകളോ പോലുള്ള നാടകീയമായ ലക്ഷണങ്ങൾക്കായി കാത്തിരിക്കാതെ, ശരീരം നൽകുന്ന നിശബ്ദമായ സൂചനകൾ തിരിച്ചറിയേണ്ടത് കാൻസർ പ്രതിരോധത്തിൽ നിർണായകമാണ്.
രോഗികൾ പലപ്പോഴും മാസങ്ങളോളവും വർഷങ്ങളോളവും അവഗണിക്കുന്ന, കാൻസറിന്റെ പ്രാരംഭ ലക്ഷണങ്ങളാകാൻ സാധ്യതയുള്ള 10 പ്രധാന നിശബ്ദ ലക്ഷണങ്ങൾ പ്രമുഖ മോളിക്യുലാർ ഓങ്കോളജിസ്റ്റ് ഡോ. അമിത് വർമ്മ വ്യക്തമാക്കുന്നു.
- വിശദീകരണമില്ലാത്ത ശരീരഭാരം കുറയൽ: ഭക്ഷണക്രമത്തിലോ വ്യായാമത്തിലോ യാതൊരു മാറ്റവും വരുത്താതെ പെട്ടെന്ന് ശരീരഭാരം കുറയുന്നത് ആമാശയം, പാൻക്രിയാസ്, ശ്വാസകോശ അർബുദം എന്നിവയുടെ പ്രാരംഭ സൂചനയാകാം.
- വിശ്രമിച്ചാലും മാറാത്ത കടുത്ത ക്ഷീണം: നല്ല ഉറക്കത്തിന് ശേഷവും മാറാത്തതും ദൈനംദിന ജോലികൾ പോലും കഠിനമാക്കുന്നതുമായി മാസങ്ങളോളം നീണ്ടുനിൽക്കുന്ന അസാധാരണ ക്ഷീണം.
- വിട്ടുമാറാത്ത ചുമ: അലർജിയോ മലിനീകരണമോ ആണെന്ന് കരുതി അവഗണിക്കുന്നതും ആഴ്ചകളോളം നീണ്ടുനിൽക്കുന്നതുമായ ചുമ. നെഞ്ചിലെ അസ്വസ്ഥതയോ രക്തത്തിന്റെ അംശമോ ഇതിനോടൊപ്പം ഉണ്ടെങ്കിൽ ഉടൻ പരിശോധിക്കണം.
- ചർമ്മത്തിലെ മാറ്റങ്ങൾ: ശരീരത്തിലെ മറുകുകളിൽ ഉണ്ടാകുന്ന വ്യത്യാസങ്ങൾ, ഭേദമാകാത്ത വ്രണങ്ങൾ, ചർമ്മത്തിലുണ്ടാകുന്ന അസാധാരണമായ കറുപ്പ് നിറം എന്നിവ സ്കിൻ കാൻസറിന്റെയോ മറ്റ് അടിസ്ഥാന അവസ്ഥകളുടെയോ ലക്ഷണമാകാം.
- അപ്രതീക്ഷിത രക്തസ്രാവം: മലത്തിലോ മൂത്രത്തിലോ കാണുന്ന രക്തത്തിന്റെ അംശം, ചുമയ്ക്കുമ്പോൾ രക്തം വരുന്നത് എന്നിവ അടിയന്തിര ശ്രദ്ധ അർഹിക്കുന്ന ലക്ഷണങ്ങളാണ്.
- സ്ത്രീകളിലെ അസാധാരണ രക്തസ്രാവം: ആർത്തവചക്രങ്ങൾക്കിടയിൽ ഉണ്ടാകുന്ന അസാധാരണമായ രക്തസ്രാവവും ആർത്തവവിരാമത്തിന് ശേഷമുണ്ടാകുന്ന രക്തസ്രാവവും ഉടൻ തന്നെ ഡോക്ടറുടെ ശ്രദ്ധയിൽപ്പെടുത്തണം.
- വിഴുങ്ങാനുള്ള ബുദ്ധിമുട്ട്: സാധാരണ ആസിഡ് റിഫ്ലക്സ് എന്ന് കരുതി തള്ളിക്കളയുന്ന, തൊണ്ടയിലോ അന്നനാളത്തിലോ ഭക്ഷണം കുടുങ്ങിക്കിടക്കുന്നത് പോലുള്ള സ്ഥിരമായ ബുദ്ധിമുട്ടുകൾ.
- കാരണമില്ലാത്ത വേദന: വിശ്രമിച്ചിട്ടും മാറാതെ തുടർച്ചയായി അനുഭവപ്പെടുന്ന തലവേദന, നടുവേദന, വയറുവേദന, അല്ലെങ്കിൽ അസ്ഥി വേദന.
- ബാത്ത്റൂം ശീലങ്ങളിലെ മാറ്റങ്ങൾ: ആഴ്ചകളോളം നീണ്ടുനിൽക്കുന്ന മലബന്ധം, വയറിളക്കം, അല്ലെങ്കിൽ മൂത്രമൊഴിക്കുന്നതിന്റെ ആവൃത്തിയിലുണ്ടകുന്ന പെട്ടെന്നുള്ള മാറ്റങ്ങൾ വൻകുടൽ, മൂത്രസഞ്ചി, പ്രോസ്റ്റേറ്റ് കാൻസറുകളുടെ സൂചനയാകാം.
- വേദനയില്ലാത്ത മുഴകൾ: സ്തനം, കഴുത്ത്, കക്ഷം തുടങ്ങിയ ഭാഗങ്ങളിൽ പ്രത്യക്ഷപ്പെടുന്ന വേദനയില്ലാത്ത ചെറിയ മുഴകളും വീക്കങ്ങളും. വേദനയില്ലാത്തതിനാൽ തന്നെ ആളുകൾ ഇത് ശ്രദ്ധിക്കാതെ വിടാൻ സാധ്യത കൂടുതലാണ്.
ഈ ലക്ഷണങ്ങൾ എല്ലാം തന്നെ എല്ലായ്പ്പോഴും കാൻസർ ആകണമെന്നില്ലെന്നും, എന്നാൽ ലക്ഷണങ്ങളുടെ ദൈർഘ്യവും സ്ഥിരതയും മനസ്സിലാക്കി ഇവ നേരത്തെ കണ്ടെത്തുന്നത് ചികിത്സ കൂടുതൽ ഫലപ്രദമാക്കാൻ സഹായിക്കുമെന്നും ഡോ. അമിത് വർമ്മ വ്യക്തമാക്കുന്നു. ഇത്തരം മാറ്റങ്ങൾ ശ്രദ്ധയിൽപ്പെട്ടാൽ കൃത്യമായ വൈദ്യപരിശോധനയ്ക്ക് വിധേയമാകാൻ മടിക്കരുതെന്നും അദ്ദേഹം ഓർമ്മിപ്പിച്ചു.
